ខេត្តបន្ទាយមានជ័យ ៖ លោកឧត្តមសេនីយ៍ទោ រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថខេត្ត កាលពីព្រឹកថ្ងៃទី១៨ មិថុនា បានប្រមូលកងកម្លាំងនៃកងរាជអាវុធហត្ថ ក្រោមឱវាទ ដែលដុះក្បាលពោះយោងខ្លួនមិនចង់រួចនោះឱ្យតម្រង់ជួរក្នុងទីបញ្ជាការដ្ឋាន ។ ពិធីប្រមូលមកតម្រង់ជួរនេះ លោកបានដាក់វិធានការយ៉ាងតឹងរឹងចំពោះកងកម្លាំងក្រោមឱវាទដែលដុះក្បាលពោះកំប៉េងកំបោ៉ង និងឡើងទម្ងន់ខុសប្រក្រតីនេះដែលមានចំនួន១១៤នាក់ ក្នុងចំណោមជាង៣០០នាក់ ឱ្យហ្វឹកហាត់ដើម្បីឱ្យសម្រកទាំងក្បាលពោះ និងទម្ងន់រយៈពេល៦ខែ ឱ្យបានសម្រេច ដោយចាប់ផ្តើមពីថ្ងៃទី១៨ មិថុនា
តទៅ ។
លោកឧត្តមសេនីយ៍ទោ រ័ត្ន ស្រ៊ាង បានថ្លែងថា កងកម្លាំងដែលដុះក្បាលពោះ និងឡើងទម្ងន់ធាត់កន្ទ្រេលកន្ទ្រលបែបនេះមិនសមជាកងកម្លាំងមានសមត្ថកិច្ចនោះទេ ។ កងកម្លាំងគ្រប់រូបមិនអាចមានដុះក្បាលពោះ និងឡើងទម្ងន់បានឡើយ ។ ផ្ទុយទៅវិញ កងកម្លាំងប្រដាប់អាវុធត្រូវមានភាពស្វាហាប់រឹងមាំ និងភាពរវៀសរវៃជាមួយនឹងការងារ ការពារសន្តិសុខជូនប្រជាពលរដ្ឋ និងប្រទេសជាតិ ។ លោកឧត្តមសេនីយ៍ទោ រ័ត្ន ស្រ៊ាង បាននិយាយដាស់តឿនកងកម្លាំងដុះក្បាលពោះធំៗទៀតថា កងកម្លាំងដែលមានដុះក្បាលពោះ និងឡើងទម្ងន់ គឺពិតជាមិនស្រួលក្នុងការបំពេញការងារនោះទេ ហើយសុខភាពក៏ប្រឈមទៅនឹងផលលំបាកសព្វបែបយ៉ាង គឺមានន័យថា ខ្លួនមិនចេះស្រឡាញ់ខ្លួន ហើយប្រឈមទៅនឹងជំងឺលើសឈាម និងទឹកនោមផ្អែម នឹងឈានទៅបាត់បង់សមត្ថភាពការងារមិនខានឡើយ ។
លោក ដាស់ តឿន ថា ដើម្បីជាវិធានការទប់ទល់នឹងជំងឺទាំងនេះ គឺយើងទាំងអស់គ្នាត្រូវប្តេជ្ញាថា ត្រូវតែខិតខំហ្វឹកហាត់សម្រកទម្ងន់ដើម្បីសម្រកក្បាលពោះ កុំឱ្យកើតជំងឺផ្សេងៗទៀតទៅអនាគត ។ លោកឧត្តមសេនីយ៍ទោ បានណែនាំយ៉ាងមឺុងម៉ាត់ទៀតថា ទុកពេលឱ្យហាត់ដោយខ្លួនឯង ហើយរយៈពេល៦ខែ លោកធ្វើការត្រួតពិនិត្យម្តង ។ បើកងកម្លាំងណាម្នាក់មិនបានបញ្ចុះទម្ងន់ទេនោះ លោកនឹងឱ្យគ្រូមកហ្វឹកហាត់ផ្ទាល់តែម្តង ។ ហើយវិធានការសម្រកក្បាលពោះ នឹងបញ្ចុះទម្ងន់នេះ គឺចាប់អនុវត្តពីពេលនេះតទៅ ។ នេះជាការកត់សម្គាល់លើកដំបូងហើយ សម្រាប់វិធានការបែបនេះដែលនឹងក្លាយទៅជាគំរូល្អនៅតាមអង្គភាពសមត្ថកិច្ចនានាទូទាំងប្រទេសផងដែរ ដែលមានមន្ត្រីកងកម្លាំងខ្លះដុះក្បាលពោះឡើងកន្រ្ទលដើរធ្វើការយោងខ្លួន មិនចង់រួច ពិបាកក្នុងការបំពេញការងារ ពិសេស គេសង្កេតឃើញក្រុមប៉ូលិសចរាចរតែម្តង ៕
ចែករំលែកព័តមាននេះ