ទីក្រុងវ៉ាស៊ីនតោន ៖ ឯកអគ្គរដ្ឋទូតចិននៅរដ្ឋធានីវ៉ាស៊ីនតោន លោក Cui Tiankai បាននិយាយកាលពីថ្ងៃអង្គារមកថា ប្រទេសចិនសង្ឃឹមថាអាចនឹងសម្រេចបានកិច្ចព្រមព្រៀងមួយដែលអាចកាត់បន្ថយភាពតានតឹងនៃសង្គ្រាមពាណិជ្ជកម្មជាមួយនឹងសហរដ្ឋអាមេរិក និងបានព្រមានពីផលប៉ះពាល់ធ្ងន់ធ្ងរ ប្រសិនបើមានការព្យាយាមបំបែកសេដ្ឋកិច្ចធំៗទាំងពីររបស់ពិភពលោក ។
លោកបានបន្តទៀតថា ប្រទេសចិន និងសហរដ្ឋអាមេរិកបានចែករំលែកទំនួលខុសត្រូវដើម្បីសហការសម្រាប់អត្ថប្រយោជន៍របស់សេដ្ឋកិច្ចពិភពលោក ។
លោកបានលើកឡើងពីសង្គ្រាមពាណិជ្ជកម្មទសវត្សរ៍ឆ្នាំ១៩៣០ ក្នុងចំណោមប្រទេសឧស្សាហកម្ម ដែលបានបង្កឲ្យការធ្វើពាណិជ្ជកម្មពិភពលោកដួលរលំ និងបង្កើនភាពតានតឹងមុនពេលសង្គ្រាមលោកលើកទីពីរ ។
ពេលដែលសួរទាក់ទិននឹងគំនិតរបស់លោកលើសង្គ្រាមពាណិជ្ជកម្មបច្ចុប្បន្ន លោកបានឆ្លើយមកថា លទ្ធផលមិនអាចស្មានទុកបានឡើយ ហើយសេដ្ឋកិច្ចទាំងពីរគួរតែខិតខំឲ្យអស់ពីសមត្ថភាពក្នុងការជៀសវាងវា។
លោក Cui បានបន្ថែមថា ប្រទេសចិនមិនចង់មានសង្គ្រាមពាណិជ្ជកម្មទេ និងចង់បានការចរចាលើដំណោះស្រាយ និងបានបន្តថា ៖«ពួកយើងមិនទទួលយកពេលដែលភាគីម្ខាងលើកឡើងពីតម្រូវការជាច្រើន ខណៈដែលភាគីម្ខាងទៀតត្រូវតែគោរពតាមទាំងអស់ »។
យ៉ាងណាក្តី ប្រភពនៅWhite House បានឲ្យដឹងថា នៅមានការខ្វែងគំនិតគ្នាច្រើនក្នុងរដ្ឋាភិបាលលោកប្រធានាធិបតីត្រាំទាក់ទិននឹងការដាក់សម្ពាធលើប្រទេសចិន ។
លើសពីនេះទៅទៀត លោក Larry Kudlow ប្រធានសេដ្ឋវិទូនៅ White House បាននិយាយកាលពីថ្ងៃអង្គារដែរថា លោកប្រធានាធិបតីត្រាំចង់មានកិច្ចព្រមព្រៀងពាណិជ្ជកម្មជាមួយនឹងប្រទេសចិន តែក៏បានត្រៀមខ្លួនរួចជាស្រេចក្នុងការបង្កើនពន្ធលើផលិតផលចិនជាដើម ប្រសិនបើភាគីទាំងពីរមិនអាចចរចាចេញដំណោះស្រាយបាននៅថ្ងៃសៅរ៍ជាមួយនឹងលោកប្រធានាធិបតីស៊ី ជិនពីង (Xi Jinping) នៅប្រទេសអាហ្សង់ទីនបាន ៕
ចែករំលែកព័តមាននេះ