ខេត្តសៀមរាប ៖ ដើម្បីអបអរសាទរជាទិវាប្រវត្តិសាស្ត្ររបស់ជាតិកម្ពុជាទាំងមូលដោយគណៈកម្មការអន្តររដ្ឋាភិបាលសម្រាប់ការការពារបេតិកភណ្ឌវប្បធម៌អរូបីយនៃមនុស្សជាតិ ក្នុងឱកាសកិច្ចប្រជុំលើកទី១៣ នៅទីក្រុងព័រល្វីសនៃសាធារណរដ្ឋម៉ូរីសនាថ្ងៃទី២៨ ខែវិច្ឆិកា ឆ្នាំ២០១៨ ដែលជាមោទនភាពថ្មីមួយទៀតសម្រាប់ប្រជាពលរដ្ឋកម្ពុជាដែលល្ខោនខោលរបស់កម្ពុជាបានទទួលស្គាល់ជាស្នាដៃសិល្បៈបុរាណដ៏វិសេសវិសាលអស្ចារ្យ និងមានតម្លៃជាសកលនោះក្នុងរាត្រីថ្ងៃទី៣០ ខែវិច្ឆិកា ២០១៨ ។
មានរៀបចំធ្វើការជួបជុំទទួលសាទរការដាក់បញ្ចូលល្ខោនខោលខ្មែរបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូនីស្កូនៅបរិវេណព្រះអង្គចេក ព្រះអង្គចម ក្រោមវត្តមានរបស់លោក បណ្ឌិត ឃឹម ប៊ុនសុង អភិបាលនៃគណៈអភិបាលខេត្តលោក អ៊ឹង ហឿន ប្រធានក្រុមប្រឹក្សាខេត្ត និងការអញ្ជើញចូលរួមពីលោក លោកឧកញ៉ា លោកជំទាវ ជាសមាជិកក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរ អង្គភាព អាជ្ញាធរក្រុង មន្ត្រីរាជការ កងកម្លាំងប្រដាប់អាវុធសហភាពសហព័ន្ធយុវជនកម្ពុជាខេត្ត គរុសិស្ស ភ្ញៀវទេសចរណ៍ជាតិ អន្តរជាតិ និងប្រជាពលរដ្ឋយ៉ាងច្រើនកុះករផងដែរ ។
ការដាក់បញ្ចូលល្ខោនខោលជាបេតិកភណ្ឌខ្មែរទី៥ បន្ទាប់ពីប្រាសាទអង្គរវត្ត របាំក្បាច់បុរាណខ្មែរ (របាំព្រះរាជទ្រព្យ), ប្រាសាទព្រះវិហារ ដែលបានធ្វើឱ្យប្រជាពលរដ្ឋខ្មែរមានភាពរំភើបសប្បាយរីករាយក្រៃលែង ។ ការដាក់ល្ខោនខោលចូលក្នុងបញ្ជីបេតិកភណ្ឌសម្បត្តិវប្បធម៌អរូបីយនៃមនុស្សជាតិតាមសេចក្តីសម្រេចរបស់គណៈកម្មការអន្តររដ្ឋាភិបាលសម្រាប់ការពារសម្បត្តិបេតិកភណ្ឌវប្បធម៌អរូបីយរបស់អង្គការយូណេស្កូជាលទ្ធផលនៃកិច្ចប្រឹងប្រែងដ៏យូរអង្វែង និងការពុះពាររបស់រាជរដ្ឋាភិបាលកម្ពុជាដឹកនាំដោយសម្តេចតេជោនាយករដ្ឋមន្ត្រី និង ការគាំទ្រពីសិល្បៈករអង្គការសមាគមន៍សង្គមស៊ីវិលក្នុងវិស័យសិល្បៈវប្បធម៌ និងការគាំទ្រលើកទឹកចិត្តពីមហាជនទូទៅ និងប្រជាពលរដ្ឋខ្មែរទាំងមូលផងដែរ ។
បន្ទាប់ពីធ្វើការទូងផ្គរជ័យទទួលសាទរការដាក់បញ្ចូលល្ខោនខោលខ្មែរបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូនីស្កូក៏មានការសម្តែងល្ខោនខោលដោយក្រុមសាលាវិចិត្រសិល្បៈនៃមន្ទីរវប្បធម៌ និងវិចិត្រសិល្បៈខេត្តសៀមរាបរួចមកមានប្រសាសន៍ទៅកាន់មហាជនដែលបានចូលរួមក្នុងឱកាសនោះលោកបណ្ឌិត ឃឹម ប៊ុនសុង ក៏បានគូសបញ្ជាក់ថា នេះជាទិវាប្រវត្តិសាស្ត្រថ្មីមួយទៀតដែលបានដាក់ចូលល្ខោនខោលកម្ពុជាក្នុងបញ្ជីសម្បត្តិវប្បធម៌ពិភពលោក ។
លោកបណ្ឌិតបន្តទៀតថា លទ្ធផលទាំងនេះក៏ដោយប្អូនៗក្មួយៗជាសិល្បៈករសិល្បៈការី និង ការគាំទ្រលើកទឹកចិត្តពីមហាជនទូទៅ និងប្រជាពលរដ្ឋខ្មែរទាំងមូលផងនោះក្នុងការថែរក្សាអភិរក្សនូវល្ខោនខោលដែលជាសម្បត្តិវប្បធម៌របស់ជាតិខ្មែរយើង ។ កត្តាទាំងនេះក៏សបញ្ចាក់ផងដែរដែលក្រុមសិល្បៈករសិល្បៈការីយើងបានខិតខំយកចិត្តទុកដាក់ថែរក្សាវប្បធម៌ជាតិ ដែលជាអត្តសញ្ញាណនៃដូងព្រលឹងជាតិយើង ។ ម្យ៉ាងទៀតបើមិនមានប្អូនៗក្មួយៗដែលជាអ្នកបន្តវេនទេនោះវប្បធម៌ជាតិនឹងត្រូវវិនាសសាបសូន្យជាក់ជាមិនខាន ។
ក្នុងនោះដែរលោក បណ្ឌិតក៏បានធ្វើការកោតសរសើរចំពោះសិល្បៈករសិល្បៈការីទាំងអស់ដែលបានចូលរួមក្នុងពិធីអបអរសាទរនាពេលនេះក្នុងនាមអាជ្ញាធរខេត្តក្រុមប្រឹក្សាខេត្តរួមទាំងថ្នាក់ដឹកនាំមន្ត្រីរាជការកងកម្លាំងទាំងអស់ក្នុងខេត្តសៀមរាបសូមធ្វើការស្វាគមន៍ចំពោះវត្តមានភ្ញៀវជាតិអន្តរជាតិ និងប្រជាពលរដ្ឋដែលបានចូលរួមក្នុងកម្មវិធីធ្វើឲ្យមានភាពអធិកអធម៌ទៀតផង ៕
ចែករំលែកព័តមាននេះ