រាជធានីភ្នំពេញ ៖ ក្រុមគ្រួសារយោធិនពិការប្រមាណ៣០នាក់បានសម្រេចចិត្តត្រៀមដុតកង់រថយន្ត និងសាំងចំនួន២កាន ដើម្បីធ្វើការប្រឆាំងជំទាស់នឹងសមត្ថកិច្ចចម្រុះ ដែលគ្រោងចុះមកអនុវត្តសាលដីការបស់តុលាការកំពូល ដោយពួកគាត់ចាត់ទុកថា អយុត្តិធម៌សម្រាប់ពួកគាត់នៅក្នុងទំនាស់ដីធ្លីដ៏ចម្រូងចម្រាសមួយ រវាងឪពុកមា ដែលជាអនុរដ្ឋលេខាធិការក្រសួងរៀបចំដែនដីនគរូបនីយកម្មនិងសំណង់…
រាជធានីភ្នំពេញ ៖ ក្រុមគ្រួសារយោធិនពិការប្រមាណ៣០នាក់បានសម្រេចចិត្តត្រៀមដុតកង់រថយន្ត និងសាំងចំនួន២កាន ដើម្បីធ្វើការប្រឆាំងជំទាស់នឹងសមត្ថកិច្ចចម្រុះ ដែលគ្រោងចុះមកអនុវត្តសាលដីការបស់តុលាការកំពូល ដោយពួកគាត់ចាត់ទុកថា អយុត្តិធម៌សម្រាប់ពួកគាត់នៅក្នុងទំនាស់ដីធ្លីដ៏ចម្រូងចម្រាសមួយ រវាងឪពុកមា ដែលជាអនុរដ្ឋលេខាធិការក្រសួងរៀបចំដែនដីនគរូបនីយកម្មនិងសំណង់ និងក្មួយជីដូនមួយ ដែលជាយោធិនពិការ ។
ការភ្ញាក់ផ្អើលពីគម្រោងធ្វើការតវ៉ាប្រឆាំងសាលដីកាតុលាការនេះ បានកើតមាននៅវេលាម៉ោងប្រមាណ៨ព្រឹកថ្ងៃទី២៧ ខែវិច្ឆិកា នៅចំណុចតាមផ្លូវជាតិលេខ៥ ក្នុងភូមិឌួង សង្កាត់ព្រែកព្នៅ ខណ្ឌព្រែកព្នៅ ។ ទោះបីជាយ៉ាងណា សមត្ថកិច្ចក៏បានលើកពេលវិញដែរ ដោយខ្លាចមានការប៉ះទង្គិចគ្នា ជាយថាហេតុណាមួយធ្វើឱ្យរឿងក្តីនេះកាន់តែធ្ងន់ធ្ងរ និងកាន់តែវែងឆ្ងាយ ។
តាមព័ត៌មានបានឲ្យដឹងថា នៅវេលាម៉ោងប្រមាណ៨ និង៣០នាទីព្រឹកថ្ងៃទី២៧ ខែវិច្ឆិកា កម្លាំងចម្រុះដែលដឹកនាំដោយលោក ហ៊ឹង ប៊ុនថន ព្រះរាជអាជ្ញារង អមសាលាដំបូងរាជធានីភ្នំពេញ និងជាមន្ត្រីទទួលបន្ទុកកិច្ចការអាជ្ញាសាលាគ្រោងចុះមកអនុវត្តន៍ សាលដីកាលេខ៨៨«ខ»ចុះថ្ងៃទី១៣ ខែមីនា ឆ្នាំ២០១៨ ក្នុងសំណុំរឿងរដ្ឋប្បវេណីលេខ១៨ចុះថ្ងៃទី៥ ខែមិថុនា ឆ្នាំ២០១៧ រវាងដើមចោទឈ្មោះ កើត សារ៉េត ភេទប្រុស អាយុ៥១ឆ្នាំ ដែលគេស្គាល់ថា ជាអនុរដ្ឋលេខាធិការ ក្រសួងរៀបចំដែនដីនគរូបនីយកម្មនិងសំណង់ មានលំនៅផ្ទះលេខ១៣អា សង្កាត់បឹងកក់ទី១ ខណ្ឌទួលគោក និងចុងចម្លើយឈ្មោះ មាស សុផាត ហៅកុយ ភេទប្រុស អាយុ៥៣ឆ្នាំ (ជាយោធិនពិការជាអ្នកចាញ់ក្តីនិងត្រូវជាក្មួយ) ។
តាមព័ត៌មានឲ្យដឹងទៀតថា នៅព្រឹកនោះក្រុមគ្រួសារអ្នកចាញ់ក្តី ក៏បានប្រមូលផ្តុំបងប្អូនកូនចៅប្រមាណ៣០នាក់ និងបានត្រៀមកង់រថយន្ត និងប្រេងសាំង ដើម្បីធ្វើការតវ៉ាប្រឆាំងដោយនាំគ្នាស្រែកថា«អយុត្តិធម៌»ព្រមទាំងមានការសរសេរបដាធ្វើការអំពាវនាវដល់សម្តេចតេជោនាយករដ្ឋមន្ត្រី និងលោកឧបនាយករដ្ឋមន្ត្រី ជា សុផារ៉ា និងជារដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ដើម្បីឲ្យជួយអន្តរាគមន៍ផងដែរ ។
តាមលោក មាស សុផាត ដែលជាយោធិនពិការនិងជាអ្នកចាញ់ក្តីបានអះអាងថា ដីនេះត្រូវបានឪពុកមា (ជាបងប្អូនជីដូនមួយ) ឈ្មោះ កើត សារ៉េត ដែលបច្ចុប្បន្នជាអនុរដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ បានហៅឲ្យមកស្នាក់នៅលើដីរបស់គាត់ផ្នែកខាងមុខ ទំហំប្រមាណជាង៤០អា តាំងពីឆ្នាំ១៩៩២ ។ បន្ទាប់ពីស្នាក់នៅគាត់ក៏បានកាន់កាប់ដីថែរក្សាផ្នែកខាងក្រោយដែលជាដីបឹង និងព្រៃប្រមាណជិត២ហិកតា ។
លុះក្រោយមកឪពុកមារូបនេះ ក៏បានបបួលគាត់លក់ដីនោះចូលគ្នា ហើយក៏បានឲ្យគេចុះវាស់វែង ស្រាប់តែឪពុកមាបានលួចធ្វើប្លង់រំលោភយកដីរបស់គាត់ទាំងអស់តែម្តង និងបានប្តឹងប្តល់ដេញគាត់និងក្រុមគ្រួសារឲ្យចេញពីដីនោះ រហូតដល់ឈ្នះនៅតុលាការកំពូល ហើយគ្រោងមកអនុវត្តសាលដីកានៅពេលនោះ ។លោក មាស សុផាត ក៏បានស្រែកថា អយុត្តិធម៌ណាស់ ហើយគាត់ពុំព្រមចាកចេញនោះទេ សុខចិត្តស្លាប់លើដីនេះ ។
ទោះបីជាយ៉ាងណា ការបរិយាយខាងលើនេះជាសម្តីភាគីម្ខាង ដែលអ្នកយកព័ត៌មានយើងពុំអាចស្វែងរកការបំភ្លឺពីភាគីអ្នកឈ្នះក្តីបាននៅឡើយទេ ។ ដោយសារតែមានការពុះកញ្ជ្រោលពីសំណាក់អ្នកចាញ់ក្តីនៅព្រឹកថ្ងៃដដែលនេះ សមត្ថកិច្ចក៏បានលើកពេលអនុវត្តសាលដីកាវិញ តែមិនដឹងថានឹងធ្វើនៅពេលណាទៀតនោះឡើយ ៕
ចែករំលែកព័តមាននេះ