រាជធានីភ្នំពេញ ៖ យុទ្ធនាការឃោសនាបោះឆ្នោតនឹងឈានមកដល់នៅថ្ងៃទី២៧ មិថុនា ខាងមុខនេះហើយ ដែលគណបក្សនយោបាយប្រកួតប្រជែងគ្នា និងមានការហែក្បួននៅតាមដងផ្លូវ ។ កាលពីថ្ងៃទី១១ មិថុនា លោកស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចុះហត្ថលេខាលើសេចក្ដីជូនដំណឹងលេខ១០១៣ ស.ជ.ណ ដែលមានខ្លឹមសារថា៖
ក្រសួងមហាផ្ទៃពិនិត្យឃើញថា កន្លងមកក្នុងយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ទូទាំងប្រទេសអាណត្តិទី៣ ការដង្ហែក្បួន និងការប្រើប្រាស់ផ្លូវរបស់អ្នកគាំទ្រគណបក្សនយោបាយនានា បានរក្សាសុវត្ថិភាពសណ្ដាប់ធ្នាប់តាមដងផ្លូវស្របតាមបទប្បញ្ញត្តិដែលមានចែងក្នុងច្បាប់ស្ដីពីចរាចរណ៍ផ្លូវគោក ។ ប៉ុន្តែក៏មានការដង្ហែក្បួន និងការប្រើប្រាស់ផ្លូវរបស់អ្នកគាំទ្រគណបក្សនយោបាយខ្លះ មិនបានអនុវត្តត្រឹមត្រូវតាមច្បាប់ស្ដីពីចរាចរណ៍ផ្លូវគោក ដែលធ្វើឱ្យប៉ះពាល់ដល់សុវត្ថិភាពចរាចរណ៍ និងបង្កឱ្យមានគ្រោះថ្នាក់ចរាចរណ៍ ។
ដើម្បីរក្សាសុវត្ថិភាពសណ្ដាប់ធ្នាប់ចរាចរណ៍ផ្លូវគោកឱ្យកាន់តែប្រសើរឡើង និងបង្ការគ្រោះថ្នាក់ចរាចរណ៍នាឱកាសយុទ្ធនាការឃោសនាបោះឆ្នោតជ្រើសតាំងតំណាងរាស្ត្រនីតិកាលទី៥នៅពេលខាងមុខ ក្រសួងមហាផ្ទៃសូមអំពាវនាវដល់គ្រប់គណបក្សនយោបាយ សូមណែនាំដល់អ្នកគាំទ្រត្រូវគោរពច្បាប់ស្ដីពីចរាចរណ៍ផ្លូវគោកគ្រប់ពេល និងគ្រប់ផ្លូវសាធារណៈដែលត្រូវដង្ហែក្បួន។
ក្រសួងមហាផ្ទៃ សង្ឃឹមយ៉ាងមុតមាំដល់ការចូលរួមពីគ្រប់គណបក្សនយោបាយ ដើម្បីរួមគ្នាលើកកម្ពស់ស្មារតីគោរពច្បាប់ស្ដីពីចរាចរណ៍ផ្លូវគោកឱ្យមាននិរន្តរភាព និងប្រសិទ្ធភាពខ្ពស់ប្រយោជន៍រក្សាបាននូវសណ្ដាប់ធ្នាប់សាធារណៈ និងផ្ដល់ក្ដីសុខក្សេមក្សាន្តដល់ប្រជាពលរដ្ឋរបស់យើង ៕
ចែករំលែកព័តមាននេះ