ខេត្តប៉ៃលិន ៖ ស្លាកគណបក្សប្រជាជនកម្ពុជាចំនួន២កន្លែង និងស្លាកសញ្ញាចរាចរណ៍មួយកន្លែងត្រូវបានជនមិនស្គាល់អត្តសញ្ញាណបា.ញ់ដោយកាំភ្លើងចំនួន១៣គ្រាប់ បណ្តាលឱ្យធ្លុះធ្លាយអស់ កាលពីវេលាម៉ោងប្រហែល១២និង៣០នាទី រំលងអធ្រាត្រឈានចូលថ្ងៃទី២០ មិថុនា នៅលើផ្លូវជាតិលេខ៥៧ ស្ថិតក្នុងភូមិបឹងព្រលឹត ឃុំស្ទឹងកាច់ ស្រុកសាលាក្រៅ ។
ខេត្តប៉ៃលិន ៖ ស្លាកគណបក្សប្រជាជនកម្ពុជាចំនួន២កន្លែង និងស្លាកសញ្ញាចរាចរណ៍មួយកន្លែងត្រូវបានជនមិនស្គាល់អត្តសញ្ញាណបាញ់ដោយកាំភ្លើងចំនួន១៣គ្រាប់ បណ្តាលឱ្យធ្លុះធ្លាយអស់ កាលពីវេលាម៉ោងប្រហែល១២និង៣០នាទី រំលងអធ្រាត្រឈានចូលថ្ងៃទី២០ មិថុនា នៅលើផ្លូវជាតិលេខ៥៧ ស្ថិតក្នុងភូមិបឹងព្រលឹត ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានពីសាក្សីនៅក្បែរកន្លែងកើតហេតុ បានរៀបរាប់ឱ្យដឹងថា មុនពេលកើតហេតុនៅពាក់កណ្តាលអធ្រាត្រ គេឃើញមានមនុស្សមួយក្រុមមានគ្នាប្រហែល៧ទៅ៨នាក់ ជិះរថយន្តមួយគ្រឿង និងមូ៉តូពីរគ្រឿងក្នុងទិសដៅពីកើតទៅលិច ។ លុះមកដល់ស្លាកសញ្ញាគណបក្សប្រជាជនកម្ពុជា ដំបូងអ្នកដែលជិះម៉ូតូខាងក្រោយទាំងពីរនាក់បានដកកាំភ្លើងខ្លីបាញ់ទៅលើស្លាកសញ្ញាតែម្តង ហើយពួកគេនាំគ្នាបន្តដំណើរទៅមុខទៀត ។ ស្រាប់តែអ្នកជិះរថយន្តមួយគ្រឿងមិនស្គាល់ម៉ាកបានដកកាំភ្លើងខ្លីបាញ់ទៅលើស្លាកសញ្ញាចរាចរណ៍ រួចពួកគេក៏បន្តដំណើរទៅមុខ ហើយនាំគ្នាបាញ់ស្លាកគណបក្សប្រជាជនកម្ពុជាមួយកន្លែងទៀត ។ ប្រភពដដែលបានបន្តទៀតថា ក្រោយពីធ្វើសកម្មភាពបាញ់ទៅលើស្លាកសញ្ញានេះរួច ពួកគេទាំងអស់នោះក៏បានបត់រថយន្ត និងម៉ូតូត្រឡប់ក្រោយវិញ ក្នុងទិសដៅពីលិចទៅកើត ។
មន្ត្រីប៉ុស្តិ៍រដ្ឋបាលឃុំស្ទឹងកាច់បានប្រាប់កោះសន្តិភាពថា ជនមិនស្គាល់មុខទាំងនោះ មានកាំភ្លើងខ្លីកាន់នៅនឹងដៃ ។ បើតាមការសន្និដ្ឋាន នេះមិនមែនជាពលរដ្ឋធម្មតានោះទេ អាចជាក្រុមចោរ ឬជាជនអ្នកលេងណាមួយ ហើយក៏អាចជាមន្ត្រីខិលខូចណាម្នាក់ដែរ ។ លោកបានបន្តទៀតថា ក្រោយពីពិនិត្យមើលសម្បកគ្រាប់ទើបស្គាល់ម៉ាកកាំភ្លើងខ្លីដែលបាញ់ គឺម៉ាកឡុក ។ ពេលនេះសមត្ថកិច្ចកំពុងតែតាមសង្កេត និងស្រាវជ្រាវថាតើជនដែលព្រហើនហ៊ានយកកាំភ្លើងទៅបាញ់ស្លាកសញ្ញាគណបក្សប្រជាជនកម្ពុជា ដែលដាក់ឈរនៅស្ងៀមសោះនោះជានរណា? ហើយបើសិនជាស្គាល់ សមត្ថកិច្ចនឹងចាប់យកមកផ្តន្ទាទោសតាមច្បាប់ ៕
ចែករំលែកព័តមាននេះ