រាជធានីភ្នំពេញ ៖ បងប្អូនកម្មករ-កម្មការិនីបណ្ដែតរបស់មន្ទីរសាធារណការ និងដឹកជញ្ជូនរាជធានីភ្នំពេញ ក្នុងនោះមានកម្មករថែសួនសម្អាតសួនច្បារ ស្ដារបូមលាងលូ សន្ដិសុខសួន និងកម្មករផ្នែកសាធារណការ មានចំនួន៥២០នាក់បានទទួលការលើកទឹកចិត្តពីលោកប៉ា សុជាតិវង្ស អភិបាលរាជធានីភ្នំពេញ តាមរយៈការផ្ដល់ប្រាក់ឧបត្ថម្ភបន្ថែមរហូតដល់ទៅ៣៤ម៉ឺនរៀលក្នុងមួយខែឬជិត១០០ដុល្លារក្នុងមួយខែ ។
ការផ្តល់ថវិកាលើកទឹកចិត្តបែបនេះត្រូវបាន លោកប៉ា សុជាតិវង្ស អភិបាលរាជធានីភ្នំពេញ ប្រកាសក្នុងពេលលោកអញ្ជើញជួបសំណេះសំណាលជាមួយកម្មករនៃមន្ទីរសាធារណការទាំងនោះនៅក្នុងបរិវេណសាលារាជធានីភ្នំពេញ កាលពីរសៀលថ្ងៃទី១៩ មិថុនា ។
នៅចំពោះមុខកម្មករទាំងនោះ លោកប៉ា សុជាតិវង្ស បានគូសបញ្ជាក់ថា ក្នុងនាមគណៈអភិបាលរាជធានីភ្នំពេញ លោកសូមប្រកាសផ្តល់ប្រាក់បន្ថែមពីលើប្រាក់ឧបត្ថម្ភប្រចាំខែចំនួន១០ម៉ឺនរៀលបន្ថែមទៀត ដែលកន្លងមកទទួលបានតែ២៤ម៉ឺនរៀលក្នុង១ខែប៉ុណ្ណោះ ។ នេះគឺមានន័យថា ចាប់ពីខែក្រោយនេះតទៅ បងប្អូនកម្មករនឹងបានទទួលប្រាក់ឧបត្ថម្ភក្នុងមួយខែ ៣៤ម៉ឺនរៀល ជាមួយនឹងការផ្តល់សម្លៀកបំពាក់ជាកម្មករមួយសម្រាប់បន្ថែមទៀតផងដែរ ។
លោក ប៉ា សុជាតិវង្ស បានមានប្រសាសន៍ទៀតថា ក្នុងនាមគណៈអភិបាលរាជធានីភ្នំពេញ ទោះបីជួបការលំបាក ក៏យើងខិតខំដោះស្រាយបន្ថែមប្រាក់ឧបត្ថម្ភ១០ម៉ឺនរៀលដល់បងប្អូនដែរ។ ថ្វីដ្បិតតែប្រាក់ឧបត្ថម្ភនេះមិនទាន់ឆ្លើយតបបានតាមសំណូមពរនៃសេចក្តីត្រូវការក្ដី ក៏យើងបានជួយបំពេញបន្ថែមដល់បងប្អូនបានមួយចំណែកដែរ ។ លោក អភិបាលរាជធានីបានថ្លែងអំណរគុណដោយស្មោះដល់បងប្អូនកម្មករ-កម្មការិនីទាំងអស់ដែលជាអ្នកអនុវត្តដោយផ្ទាល់ក្នុងការធ្វើឲ្យទីក្រុងរបស់យើងមានសម្រស់ស្រស់បំព្រងគ្រប់រដូវកាល ។
លោកប៉ា សុជាតិវង្ស បានបញ្ជាក់ថា បច្ចុប្បន្នបណ្តាទីក្រុងនានាលើពិភពលោក គេបានឈាន១ជំហានទៀតគឺចេញពីទីក្រុងស្អាត ទៅទីក្រុងបៃតង ។ មានន័យថា ជាទីក្រុងមាន អនាម័យល្អ មានសណ្តាប់ធ្នាប់ និងមានបរិស្ថានល្អ ហើយដើម្បីបានទីក្រុងបៃតង យើងនៅមានការងារច្រើនណាស់ដែលត្រូវធ្វើបន្ត ។ ការងារអ្វីក៏ដោយ ឲ្យតែស្របច្បាប់គឺមិនអន់នោះទេ បងប្អូនត្រូវតែមានមោទនភាពចំពោះការងាររបស់បងប្អូនដែលកំពុងធ្វើ ។ ជាមួយគ្នានេះបងប្អូនក៏ត្រូវមានមោទនភាពដែលយើងមានថ្នាក់ដឹកនាំដ៏ឈ្លាសវៃគឺសម្តេចអគ្គមហាសេនាបតីតេជោ ហ៊ុន សែន គឺសម្តេចបានដឹកនាំប្រទេសឲ្យឈ្នះទាំងអស់គ្នា ហើយបច្ចុប្បន្ននេះនយោបាយ ឈ្នះ=ឈ្នះ របស់សម្តេចតេជោបានក្លាយជារូបមន្តសកលដែលប្រទេសនានាគេយកទៅប្រើដែរជារូបមន្តដែលឈ្នះទាំងអស់គ្នា ។
លោក សាំ ពិសិទ្ធ នាយកមន្ទីរសាធារណការ និងដឹកជញ្ជូនបានឲ្យដឹងថា មន្ទីរសាធារណការមានមន្ត្រី បុគ្គលិក កម្មករសរុបចំនួន៨២៤នាក់ក្នុងនោះកម្មករបណ្តែតចំនួន៥២០នាក់ ស្រី១៤៦នាក់ ដោយចែកចេញជាអង្គភាពសួនច្បារ និងរុក្ខជាតិ អង្គភាពលូទឹក បូមទឹក អង្គភាពអគ្គិសនីបំភ្លឺសាធារណៈ អង្គភាពស្ពានថ្នល់ និងអង្គភាពគ្រប់គ្រងសណ្តាប់ធ្នាប់សាធារណៈ ៕
ចែករំលែកព័តមាននេះ