ខេត្តបាត់ដំបង ៖ បុរសវ័យចំណាស់ម្នាក់ បានយកសាំងចាក់ស្រោចដុតសម្លាប់ខ្លួន ហើយបានឆេះទាំងផ្ទះអស់គ្មានសល់ កាលពីវេលាម៉ោងជាង១២ថ្ងៃត្រង់ថ្ងៃទី២៧ វិច្ឆិកា ស្ថិតនៅចំណុចភូមិបរិបូណ៍ ឃុំស្ដៅ ស្រុករតនមណ្ឌល ដែលគេសង្ស័យថា បណ្ដាលមកពីភ្លើងប្រចណ្ឌជាមួយប្រពន្ធ ដោយគ្មានហេតុផល ។
សមត្ថកិច្ចបានឲ្យដឹងថា បុរសខាងលើ ឈ្មោះចាន់ ចៀន អាយុ៦៨ឆ្នាំ មានប្រពន្ធឈ្មោះជា សារឿយ អាយុ៥៧ឆ្នាំ ជាកសិករ រស់នៅចំណុចកើតហេតុ ។ ជនរងគ្រោះបានយកសាំងចាក់លើខ្លួនដុត បណ្ដាលឱ្យឆេះស្លាប់ទាំងមនុស្ស និងឆេះអស់ទាំងផ្ទះទៀត ។
សមត្ថកិច្ចបានប្រាប់ថា បើតាមការសួរនាំខ្លះៗពីមូលហេតុនេះ គឺបុរសជាប្ដីតែងផឹកស៊ីស្រវឹង រួចបង្កជម្លោះជាមួយប្រពន្ធនិងអ្នកក្បែរខាង ស្ទើររាល់ថ្ងៃ ។ មិនតែប៉ុណ្ណោះ បុរសនេះចំណាស់រូបនេះកើតរោគប្រចណ្ឌប្រពន្ធទៀត ទើបជ្រើសរើសយកផ្លូវធ្វើអត្តឃាតខ្លួនឯង ដើម្បីបញ្ចប់បញ្ហាគ្រប់យ៉ាង ដែលអ្នកខ្លះថា ជាការជ្រើសរើសបែបល្ងង់ខ្លៅ ។
បើតាមសាក្សីនៅក្បែរនោះ បាននិយាយថា មានពេលតិចតួចណាស់ដែលថា ជននេះមិនផឹកស្រវឹង ។ ពេលស្រវឹងម្ដងៗ ជននេះតែងបង្កជម្លោះជាមួយប្រពន្ធគ្រប់ពេល មិនដឹងមកពីមូលហេតុអ្វីឱ្យប្រាកដនោះទេ ។តែបើតាមការសង្កេត និងតាមការបំភ្លឺពីប្រពន្ធផង គឺជននេះកើតរោគប្រចណ្ឌប្រពន្ធ ដោយគ្មានហេតុផល។
តាមការស្រង់សម្តីប្រពន្ធជនរងគ្រោះបាននិយាយទៀតថា មុនពេលកើតហេតុ ខ្លួននិងប្ដីបានជិះម៉ូតូឌុបគ្នាធម្មតា មកពីស៊ីឈ្នូលបេះសណ្ដែកឱ្យគេ ។ ពេលដល់ផ្ទះ ស្រាប់តែប្ដីចាប់ផ្ដើមបង្កជម្លោះដូចសព្វដងទៀត។ ពេលនោះដោយសារធុញទ្រាន់នឹងជម្លោះនេះពេក គាត់ក៏ដើរចេញពីផ្ទះ ដើម្បីចៀសវាង កុំឱ្យកើតមានបញ្ហាច្រើន ។ ប៉ុន្តែក្រោយពីគាត់ដើរចេញផុតបន្តិចក្រោយមក ប្ដីគាត់ចាក់សាំងដុតខ្លួនស្លាប់ ហើយឆេះទាំងផ្ទះអស់ទៀត ទើបមានការផ្អើលឆោឡោតែម្ដង ។
សមត្ថកិច្ចចុះអន្តរាគមន៍ក្នុងហេតុការណ៍នេះនិយាយថា មុនពេលធ្វើអត្តឃាតនេះ ជនរងគ្រោះក៏បានបង្កជម្លោះជាមួយអ្នកជិតខាង ដូចទម្លាប់សព្វដងអុីចឹង ។ ប៉ុន្តែ ទំនងដោយសារខឹងប្រពន្ធដើរចេញពីផ្ទះបាត់ ហើយថែមទាំងរោគប្រច័ណ្ឌរើឡើងកាន់តែខ្លាំងទៀត ទើបបុរសនេះសម្រេចបញ្ចប់បញ្ហា តាមរយៈធ្វើអត្តឃាតបំផ្លាញទាំងទ្រព្យ ស្លាប់ទាំងខ្លួនតែម្ដង។
ចែករំលែកព័តមាននេះ