រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួកជាច្រើននាក់ដែលធ្វើសកម្មភាពប្លន់ទូរស័ព្ទដៃជនរងគ្រោះនៅក្នុងស្តាតអូឡាំពិក ហើយរត់គេចខ្លួន កាលពីអំឡុងខែវិច្ឆិកា ២០០៨ រហូតមកដល់ពេលនេះត្រូវបានសមត្ថកិច្ចនគរបាលខណ្ឌ៧មករា ឃាត់ខ្លួនកាលពីវេលាម៉ោង៩ និង៣០នាទីព្រឹក ថ្ងៃទី២១ មិថុនា ២០១៣។ ការឃាត់ខ្លួននេះធ្វើឡើងតាមដីកាបង្គាប់ឱ្យចាប់ខ្លួនរបស់លោក ជា សុខហៀង ចៅក្រមស៊ើបសួរសាលាដំបូងរាជធានីភ្នំពេញ។
ជនសង្ស័យឈ្មោះអ៊ុន គឹមហេង ហៅមាន់ ភេទប្រុស អាយុ១៥ឆ្នាំ ស្នាក់នៅអគារបុរីកីឡា ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ មុខរបរមិនពិត
ប្រាកដ។
លោកអនុសេនីយ៍ទោ រស់ ស៊ីណា ប្រធានផ្នែកនគរបាលព្រហ្មទណ្ឌខណ្ឌ៧មករាបានឱ្យដឹងថា ជនសង្ស័យរូបនេះ និងបក្សពួក១ក្រុមបានធ្វើសកម្មភាពប្លន់ទូរស័ព្ទដៃពីប្រជាពលរដ្ឋតាមផ្លូវសាធារណៈ និងភាគច្រើនវាយប្លន់យកទ្រព្យសម្បត្តិនៅក្នុងពហុកីឡដ្ឋានជាតិអូឡាំពិកពេលហាត់ប្រាណ ឬចូលលេងកំសាន្តយប់ជ្រៅបន្តិច។ បន្ទាប់មកបក្សពូករបស់គេត្រូវប៉ូលិសចាប់ខ្លួនបានមួយចំនួនបញ្ជូនទៅពន្ធនាគារ នៅសល់ជនសង្ស័យម្នាក់នេះបានរត់គេចខ្លួនជាច្រើនឆ្នាំមកហើយ៕
ចែករំលែកព័តមាននេះ