ខេត្តកណ្តាល ៖ បុរសម្នាក់ដែលជាប់សង្ស័យពាក់ព័ន្ធនឹងករណីប្លន់ម៉ូតូស្គូពី និងលុយពីជនរងគ្រោះនៅតាមផ្លូវ កាលពីយប់ថ្ងៃទី១៩ មិថុនា នៅភូមិតាខ្មៅ សង្កាត់តាខ្មៅ ហើយយកម៉ូតូទៅបាត់ លុះរំលងបាន១ថ្ងៃគឺនៅវេលាម៉ោង១១ព្រឹកថ្ងៃទី២០ មិថុនា ប៉ូលិសក្រុងតាខ្មៅបានធ្វើការស្រាវជ្រាវ និងឃាត់ខ្លួនដោយបាននាំមកសាកសួរតាមការចង្អុលបង្ហាញរបស់សាក្សីដែលស្គាល់ជនសង្ស័យ
ខេត្តកណ្តាល ៖ បុរសម្នាក់ដែលជាប់សង្ស័យពាក់ព័ន្ធនឹងករណីប្លន់ម៉ូតូស្គូពី និងលុយពីជនរងគ្រោះនៅតាមផ្លូវ កាលពីយប់ថ្ងៃទី១៩ មិថុនា នៅភូមិតាខ្មៅ សង្កាត់តាខ្មៅ ហើយយកម៉ូតូទៅបាត់ លុះរំលងបាន១ថ្ងៃគឺនៅវេលាម៉ោង១១ព្រឹកថ្ងៃទី២០ មិថុនា ប៉ូលិសក្រុងតាខ្មៅបានធ្វើការស្រាវជ្រាវ និងឃាត់ខ្លួនដោយបាននាំមកសាកសួរតាមការចង្អុលបង្ហាញរបស់សាក្សីដែលស្គាល់ជនសង្ស័យច្បាស់ ។
លោក ហិុន គឿន នាយផ្នែកប៉ូលិសព្រហ្មទណ្ឌក្រុងតាខ្មៅបានឱ្យដឹងថា ជនសង្ស័យដែលត្រូវឃាត់ខ្លួនឈ្មោះ យឹម រដ្ឋា ហៅ យឹម ឆ្លូញ អាយុ២៣ឆ្នាំ មានស្រុកកំណើតនៅភូមិព្រែកហូរលិច សង្កាត់ព្រែកហូរ ក្រុងតាខ្មៅ បច្ចុប្បន្នស្នាក់នៅភូមិដើមគ សង្កាត់ដើមមៀន ក្រុងតាខ្មៅ មុខរបរខាត់ស៊ីរា៉ស្បែកជើង ហើយជននេះក៏មានដីកាបង្គាប់ឱ្យចាប់ខ្លួនរបស់សាលាដំបូងខេត្តពីបទប្លន់ផងដែរ ។ ចំណែកជនរងគ្រោះឈ្មោះ សុខ ជីវា៉ ភេទស្រី អាយុ២២ឆ្នាំ មានទីលំនៅភូមិថ្មី២ សង្កាត់តាខ្មៅ ក្រុងតាខ្មៅ ។
តាមមន្ត្រីប៉ូលិសឱ្យដឹងថា កាលពីវេលាម៉ោង៨យប់ថ្ងៃទី១៩ មិថុនា ជនរងគ្រោះបានជិះម៉ូតូរបស់ខ្លួនមា៉កស្គូពីពណ៌ឈាមជ្រូក ដោយមានស្ពាយកាបូបលុយផង ។ លុះពេលមកដល់ផ្លូវលេខ១០៨ក្រោយតារាងបាល់ទាត់ខេត្ត ដែលជាកន្លែងស្ងាត់ ហើយផ្លូវមានភក់និងទួលផងនោះ ជនរងគ្រោះក៏បានបន្ថយល្បឿនម៉ូតូ នៅពេលនោះ ស្រាប់តែជនសង្ស័យម្នាក់នេះបានស្ទុះមកច្រាន់ម៉ូតូឱ្យដួលហើយប្រតាយយកកូនសោម៉ូតូ រួចជិះគេចខ្លួនបាត់ទៅ ។ នៅក្នុងកាបូបជនរងគ្រោះ ដែលនៅជាប់នឹងម៉ូតូមានលុយចំនួន២.៥០០ដុល្លារ និងលុយខ្មែរមួយចំនួនទៀត ។
មន្ត្រីប៉ូលិសបានឱ្យដឹងទៀតថា ក្រោយពីឃាត់ខ្លួនមកសាកសួរ ជនសង្ស័យបានបដិសេធការចោទប្រកាន់ ។ ប៉ុន្តែជនរងគ្រោះស្គាល់មុខជនសង្ស័យច្បាស់ និងអះអាងប្រាប់ថាគឺពិតជាជននេះហើយដែលធ្វើសកម្មភាពប្លន់ម៉ូតូ និងលុយរបស់ខ្លួន ។ បើទោះបីជាជនសង្ស័យនេះមិនឆ្លើយសារភាពក្តី តែជននេះក៏មានដីកាបង្គាប់ឱ្យចាប់ខ្លួនស្រាប់ពីបទប្លន់ និងត្រូវបានប៉ូលិសក្រុងតាខ្មៅកសាងសំណុំរឿងដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ