ខេត្តសៀមរាប ៖ ការអុំប្រណាំង ក្រឡោ ដោយកុមារា-កុមារីចំនួន៦គូ គឺជាជ្រុងមួយនៃចំណាប់អារម្មណ៍ របស់ភ្ញៀវជាតិ-អន្តរជាតិក្នុងពិធីប្រណាំងទូក.ងនាដងស្ទឹងសៀមរាប ឆ្នាំ២០១៨ ដែលការអុំប្រណាំងក្រឡោនេះ គឺជាការប្រណាំងគូកិត្តិយស…
ខេត្តសៀមរាប ៖ ការអុំប្រណាំង ក្រឡោ ដោយកុមារា-កុមារីចំនួន៦គូ គឺជាជ្រុងមួយនៃចំណាប់អារម្មណ៍ របស់ភ្ញៀវជាតិ-អន្តរជាតិក្នុងពិធីប្រណាំងទូក.ងនាដងស្ទឹងសៀមរាប ឆ្នាំ២០១៨ ដែលការអុំប្រណាំងក្រឡោនេះ គឺជាការប្រណាំងគូកិត្តិយស ។
តាមការបញ្ជាក់របស់អនុគណកម្មការរៀបចំការប្រណាំងទូក.ងខេត្តសៀមរាបបានលើកឡើងថា នេះគឺជាការរំលឹកដល់កូនខ្មែរគ្រប់រូប មានការចងចាំវត្តមាន ក្រឡោ ដែលជាឧបករណ៍បុរាណមានប្រយោជន៍ប្រើប្រាស់ច្រើនយ៉ាង ក្នុងជីវភាពរស់នៅរបស់ប្រជានេសាទ នៃតំបន់បឹងទន្លេសាប ខេត្តសៀមរាប ។
មន្ត្រីនៃមន្ទីរវប្បធម៌ និងវិចិត្រសិល្បៈខេត្តសៀមរាប ដែលបានលើកយកការអុំប្រណាំងក្រឡោនេះ មកដាក់ចូលជាកិត្តិយសក្នុងពិធីប្រណាំងទូក.ងខេត្តសៀមរាប ពុំបានបញ្ចាក់ច្បាស់ទេ អំពីកាលសម័យនៃការប្រើប្រាស់ក្រឡោនោះ ប៉ុន្តែគេបានឲ្យដឹងថា ក្នុងសម័យកាលយូរណាស់មកហើយដែរ នៅតំបន់ចុងឃ្នៀស នៃបឹងទន្លេសាប ប្រជានេសាទបានប្រើប្រាស់ក្រឡោនេះជាមធ្យបាយ ធ្វើដំណើរជិតៗ ពីផ្ទះមួយទៅផ្ទះមួយ ។
ការធ្វើក្រឡោ គេធ្វើអំពីបន្ទះឬស្សី ត្បាញដោយដៃ មានអង្កត់ផ្ចិតពី ១ម៉ែត្រទៅ១ម៉ែត្រ២តឹក ហើយក្រោយពីត្បាញរួច គេប្រើជ័រចុង និងជ័រទឹក លាបទាំងខាងក្នុងនឹងខាងក្រៅ ដើម្បីកុំឲ្យជ្រាបទឹក តែដោយការរីកចម្រើនរបស់សង្គម ឧបករណ៍ថ្មីៗទំនើបទាន់ សម័យត្រូវបានផលិតចេញមក ទៅតាមតម្រូវការទីផ្សារប្រើប្រាស់ ដូចជាចានដែក ចានជ័រធំៗជាដើម ។
បច្ចុប្បន្ននេះ ក្រឡោ ត្រូវបានគេបំភ្លេចចោលដោយមិនដឹងខ្លួន បើទោះជាយ៉ាងណាក៏ដោយ ថ្វីបើមានការវិវត្តន៍ទៅតាមសម័យកាលនៃការប្រើប្រាស់ក្រឡោក៏ដោយ តែក៏មិនអាចបំភ្លេចបានគុណប្រយោជន៍ ក្រឡោ ដែលស្ថិតនៅជាមួយជីវភាពរស់នៅរបស់បងប្អូនប្រជានេសាទ ក្នុងសម័យកាលមុននោះឡើយ ៕
ចែករំលែកព័តមាននេះ