រាជធានីភ្នំពេញ ៖ ធនាគារ​កម្ពុជា​សាធា​រណៈ​ទ​​ទួល​បានពាន​រង្វាន់ «​USD​ 2012 Straight-​Through-Processing Excellence Award​»​លើសារ​ទូទាត់​ដែល​មាន​គុណ​ភាព​ល្អឥត​ខ្ចោះ​សម្រាប់​ឆ្នាំទី២​​ជាបន្ត​បន្ទាប់​ផ្តល់​ដោយ​ធនាគារ​ Deutsche​ Bank​ ញូវយ៉ក ដែល​ជា​ធនាគារ​មួយក្នុង​ចំណោម​​ធនាគារធំៗ​ទាំង​ប្រាំផ្តល់​ការ​ផាត់​ទាត់រូបិយ​ប័ណ្ណដុល្លារ​អាមេរិក​នៅសហរដ្ឋអាមេរិក ។​​

ពាន​​រង្វាន់​ចំនួន​១៣​តែប៉ុណ្ណោះ​​ដែល​ធនាគារ​ Deutsche Bank ផ្តល់​ជូន​ដល់​បណ្តាប្រទេសនៅ​​អាស៊ីអាគ្នេយ៍ ​អូស្រ្តាលី​ និងនូវែល​សេឡង់ នៅក្នុងឆ្នាំនេះ​​ដោយ​ប្រៀបធៀប​នឹងឆ្នាំមុន​ គឺមាន១៥រង្វាន់ ។ ភ្នាក់​ងារ​ Nostro មាន​អត្រាទូទាត់​ជា​មធ្យម​ខ្ពស់​ជាង​ 97%​​ ទើប​ត្រូវ​បាន​​ទទួលស្គាល់​​ ​ហើយ​ធនាគារ​កម្ពុជាសាធារណៈ​សម្រេចបាន​​99.08​%​​​ខ្ពស់​ជាង​ឆ្នាំមុន​​ដែល​​មាន​​ 98.95% ។

លោក​ស្រី​ Vandee​ Rungthaveesen  ​អគ្គនាយ​ិកា​ Global Transaction Banking និង​ជាប្រធាន​​គ្រឹះស្ថាន​ហិរញ្ញវត្ថុ​គ្រប់​គ្រង​សាច់​ប្រាក់ (Cash Management Financial Institutions​) នៅ​ឥណ្ឌូចិន​ បាន​ប្រគល់​ពាន​រង្វាន់​នេះ​ជូន​លោក​ ផាន​ យិងថុង​ ប្រធាន​ធនាគារ​ប្រចាំ​ប្រទេស​​នៃធនាគារ​កម្ពុជាសាធារណៈ​​​នៅ​ថ្ងៃ​ទី២០​ ខែមិថុនា​ ឆ្នាំ២០១៣ ​ដោយ​មាន​វត្តមាន​របស់​Dato’ Chang Kat Kiam នាយក​ប្រតិបត្តិ​ប្រតិបត្តិការ​​នៃធនាគារ​ Public Bank Berhad ប្រទេស​ម៉ាឡេស៊ី ៕