ខេត្តកំពង់ចាម ៖ ដោយសារភ្លើងស្នេហ៍ឆាបឆេះខ្លាំងធ្វើឱ្យបុរសម្នាក់ឈ្មោះស្រី ឆៃគា ហៅអួងអាយុ២៩ឆ្នាំ នៅលីវ រស់នៅក្នុងភូមិសមរម្យ ឃុំរកាពប្រាំ ស្រុកត្បូងឃ្មុំ ចាក់ស្ត្រីឈ្មោះ ម៉ន ម៉ានី អាយុ៤០ឆ្នាំ រស់នៅភូមិវាលរីខាងកើត ឃុំស្វាយទាប ស្រុកចំការលើ បណ្ដាលឱ្យរងរបួស ។ អំពើហិង្សានេះបានកើតឡើងដោយសារតែការតាមស្រឡាញ់ ប៉ុន្តែត្រូវស្ត្រីកូន៤បដិសេធ ទើបធ្វើឱ្យបុរសលង់ស្នេហ៍ខឹងសម្បាក៏យកដែកឆាបចាក់មកលើស្ត្រីដែលខ្លួនស្រឡាញ់ស្ទើរលេបនេះបណ្ដាលឱ្យរងរបួសមិនតិចជាង១០កន្លែងឡើយ ។
ហេតុការណ៍នេះបានកើតឡើង កាលពីវេលាម៉ោង៤ និង៣០នាទីរសៀលថ្ងៃទី១៩ មិថុនា នៅចំណុចផ្លូវបំបែកត្រើងភូមិខែលជ័យ ឃុំអូរស្វាយ ស្រុកកំពង់សៀម ហើយបុរសបង្ករបួសស្នាមនេះក៏ត្រូវបានប៉ូលិសចាប់ខ្លួនភ្លាមៗដែរ ។ នៅក្នុងមន្ទីរពេទ្យបង្អែកខេត្ត ស្ត្រីរងគ្រោះឈ្មោះម៉ានី បានរៀបរាប់ថា រូបគាត់ទើបតែវិលត្រឡប់មកពីស៊ីឈ្នួលគេនៅខេត្តរតនគិរី បានចំនួន៥ថ្ងៃប៉ុណ្ណោះ។ ចំណែកបុរសឈ្មោះអួង នោះបានតាមស្រឡាញ់គាត់៣ទៅ៤ខែមកហើយក្នុងពេលទៅស៊ីឈ្នួលធ្វើចម្ការឱ្យគេនៅខេត្តរតនគិរីនោះ ។ ទោះបីជាយ៉ាងណាការតាមស្រឡាញ់រូបគាត់នោះ គាត់មិនព្រមឡើយ ព្រោះគាត់មានប្ដី និងមានកូនដល់ទៅ៤នាក់ទៅហើយ ។ ប៉ុន្តែទោះជាគាត់ខំពន្យល់បែបណាក្ដី ក៏បុរសនេះនៅតែងប់ងុលតាមសុំស្រឡាញ់គាត់ដដែល និងដកចិត្តមិនរួច ហើយគាត់មិនដឹងថា គាត់មានមន្តស្នេហ៍អ្វីបានជាធ្វើឱ្យប្រុសក្មេងរូបនេះតាមស្រឡាញ់រហូតនោះទេ ។ ដោយសារតែគេខកបំណងតាមស្រឡាញ់មិនបានក៏បង្កហិង្សាបែបនេះ ។
លោកអនុសេនីយ៍ឯកចក់ សុខកៅ អធិការរងនគរបាលស្រុកកំពង់សៀមបានប្រាប់កោះសន្ដិភាពតាមទូរស័ព្ទថា មុនពេលកើតហេតុស្ត្រីរងគ្រោះបានទូរស័ព្ទណាត់ជួបគ្នាជាមួយនឹងបុរសឈ្មោះអួងនៅម្ដុំផ្លូវបំបែកត្រើង ដើម្បីនិយាយគ្នាឱ្យដាច់ស្រេច និងឱ្យបោះបង់ការតាមស្រឡាញ់នេះ ។ ផ្ទុយទៅវិញបុរសនេះ បានបបួលស្ត្រីរងគ្រោះឱ្យរត់ចោលប្ដី និងកូន ប៉ុន្តែស្ត្រីរងគ្រោះប្រកែក ទើបកើតជាហិង្សាបែបនេះតែម្ដងគឺបុរសនេះយកដែកឆាបចាក់មកលើស្ត្រីរងគ្រោះទាំងកំរោល ។ ភ្លាមៗនោះត្រូវបានសមត្ថកិច្ចអន្តរាគមន៍ចាប់បញ្ជូនមកអធិការដ្ឋាននគរបាលស្រុកកំពង់សៀម ដើម្បីចាត់ការតាមច្បាប់ ។
ពិតជាគួរឱ្យចម្លែកក្នុងចិត្តណាស់ដែលបុរសនៅលីវម្នាក់នេះបែរជាលង់ស្នេហ៍នឹងស្ត្រីមានប្ដី និងមានកូនរហូតដល់ទៅ៤នាក់ និងមានអាយុ៤០ឆ្នាំផ្លាយទៅហើយនោះ ។ វាពិតជាខុសពីបុរសដទៃទៀត ដែលភាគច្រើនស្រឡាញ់តែស្រីក្មេង ស្រីស្អាតនៅក្រមុំព្រហ្មចារី មិនគួរមកបេតីស្ត្រីកូន១កន្ទេល និងមានប្ដីបែបនេះទេ ៕
ចែករំលែកព័តមាននេះ