ខេត្តបន្ទាយមានជ័យ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាមានប្រសាសន៍បញ្ជាក់ថា ត្រូវបន្តវិធានការរក្សាសន្តិភាព ការពារ រក្សាស្ថិរភាពនយោបាយដើម្បីអភិវឌ្ឍន៍សេដ្ឋកិច្ចសង្គមកាត់បន្ថយភាពក្រីក្រ ។ គ្មានការអភិវឌ្ឍណាមួយដែលចាប់ផ្តើមពីអស្ថិរភាព ឬមានសង្គ្រាមនោះទេ ។
ខេត្តបន្ទាយមានជ័យ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាមានប្រសាសន៍បញ្ជាក់ថា ត្រូវបន្តវិធានការរក្សាសន្តិភាព ការពារ រក្សាស្ថិរភាពនយោបាយដើម្បីអភិវឌ្ឍន៍សេដ្ឋកិច្ចសង្គមកាត់បន្ថយភាពក្រីក្រ ។ គ្មានការអភិវឌ្ឍណាមួយដែលចាប់ផ្តើមពីអស្ថិរភាព ឬមានសង្គ្រាមនោះទេ ។
សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍បញ្ជាក់បែបនេះនាព្រឹកថ្ងៃទី២១ មិថុនា ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធបើកឱ្យប្រើប្រាស់ផ្លូវជាតិលេខ៥៩ប្រវែងសរុប១៤៤,២៧គីឡូម៉ែត្រ ពីបំបែកផ្លូវជាតិលេខ៥ត្រង់គីឡូម៉ែត្រលេខ៣៩៣នៅភូមិកូនដំរីខេត្តបន្ទាយជ័យ ដល់គីឡូម៉ែត្រលេខ៩០តាមផ្លូវជាតិលេខ៥៧នៅភូមិស្ទឹងកាច់(ខេត្តប៉ៃលិន)ក្រោមថវិកាកម្ចីសម្បទានពីរដ្ឋាភិបាលនៃសាធារណរដ្ឋប្រជាមានិតចិន ដែលត្រូវចំណាយថវិកា៧២,៨៨លានដុល្លារអាមេរិក និងថវិកាបដិភាគរបស់រាជរដ្ឋាភិបាល ។
សម្តេចតេជោនាយករដ្ឋមន្ត្រីមានប្រសាសន៍បន្តថា ត្រូវរក្សាសន្តិភាព ស្ថិរភាពនយោបាយដែលយើងខិតខំរកដោយលំបាក ហើយតាមរយៈសន្តិភាព ស្ថិរភាពនយោបាយនេះគឺបានផ្តល់ឱកាសដ៏ល្អបំផុតហើយឱ្យយើងសម្រាប់ការអភិវឌ្ឍសេដ្ឋកិច្ចសង្គមដើម្បីកាត់បន្ថយភាពក្រីក្រ ។ ទន្ទឹមនេះសម្តេចតេជោ នាយករដ្ឋមន្ត្រីបានថ្លែងអំណរគុណចំពោះមិត្តចិនដែលបានផ្តល់កម្ចីនូវចំនួនយ៉ាងច្រើនសម្រាប់ការអភិវឌ្ឍ ពិសេសចិនបានគាំទ្រយុទ្ធសាស្ត្រជាទិភាពរបស់រាជរដ្ឋាភិបាលក្នុងការអភិវឌ្ឍហេដ្ឋារចនាសម្ព័ន្ធរូបវន្តពេញផ្ទៃប្រទេសដែលក្នុងនោះគាំទ្រសម្តេចក្នុងការអភិវឌ្ឍហេដ្ឋារចនាសម្ព័ន្ធរូបវន្តនៅតាមបន្ទាប់ខ្សែព្រំដែន ដែលប្រែក្លាយអតីតសមរភូមិឱ្យទៅជាតំបន់ដែលមានការអភិវឌ្ឍ កិច្ចសហប្រតិបត្តិការល្អ និងក្លាយជាទីផ្សារ សម្រាប់ពាណិជ្ជកម្មរវាងប្រទេសជិតខាង ។
នយោបាយឈ្នះ=ឈ្នះ បានធ្វើឱ្យប្រទេសជាតិទាំងមូលមានការឯកភាពជាតិបានប្រែក្លាយតំបន់នៅភាគពាយ័ព្យដូចជាបាត់ដំបងប៉ៃលិន និងបន្ទាយមានជ័យ ដែលពីមុនពោរពេញភាពតានតឹងជម្លោះសង្គ្រាមឱ្យទៅជាតំបន់អភិវឌ្ឍន៍មានសេដ្ឋកិច្ចរីកចម្រើន ។ សម្តេចមានប្រសាសន៍ថា ការធ្វើសមាហរណកម្មរដ្ឋបាលមិនគ្រប់គ្រាន់ទេ អ្វីដែលសំខាន់បំផុតនោះគឺការធ្វើសមាហរណកម្មផ្នែកហេដ្ឋារចនាសម្ព័ន្ធរូបវន្តប្រទាក់ក្រឡាគ្នានៅគ្រប់ទីកន្លែងដើម្បីផ្តល់ឱកាសពេជ្រសម្រាប់ប្រជាពលរដ្ឋងាយស្រួលអភិវឌ្ឍន៍ជីវភាពតាមរយៈការដឹកជញ្ជូនកសិផល និងការធ្វើដំណើរទៅមកងាយស្រួលបានផងដែរ ។
សម្តេចតេជោនាយករដ្ឋមន្ត្រីបញ្ជាក់ថា ចក្ខុវិស័យរបស់គណបក្សប្រជាជនកម្ពុជាមានគោលនយោបាយដាក់លុយចូលហោប៉ៅប្រជាជនតាមរយៈការសាង់សង់ហេដ្ឋារចនាសម្ព៏ន្ធផ្លូវថ្នល់គ្រប់ទីកន្លែងដែលអាចធ្វើឱ្យប្រជាជនចំណេញពេលវេលាក្នុងការធ្វើដំណើរ និងចំណេញប្រាក់កាសដែលអាចជំរុញការកាត់បន្ថយភាពក្រីក្រមានប្រសិទ្ធភាព ។ នៅក្នុងគម្រោងរបស់រាជរដ្ឋាភិបាលឆ្នាំ២០១៤សម្តេចបានស្នើឱ្យចិនបន្តគាំទ្រកម្ពុជាក្នុងការស្តារកសាងឡើងវិញផ្លូវជាតិលេខ៥៨បន្តទៀតតាមខែបន្ទាត់ព្រំដែនកម្ពុជា-ថៃ។
សម្តេចតេជោ នាយករដ្ឋមន្ត្រីមានជំនឿយ៉ាងមុតមាំថា សម្រាប់ការបោះឆ្នោតអាណត្តិទី៥ ខាងមុខខេត្តបន្ទាយមានជ័យនឹងទទួលបានសំឡេងច្រើនជាងកាលបោះឆ្នោតកន្លងទៅ ដោយសារតែគោលនយោបាយចាស់សកម្មភាពថ្មីរបស់គណបក្សប្រជាជនកម្ពុជាដែលមានយុវជនស្ម័គ្រចិត្តរាប់ពាន់នាក់ ចុះបំពេញបេសកកម្មវាស់វែងដីធ្លីផ្តល់កម្មសិទ្ធិជូនប្រជាជននៅគ្រប់ទីកន្លែង ។ តាមរយៈគោលនយោបាយចាស់សកម្មភាពថ្មីដែលផ្តល់ប័ណ្ណកម្មសិទ្ធិជូនប្រជាជនប្រមាណជា២លានហិកតាទាំងដីដែលបានផ្តល់រួច និងកំពុងផ្តល់នោះនឹងបង្កើតឱកាសដល់ពួកគាត់បន្ថែមទៀតបង្កបង្កើតផលដាំដំណាំកសិកម្ម ពិសេសបូកជាមួយហេដ្ឋារចនាសម្ព័ន្ធដែលបានសាងសង់រួច និងកំពុងបន្តសកម្មភាពសាងសង់នោះ និងធ្វើឱ្យកម្រិតជីវភាពពួកគាត់កាន់តែប្រសើរឡើងជាលំដាប់ទៀតផង ៕
ចែករំលែកព័តមាននេះ