សម្តេច​នាយករដ្ឋមន្រ្តី​ ហ៊ុន សែន​ បានអំពាវនាវ​ដល់អង្គការជាតិ​-អន្តរជាតិ​ ដៃគូអភិវឌ្ឍន៏​ និង សមាគម​នានាផ្តល់នូវការ​គំាទ្រនិង​កិច្ចសហប្រតិបត្តិការ​ល្អ​ចំពោះ​សមាគម​អតីតយុទ្ឋជន​កម្ពុជា ដើម្បីឲ្យ​សមាគមនេះ​បន្តអភិវឌ្ឍន៏​របស់ខ្លួនថែមទៀត​ ។

សេចក្តីអំពាវនាវ​របស់សម្តេចអគ្គមហាសេនាបតីតេជោ​ ហ៊ុន សែន​ យ៉ាងដូច្នេះបានធ្វើ​ឡើងនៅព្រឹកថ្ងៃទី២០​ មិថុនា ​២០១៣នេះ​ នៅវិទ្យាស្ថានជាតិអប់រំ​ ក្បែរវិមាន​ឯករាជ្យ​ក្នុងឱកាសដែល​សម្តេចបានអញ្ជើញ​ជាអធិបតីភាព​ដ៏ខ្ពង់ខ្ពស់​ក្នុងពិធីអបអរសាទរ​ទិវាអតីតយុទ្ឋ​កម្ពុជាខួបលើកទី៦​ ។

ក្នុងឱកាសនោះដែរ​សម្តេចតេជោ​ ហ៊ុន សែន​ ក៏បានផ្តល់នូវអនុសាសន៏​ចំនួន០៩ចំណុច​ដល់ក្រសួងសង្គមកិច្ច​ការងារ អតីតយុទ្ឋជន ​និង យុវនីតិសម្បទា ​ដូចជាស្នើឲ្យ​អតីត​យុទ្ឋជន​កម្ពុជាទំាងអស់​ ត្រូវបន្តប្រកាន់ខ្ជាប់នូវវីរភាព​អង់អាចក្លាហាន​ ស័ក្តិសមជាកុលបុត្រ​ដ៏ឆ្នើមរបស់ជាតិមាតុភូមិ​ និងមានស្មារតីវីរភាពជាគំរូល្អ​ក្នុងសង្គមជាតិ ទោះជាបច្ចុប្បន្នក្លាយ​ជាអតីតយុទ្ឋជន​ក៏ដោយ និង ត្រូវបន្តជំរុញការអនុវត្ត​គោលនយោបាយ​ផ្តល់សម្បទានដីសង្គមកិច្ច​ជូនអតីតកងកម្លំាង​ប្រដាប់អាវុធ ​ក៏ដូចជាបន្តអភិវឌ្ឍ​លំនៅឋាន​គ្រួសារយោធិន​នៅតាមបណ្តោយ​ព្រំដែនខាងលិច​ជាដើម​ ៕