ខេត្តកំពង់ស្ពឺ ៖ មនុស្ស៣នាក់បានរងរបួសស្រាលហើយត្រូវបានសមត្ថកិចបញ្ជូនទៅសង្គ្រោះនៅមន្ទីរពេទ្យបន្ទាប់ពីរថយន្តរបស់គេបានបុកបន្តកន្ទុយគ្នាជាច្រើនគ្រឿង ខណៈកំពុងបើកបរលើផ្លូវជាតិលេខ៤ តែហេតុការណ៍នេះមិនបង្កគ្រោះថ្នាក់ដល់អ្នកដទៃនោះទេ ។ គ្រោះថ្នាក់ចរាចរណ៍នេះកើតឡើងកាលពីវេលាម៉ោង០១នឹង៤៤នាទីរសៀល ថ្ងៃទី២៨ ខែវិច្ឆិកា ឆ្នាំ២០១៨ លើផ្លូវជាតិលេខ៤ ចន្លោះគីឡូម៉ែត្រ ៧៤-៧៥ ត្រង់ចំណុចភូមិកូនត្រុំ ឃុំអូរ ស្រុកភ្នំស្រួច ខេត្តកំពង់ស្ពឺ ។
សមត្ថកិច្ចបានអោយដឹងថា តាមការសាកសួរសាក្សីគឺមុនពេលកើតហេតុមានរថយន្ត១គ្រឿង ពណ៌ស គ្មានផ្លាកលេខ អ្នកបើកបរឈ្មោះ លី ហុង ភេទប្រុស អាយុ២៥ឆ្នាំ នៅភូមិស្ទឹងកណ្តៀត ឃុំកណ្តៀង ខេត្តពោធិ៍សាត់ បើកបរមកពីទិសខាងលិចទៅទិសខាងកើតមកដល់ចំណុចខាងលើបានបុករថយន្ត១គ្រឿងមិនស្គាល់ម៉ាកដែលបើកបរទិសស្របគ្នា ។
ស្របពេលនោះក៏មានរថយន្ត២គ្រឿងបានមកបុកបន្តគ្នាពីក្រោយគឺរថយន្តម៉ាកហ៊ីយ៉ាន់ដាយ ពណ៌ស ពាក់ផ្លាក លេខ ភ្នំពេញ 3C-8126 អ្នកបើកបរឈ្មោះ ឌី សុះរើន ភេទប្រុស អាយុ១៩ឆ្នាំ រស់នៅភូមិដំណាក់ត្រាច ឃុំដំបូករោង ស្រុកភ្នំស្រួច ខេត្តកំពង់ស្ពឺ និងរថយន្ដម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ភ្នំពេញ 3A-6311 អ្នកបើកបរឈ្មោះ សំអូនភេទប្រុស មិនស្គាល់ទីលំនៅដែលបើកបរស្របទិសគ្នា បណ្តាលអ្នកបើកបរទាំងបីរងរបួស្រាលត្រូវបានរថយន្តសង្គ្រោះមន្ទីរពេទ្យបង្អែកត្រពាំងក្រឡឹងដឹកយកទៅមន្ទីរពេទ្យបង្អែកខេត្តកំពង់ស្ពឺ ។
បន្ទាប់ពីកើតហេតុសមត្ថកិច្ចបានធ្វើកំណត់ហេតុវាស់វែងនាំយកវត្ថុតាងទាំងបីគ្រឿងបានយកទៅរក្សាទុកនៅអធិការដ្ឋាននគរបាលស្រុកភ្នំស្រួចដើម្បីចាត់ការតាមនីតិវិធី ៕
ចែករំលែកព័តមាននេះ