រាជធានីភ្នំពេញ ៖ យុវជនម្នាក់បានជិះម៉ូតូឌុបធ្វើដំណើរមកលោតសម្លាប់ខ្លួនពីលើស្ពានអាកាស៧មករា ដែលស្ថិតនៅក្នុងខណ្ឌទួលគោកដោយសារតែខឹងម្តាយស្តីបន្ទោស ។ ការលោតប៉ុនប៉ងធ្វើអត្តឃាតនេះបណ្តាលឱ្យរងរបួសជើងទាំងពីរត្រូវប៉ូលិសសែងដាក់ម៉ូតូបញ្ជូនទៅកាន់មន្ទីរពេទ្យព្រះកុសុមៈដែលនៅជិតនោះដើម្បីសង្គ្រោះ ។
រាជធានីភ្នំពេញ ៖ យុវជនម្នាក់បានជិះម៉ូតូឌុបធ្វើដំណើរមកលោតសម្លាប់ខ្លួនពីលើស្ពានអាកាស៧មករា ដែលស្ថិតនៅក្នុងខណ្ឌទួលគោកដោយសារតែខឹងម្តាយស្តីបន្ទោស ។ ការលោតប៉ុនប៉ងធ្វើអត្តឃាតនេះបណ្តាលឱ្យរងរបួសជើងទាំងពីរត្រូវប៉ូលិសសែងដាក់ម៉ូតូបញ្ជូនទៅកាន់មន្ទីរពេទ្យព្រះកុសុមៈដែលនៅជិតនោះដើម្បីសង្គ្រោះ ។ ការធ្វើអត្តឃាតនេះបានធ្វើឱ្យមានការភ្ញាក់ផ្អើលកាលពីវេលាម៉ោង៣រសៀលថ្ងៃទី២០ មិថុនា ខណៈពេលដែលនៅទីនោះសមត្ថកិច្ចដាក់ពង្រាយកងកម្លាំងនៅតាមដងមហាវិថីការពារក្បួនគណៈប្រតិភូ ។
យុវជនដែលគិតខ្លីនេះឈ្មោះជា វណ្ណធិរាជ អាយុ១៩ឆ្នាំ មានលំនៅភូមិទឹកថ្លា សង្កាត់ទឹកថ្លា ខណ្ឌសែនសុខ ។ តាមមន្រ្តីប៉ូលិសបានឱ្យដឹងថា នៅមុនពេលកើតហេតុ គេឃើញយុវជនរូបនោះបានដើរឡើងលើស្ពានអាកាស៧មករា ក្នុងទិសដៅពីកើតទៅលិច ។ នៅពេលឡើងដល់កណ្តាលស្ពានស្រាប់តែយុវជនរួបនោះបានលោតទម្លាក់ខ្លួនពីលើស្ពានមកក្រោម បណ្តាលឱ្យរបួសជើងទាំងពីរដេកស្តូកស្តឹងក្រោមស្ពាន ។ ភ្លាមៗប្រជាពលរដ្ឋរួមទាំងសមត្ថកិច្ចបាននាំគ្នារត់ទៅចោមរោមមើលជុំជិតធ្វើឱ្យមានការភ្ញាកផ្អើលយ៉ាងខ្លាំង ។
ដើម្បីចៀសវាងការកកស្ទះចរាចរណ៍ និងហៅរថយន្តសង្គ្រោះយូរពេក នគរបាលរដ្ឋបាលទឹកល្អក់ទី១ ខណ្ឌទួលគោកបាននាំគ្នាសែងលើកដាក់លើម៉ូតូបញ្ជូនទៅកាន់មន្ទីរពេទ្យដើម្បីសង្គ្រោះ។ នៅក្នុងមន្ទីរពេទ្យយុវជននោះបានឱ្យដឹងថា ការធ្វើអត្តឃាតនេះដោយសារតែខឹងម្តាយស្តីបន្ទោស ។ យុវជនឈាមរាវបាននិយាយថា ខ្លួនជាមនុស្សសេពគ្រឿងញៀន និងចេះតែដើរលេងមិនស្តាប់ដំបូន្មានឪពុកម្តាយ ។ គេនិយាយថា កាលពីថ្ងៃទី១៩ មិថុនា ម្តាយបានណែនាំ និងស្តីបន្ទោសពីរឿងដើរលេងនិងប្រើប្រាស់គ្រឿងញៀន ជាហេតុធ្វើឱ្យខ្លួនគិតខ្លីលែងចង់រស់ ។
នៅមុនពេលលោត រូបគេបានជិះម៉ូតូឌុបពីផ្ទះគោលបំណងមកលោតសម្លាប់ខ្លួនពីលើស្ពានអាកាស៧មករា ប៉ុន្តែមុនដាច់ចិត្តលោត គាត់បានទៅអង្គុយផឹកស្រាបៀរអស់៣កំប៉ុងនៅក្បែរស្ពាននោះ ។ លុះស្រវឹងស្រឿងៗចិត្តក៏មានក្លាហាន ហើយបានដើរឡើងលើស្ពានអាកាស៧មករា លោតសម្លាប់ខ្លួនតែម្តង តែមិនស្លាប់ ។
គ្រូពេទ្យបាននិយាយថា បន្ទាប់ពីថតមើលឃើញថា យុវជនរូបនេះមិនមានរបួសរហូតបាក់ជើងនោះទេ គ្រាន់តែគ្រិចប៉ុណ្ណោះ កម្ពស់ស្ពានដែលលោតមានប្រមាណជា៥ម៉ែត្រប៉ុណ្ណោះ ។
តាមបុរសជាឪពុកបានឱ្យដឹងថា កូនរបស់គាត់ជាមនុស្សញៀនថ្នាំ បានធ្វើបាបឪពុកម្តាយហើយគិតតែពីដើរលេង មិនគិតជួយធ្វើការផ្ទះនោះទេ ។ នៅពេលឪពុកម្តាយណែនាំ មិននឹកស្មានថាគេមកលោតសម្លាប់ខ្លួនបែបនេះឡើយ។ នេះជាលើកទី១ហើយដែលមានមនុស្សមកលោតសម្លាប់ខ្លួនពីលើស្ពានអាកាស៧មករានេះ។ កន្លងមកតាមប្រភពព័ត៌មានថា មានមនុស្សប៉ុនប៉ងលោតសម្លាប់ខ្លួនដែរពីលើស្ពានអាកាសនេះ តែត្រូវបានគេរារាំងទាន់ពេល ៕
ចែករំលែកព័តមាននេះ