រាជធានីភ្នំពេញ ៖ សម្តេចវិបុលសេនា ភក្តីសាយឈុំ ប្រធានព្រឹទ្ធសភាបានអះអាងថា កម្ពុជាបានត្រៀមខ្លួនជានិច្ច ក្នុងការធ្វើកិច្ចសហប្រតិបត្តិការដ៏ជិតស្និទ្ធជាមួយសាធារណរដ្ឋប្រជាធិបតេយ្យប្រជាមានិតឡាវ ។ ការប្រកាសជំហររបស់ប្រមុខដឹកនាំព្រឹទ្ធសភា ធ្វើឡើងខណៈដែលប្រធានព្រឹទ្ធសភានៃព្រះរាជាណាចក្រកម្ពុជាបានអនុញ្ញាតឱ្យលោក…
រាជធានីភ្នំពេញ ៖ សម្តេចវិបុលសេនា ភក្តីសាយឈុំ ប្រធានព្រឹទ្ធសភាបានអះអាងថា កម្ពុជាបានត្រៀមខ្លួនជានិច្ច ក្នុងការធ្វើកិច្ចសហប្រតិបត្តិការដ៏ជិតស្និទ្ធជាមួយសាធារណរដ្ឋប្រជាធិបតេយ្យប្រជាមានិតឡាវ ។
ការប្រកាសជំហររបស់ប្រមុខដឹកនាំព្រឹទ្ធសភា ធ្វើឡើងខណៈដែលប្រធានព្រឹទ្ធសភានៃព្រះរាជាណាចក្រកម្ពុជាបានអនុញ្ញាតឱ្យលោក Amphay KINDAVONG ឯកអគ្គរដ្ឋទូតវិសាមញ្ញ និងពេញសមត្ថភាពថ្មីនៃសាធារណរដ្ឋប្រជាធិបតេយ្យប្រជាមានិតឡាវប្រចាំព្រះរាជាណាចក្រកម្ពុជាចូលជួបសម្តែងការគួរសមនាព្រឹកថ្ងៃទី២៧ វិច្ឆិកា នៅវិមានព្រឹទ្ធសភា ។ នៅក្នុងឱកាសនោះលោក Amphay KINDAVONG បានថ្លែងអំណរគុណយ៉ាងជ្រាលជ្រៅចំពោះសម្តេចប្រធានព្រឹទ្ធសភាដែលបានចំណាយពេលវេលាដ៏មានតម្លៃអនុញ្ញាតឲ្យឯកឧត្តមចូលជួបសម្តែងការគួរសមនាពេលនេះ ។
លោកបានសម្តែងនូវការកោតសរសើរ និងវាយតម្លៃខ្ពស់ចំពោះការរីកចម្រើនយ៉ាងឆាប់រហ័ស លើគ្រប់វិស័យរបស់ប្រទេសកម្ពុជា ដោយសារតែមានការរៀបចំយុទ្ធសាស្ត្រគ្រប់ជ្រុងជ្រោយរបស់រាជរដ្ឋាភិបាល ក្រោមការដឹកនាំរបស់សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ លោកទូតក៏បង្ហាញសេចក្តីសង្ឃឹមថា ប្រទេសទាំងពីរនឹងមានទំនាក់ទំនង និងកិច្ចសហប្រតិបត្តិការល្អលើវិស័យទេសចរណ៍ និងវិនិយោគ ក្នុងនាមជាប្រទេសដែលមានភូមិផងរបងជាប់មួយគ្នា ។
ជាមួយគ្នានេះលោកបញ្ជាក់ថា ចំពោះវិស័យពាណិជ្ជកម្មនៃប្រទេសទាំងពីរមានភាពប្រហាក់ប្រហែលគ្នា ប៉ុន្តែប្រទេសកម្ពុជាមានការនាំចេញច្រើនជាងប្រទេសឡាវហេតុដូចនេះឯកឧត្តមមានបំណងចង់ស្វែងយល់អំពីការនាំចេញរបស់ប្រទេសកម្ពុជា ដើម្បីយកទៅផ្សព្វផ្សាយនៅប្រទេសឡាវ ។ លោក៏បានបញ្ជាក់ជូនសម្តេចប្រធានព្រឹទ្ធសភាថា លោកបានត្រៀមលក្ខណៈរួចជាស្រេច ដើម្បីត្រៀមរៀបចំទទួលដំណើរទស្សនកិច្ចជាផ្លូវការរបស់សម្តេចតេជោ ហ៊ុនសែន នៅសាធារណរដ្ឋប្រជាធិបតេយ្យប្រជាមានិតឡាវ នៅដើមខែធ្នូខាងមុខនេះ ។ លោកបញ្ជាក់បន្ថែមថា «តាមរយៈដំណើរទស្សនកិច្ចនេះខ្ញុំសង្ឃឹមថានឹងមានកិច្ចសហប្រតិបត្តិការរវាងរដ្ឋាភិបាល និងប្រជាជននៃប្រទេសទាំងពីរកាន់តែប្រសើរឡើងថែមទៀត» ។
ក្នុងជំនួបនោះដែរ សម្តេចប្រធានព្រឹទ្ធសភាមានជំនឿជាក់ថា លោកទូតនឹងខិតខំរួមចំណែកពង្រឹងពង្រីកទំនាក់ទំនង មិត្តភាព និងកិច្ចសហប្រតិបត្តិការរវាងប្រជាជន និងប្រទេសទាំងពីរឱ្យកាន់តែល្អប្រសើរឡើងថែមទៀត ដើម្បីនាំមកនូវផលប្រយោជន៍ទៅវិញទៅមកសម្រាប់ប្រជាជន និងប្រទេសទាំងពីរ ។ សម្តេចប្រធានព្រឹទ្ធសភាបានជម្រាបជូនអំពីការរីកចម្រើន និងការទទួលបានជ័យជម្នះក្នុងការបោះឆ្នោតក្នុងពេលកន្លងទៅនេះ និងវាយតម្លែខ្ពស់ចំពោះទំនាក់ទំនងសាមគ្គីភាពមិត្តភាព និងកិច្ចសហប្រតិបត្តិការលើគ្រប់វិស័យបានយ៉ាងល្អរវាងប្រទេសទាំងពីរកម្ពុជា-ឡាវ ។
ជាមួយគ្នានេះដែរក្នុងក្របខណ្ឌស្ថាប័ននីតិប្បញ្ញត្តិកម្ពុជា-ឡាវក៏មានកិច្ចសហប្រតិបត្តិការល្អគួរជាទីមោទនៈដោយបានធ្វើការផ្លាស់ប្តូរទស្សនកិច្ចទៅវិញទៅមកជាញឹកញាប់ ការចូលរួមប្រជុំទៀងទាត់រវាងសភាប្រទេសទាំង៣ (កម្ពុជា ឡាវ និងវៀតណាម CLV) ព្រមទាំងគាំទ្រគ្នាលើកិច្ចសហប្រតិបត្តិការអន្តរជាតិ ក្នុងក្របខណ្ឌ AIPA IPU និងAPPF ។ សម្តេចប្រធានព្រឹទ្ធសភាបានគូសបញ្ជាក់ថា ព្រឹទ្ធសភា រដ្ឋសភា រាជរដ្ឋាភិបាលក្រសួងស្ថាប័នជាតិនៃព្រះរាជាណាចក្រកម្ពុជាត្រៀមខ្លួនជានិច្ច ដើម្បីធ្វើកិច្ចសហប្រតិបត្តិការដ៏ជិតស្និទ្ធជាមួយនឹងឯកឧត្តមឯកអគ្គរដ្ឋទូតក៏ដូចជា ស្ថានទូតឡាវប្រចាំព្រះរាជាណាចក្រកម្ពុជា ដើម្បីលើកកម្ពស់ទំនាក់ទំនងកិច្ចសហប្រតិបត្តិការ និងនាំផលប្រយោជន៍ដ៏ធំធេងសម្រាប់ប្រជាជន និងប្រទេសទាំងពីរ ៕
ចែករំលែកព័តមាននេះ