រាជធានីភ្នំពេញ ៖ កោះសន្តិភាព ពិតជាមានក្តីសោមនស្សរីករាយជាពន់ពេក ចំពោះការចូលរួមកែលម្អការផ្សាយរបស់ខ្លួន ពីសំណាក់លោក ជុំ កុសល រដ្ឋលេខាធិការក្រសួងព័ត៌មាន តាមរយៈហ្វេសប៊ុករបស់លោក ហើយត្រូវបានបន្ទរដោយគេហទំព័រក្នុងស្រុកមួយ ។ ការកែលម្អរបស់លោកនោះ គឺចំណងជើងអត្ថបទព័ត៌មានដែលជាចំណងជើងធំចេញផ្សាយ នៅថ្ងៃទី២៩ វិច្ឆិកា ក្នុងឆ្នាំទី៥១ លេខ៩៥៥៤ ។
កោះសន្តិភាពសូមធ្វើការបំភ្លឺជូនថា ចំណងជើងអត្ថបទនេះ ប្រហែលជាមិនដល់ថ្នាក់ធ្វើឱ្យសាធារណជនមានការយល់ច្រឡំនោះទេដោយសារថា ការមានប្រសាសន៍របស់សម្តេចតេជោពីបញ្ហានេះ ត្រូវបានផ្សព្វផ្សាយផ្ទាល់ តាមបណ្តាញសង្គម តាមរយៈគេហទំព័រជាច្រើន ហើយការផ្សាយប្រសាសន៍របស់សម្តេច ក៏ត្រូវបានចាក់ផ្សាយតាមវិទ្យុជាច្រើនប៉ុស្តិ៍ និងតាមស្ថានីយទូរទស្សន៍ ។
រីឯការផ្សាយរបស់កោះសន្តិភាព គឺក្រោយ១ថ្ងៃព្រោះថា ជាសារព័ត៌មានបោះពុម្ព ។ ការដាក់ចំណងជើងខាងលើ មិនមានចេតនាអាក្រក់ណាមួយទេ ដោយសារខ្លឹមសារអត្ថបទបានផ្សាយគ្រប់គ្រាន់ពីប្រសាសន៍របស់សម្តេចតេជោនាយករដ្ឋមន្ត្រី ដែលសម្តេចបានស្នើឱ្យក្រសួងការងារ និងបណ្តុះបណ្តាលវិជ្ជាជីវៈ សហការជាមួយក្រសួងយុត្តិធម៌ ពិនិត្យដោះស្រាយរាល់បណ្តឹងមេសហជីព ដែលកំពុងស្ថិតក្នុងយុត្តាធិការតុលាការ ដើម្បីឱ្យបញ្ចប់ត្រឹមឆ្នាំ២០១៨ ។
ក្នុងនោះដែរ សម្តេចតេជោក៏បានជំរុញឱ្យមេសហជីពទាំងអស់ ដែលកំពុងមានក្តីក្តាំនៅតុលាការ ត្រូវបញ្ជូនសំណើដោះស្រាយបញ្ហាទៅកាន់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដើម្បីឱ្យលោករដ្ឋមន្ត្រី អុិត សំហេង បន្តធ្វើការងារជាមួយរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា ក៏ដូចជាស្ថាប័នតុលាការ ដើម្បីដោះស្រាយបញ្ហាឱ្យបានឆាប់រហ័ស កុំឱ្យអូសបន្លាយដល់ឆ្នាំ២០១៩ ។
ឆ្លងតាមការបំភ្លឺនេះ ក៏ដូចជាអត្ថបទដែលបានចុះផ្សាយជាមួយគ្នានេះ មិនមានន័យថា សម្តេចតេជោនាយករដ្ឋមន្ត្រីលូកដៃ ឬក៏ជ្រៀតជ្រែកក្នុងស្ថាប័នតុលាការនោះទេ ហើយនរណាក៏ដឹងដែរថា សម្តេចគ្រាន់តែជំរុញតាមស្ថាប័នរបស់រាជរដ្ឋាភិបាល ដែលពាក់ព័ន្ធធ្វើការងារជាមួយតុលាការដោះស្រាយបញ្ហាខាងលើនេះ ដោយសម្តេចមានប្រសាសន៍ថា «នៅពេលដែលគេបញ្ចប់ការស៊ើបអង្កេត តុលាការគេនឹងធ្វើការតាមដាន ឬមួយគេនឹងចាត់ការយកទៅជម្រះ ។ បើយកទៅជម្រះ សូមយកទៅជម្រះឱ្យបានឆាប់រហ័ស ឬមួយគេទម្លាក់ចោល គេមិនចាត់ការតែម្តង ។ តម្កល់ទុកមិនចាត់ការ ។ ដូច្នោះ បើតម្កល់ទុកមិនចាត់ការ គឺវាចប់ហើយ កុំឱ្យមានសភាពដូចសព្វថ្ងៃនេះ មេសហជីពយើងខ្លះ កំពុងធ្វើការនៅក្រោមឥទ្ធិពលនៃពាក្យបណ្តឹង អាហ្នឹងវាមិនល្អនោះទេ» ។
សរុបសេចក្តីមក កោះសន្តិភាពរីករាយទទួលយកការកែលម្អ ចំពោះចំណងជើងអត្ថបទនេះ និងសូមកែចំណងជើងថា «រឿងក្តីមេសហជីព សម្តេចតេជោស្នើឱ្យបញ្ឈប់ក្តីក្តាំទាំងអស់នៅតុលាការ តាមរយៈក្រសួងការងារ និងក្រសួងយុត្តិធម៌» ។
ខាងក្រោមនេះ គឺជាការចុះផ្សាយម្តងទៀត ជុំវិញអត្ថបទព័ត៌មាននេះ ៖
រឿងក្តីមេសហជីព ៖ សម្តេចតេជោស្នើឱ្យបញ្ឈប់ក្តីក្តាំទាំងអស់នៅតុលាការ
រាជធានីភ្នំពេញ ៖ សម្ដេចតេជោនាយករដ្ឋមន្ត្រី ហ៊ុន សែន បានស្នើឱ្យបញ្ចប់រឿងក្ដីក្ដាំជាមួយសហជីពទាំងអស់នៅតុលាការឱ្យចប់សព្វគ្រប់ត្រឹមឆ្នាំ២០១៨ ក្នុងនោះសម្ដេចក៏បានជំរុញដល់មេសហជីពទាំងអស់ ដែលកំពុងមានក្តីក្តាំនៅតុលាការ ត្រូវបញ្ជូនសំណើដោះស្រាយបញ្ហាទៅកាន់រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ ។
សម្ដេចតេជោបានពន្យល់ថា បានជាជំរុញឱ្យសហជីពបញ្ជូនសំណើទៅកាន់រដ្ឋមន្ត្រីក្រសួងការងារនិងបណ្តុះបណ្តាលយ៉ាងដូច្នេះ គឺដើម្បីឱ្យរដ្ឋមន្ត្រីក្រសួងការងារ លោក អុិត សំហេង បន្តធ្វើការជាមួយរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា ក៏ដូចជាស្ថាប័នតុលាការជាបន្តបន្ទាប់ទៀតដែរ ដើម្បីដោះស្រាយបញ្ហាឱ្យបានឆាប់រហ័ស កុំឱ្យអូសបន្លាយដល់ឆ្នាំ២០១៩ ។
សម្ដេចតេជោនាយករដ្ឋមន្ត្រី បានថ្លែងបែបនេះ នាឱកាសដែលសម្ដេចអញ្ជើញជួបសំណេះសំណាលជាមួយកម្មករកម្មការិនីជិត១៨ពាន់នាក់ មកពីរោងចក្រ សហគ្រាសចំនួន១២ នៅក្នុងខេត្តកណ្តាល ដែលបានធ្វើឡើងនៅភូមិក្រាំងស្បូវ ឃុំព្រះពុទ្ធ ស្រុកកណ្តាលស្ទឹង កាលពីព្រឹកថ្ងៃទី២៨ ខែវិច្ឆិកា ។
សម្ដេចតេជោបន្តថា តុលាការក៏កំពុងពន្លឿនការស៊ើបអង្កេតលើសំណុំរឿងនេះដែរ ហើយ នៅពេលគេធ្វើការបិទបញ្ចប់ការស៊ើបអង្កេតហើយ តុលាការនឹងធ្វើការសន្និដ្ឋាន ឬមួយគេចាត់ការយកទៅជំនុំជម្រះ ។ សម្ដេចតេជោបានសង្កត់ធ្ងន់ថា បើយកទៅជំនុំជម្រះក៏ត្រូវជម្រះឱ្យរហ័ស ឬមួយគេទម្លាក់ចោលមិនចាត់ការតែម្ដង (តម្កល់ទុកមិនចាត់ការ) ។
ទោះបីជាបែបណា សម្ដេចតេជោបានទទូចថា «សូមឱ្យបិទបញ្ចប់រឿងនេះនៅត្រឹមឆ្នាំ២០១៨ទៅ កុំឱ្យមានសំណុំរឿងនេះបន្តនៅឆ្នាំ២០១៩ទៀត» ។ សម្ដេចតេជោ បានកត់សម្គាល់ថា សហជីពខ្លះក្នុងពេលកំពុងបំពេញការងារ ក៏កំពុងស្ថិតនៅក្រោមឥទ្ធិពលនៃពាក្យបណ្ដឹងដែរ ដែលនេះជារឿងមិនល្អទេ ។ លំហសេរីភាពនៃការងារ របស់សហជីព គឺមិនទាន់ទទួលបានពេញលេញ ដូច្នេះ សូមឱ្យក្រសួងការងារនិងបណ្ដុះបណ្ដាលវិជ្ជាជីវៈ សហការជាមួយក្រសួងយុត្តិធម៌ ហើយតាមរយៈក្រសួងយុត្តិធម៌ សូមធ្វើការជាមួយតុលាការ ដើម្បីបិទបញ្ចប់សំណុំរឿងទាំងឡាយ ដែលពាក់ព័ន្ធជាមួយនឹងសកម្មភាពរបស់សហជីពដែលជាតំណាងឱ្យកម្មករ។
សម្តេចតេជោប្រមុខរាជរដ្ឋាភិបាលបញ្ជាក់ថា ទាំងនេះក៏ជាផ្នែកមួយនៃការធានាសិទ្ធិនយោបាយ និងសិទ្ធិការងាររបស់សហជីព និងរបស់កម្មករផងដែរ ។ ប៉ុន្តែក៏សូមឱ្យទាំងអស់គ្នាគោរពច្បាប់ ម្ចាស់រោងចក្រក៏គោរពច្បាប់ កម្មករ កម្មការិនីក៏គោរពច្បាប់ អ្នកណាៗក៏គោរពច្បាប់ នោះសិទ្ធិសេរីភាព និងផលិតភាពការងារនឹងកើតមានក្នុងរោងចក្រ ៕
ចែករំលែកព័តមាននេះ