ខេត្តព្រះសីហនុ ៖ ស្ត្រីម្នាក់បានរួចផុតពីសេចក្តីស្លាប់ បន្ទាប់ពីបានលង់ទឹកកាលពីវេលាម៉ោង៥និង១០នាទីល្ងាចថ្ងៃទី២៨ វិច្ឆិកា ឆ្នាំ២០១៨ ត្រង់ចំណុចចុងឆ្នេរអារីស្តុន ស្ថិតក្នុងសង្កាត់លេខ៤ ក្រុងព្រះសីហនុ ហើយត្រូវបានប្រជាពលរដ្ឋធ្វើតំណើរតាមផ្លូវជួយទាន់ពេលវេលា។…
ខេត្តព្រះសីហនុ ៖ ស្ត្រីម្នាក់បានរួចផុតពីសេចក្តីស្លាប់ បន្ទាប់ពីបានលង់ទឹកកាលពីវេលាម៉ោង៥និង១០នាទីល្ងាចថ្ងៃទី២៨ វិច្ឆិកា ឆ្នាំ២០១៨ ត្រង់ចំណុចចុងឆ្នេរអារីស្តុន ស្ថិតក្នុងសង្កាត់លេខ៤ ក្រុងព្រះសីហនុ ហើយត្រូវបានប្រជាពលរដ្ឋធ្វើតំណើរតាមផ្លូវជួយទាន់ពេលវេលា។
យោងតាមប្រភពអំពីអ្នកជិតខាងស្ត្រីរងគ្រោះបានអោយដឹងថា នារីរងគ្រោះឈ្មោះ ស៊ួន ដាណែត អាយុ២៦ឆ្នាំ មុខរបរជាកម្មករសំណង់ក្បែរកន្លែងកើតហេតុ ។
ប្រភពដដែលបានបន្តថា នៅមុនពេលកើតហេតុ ស្ត្រីរងគ្រោះ បាននាំមិត្តប្រមាណ២ទៅ៣នាក់មកអង្គុយញាំស្រាក្បែរកន្លែងកើតហេតុតាំងពីថ្ងៃត្រង់រហូត
ដល់វេលាម៉ោងប្រមាណ៥ល្ងាច ហើយមិត្តភក្តិជាច្រើនរបស់នារីរងគ្រោះបានដើរចេញសំដៅទៅរោងស្នាក់នៅរៀងៗខ្លួន នៅសល់តែនារីរងគ្រោះ និងមិត្តរបស់នាងម្នាក់ប៉ុណ្ណោះដែលនៅអង្គុយបន្ត ។
លុះមួយសន្ទុះក្រោយមក នារីរងគ្រោះ និងមិត្តភក្តិរបស់នាងម្នាក់ទៀតក៏បានចុះទៅងូតទឹកសមុទ្រក្បែរកន្លែងអង្គុយញាំស្រាមិនបានប៉ុន្មាននាទីផង ស្រាប់តែគេបានឃើញស្ត្រីម្នាក់ក្នុងចំណោមពីរនាក់បានលើកដៃ និងស្រែកអោយគេជួយពួកនាង ។
ភ្លាមៗនោះ មនុស្សម្នាដែលនៅក្បែរនោះបានស្ទុះទៅជួយបានស្ត្រីម្នាក់ភ្លាមៗ រីឯនារីរងគ្រោះបានលិចទៅក្នុងទឹក ឃើញដូច្នេះយុវជនប្រមាណ៣ទៅ៤នាក់ ដែលធ្វើការជាមួយគ្នាបានហែលទៅជួយរាវរក ។
សំណាងល្អគាប់ជូនពេលនោះពុំមានខ្យល់បក់បោកដូចសព្វដង ទើបអាចរាវរកឃើញនារីរងគ្រោះភ្លាមៗផងដែរ ហើយបាននាំនាងយកមកដាក់លើគោកទាំងខ្លួនទន់រងៀកលែងដឹងខ្លួនទៅហើយ ។
ឃើញដូច្នេះ ស្ត្រីជាអ្នកដំណើរម្នាក់បានស្ទុះទៅជួយសង្គ្រោះបឋម ដោយធ្វើចលនាជីពចរចង្វាក់បេះដូង និងផ្លុំខ្យល់ រហូតនារីរងគ្រោះបានដឹងខ្លួន ដោយមិនបាច់បញ្ជូនទៅកាន់មន្ទីពេទ្យ។
ប្រភពដដែលបានបន្តថា នេះហៅថាមហាសំណាងហើយ ដែលមានអ្នកចេះជួយសង្គ្រោះបឋម ជួយទាន់ពេលវេលាកុំអី មិនដឹងទៅជាយ៉ាងណានោះទេ ៕
ចែករំលែកព័តមាននេះ