ខេត្តព្រះសីហនុ ៖ កន្លងមកថ្មីៗនេះបន្ទាប់ពីលំហូរចូលការវិនិយោគដូចទឹកបាក់ទំនប់លើវិស័យផ្សេងៗទាំងការវិនិយោគបែបធុនតូច ធុនមធ្យម និងការវិនិយោគធុនធំជនជាតិចិនមកកាន់ខេត្តព្រះសីហនុដោយមានការលើកតម្លើងស្លាកយីហោ នៅក្រុមហ៊ុន ឬនៅតាមកន្លែងប្រកបអាជីវកម្មមួយចំនួនរបស់ជនជាតិចិន នៅក្នុងខេត្តធ្វើឡើងបែបមិនរៀបរយធ្វើឲ្យអាជ្ញាធរងការការរិះគន់យ៉ាងចាស់ដៃតាមបណ្តាញព័ត៌មានសង្គមហ្វេសប៊ុក ។
ជាក់ស្តែង កាលពីព្រឹកថ្ងៃទី២១ ខែវិច្ឆិកា ឆ្នាំ២០១៨ កន្លងមកនេះស្លាកយីហោមួយផ្ទាំងធំសរសេរជាអក្សរខ្មែរ និងអក្សរចិនថា (ទីក្រុងកម្សាន្តក្វាងទុង) ដែលជនជាតិចិនបានយកទៅចងភ្ជាប់លើផ្ទាំងប៉ាណូ ដើម្បីផ្សព្វផ្សាយ និងបង្អួតដល់ភ្ញៀវទេសចរណ៍ជាតិ អន្តរជាតិនៅតាមបណ្តោយផ្លូវជាតិលេខ០៤ ត្រង់ចំណុចផ្លូវបំបែកចំណោតចុះទៅវត្តអូរត្រេះ ស្ថិតក្នុងភូមិ សង្កាត់លេខ០១ ក្រុង-ខេត្តព្រះសីហនុ ត្រូវបានលោក យន្ត មីន អភិបាលនៃគណៈអភិបាលខេត្តបញ្ជាឲ្យរដ្ឋបាលសាលាក្រុងព្រះសីហនុ មន្ទីរវប្បធម៌ និងវិចិត្រសិល្បៈខេត្តចុះធ្វើការរុះរើចេញវិញភ្លាមៗបន្ទាប់ពីមានការរិះគន់តាមបណ្តាញព័ត៌មានសង្គម ។
ប្រជាពលរដ្ឋនៅក្នុងខេត្តព្រះសីហនុក៏ដូចជា ភ្ញៀវទេសចរណ៍ជាតិបាននាំគ្នារិះគន់ថា ការលើកតម្លើងស្លាកយីហោរបស់ជនជាតិចិនដែលមករកស៊ីនៅក្នុងព្រះរាជាណាចក្រកម្ពុជា គួរតែមានការត្រួតពិនិត្យផ្នែកផ្លូវច្បាប់ និងមានការឯកភាពពីរមន្ទីរជំនាញពាក់ព័ន្ធអាជ្ញាធរគ្រប់លំដាប់ថ្នាក់ក្នុងន័យថែរក្សាបូរណៈភាពអធិបតេយ្យភាពទឹកដីវប្បធម៌ប្រពៃណី និងអត្តសញ្ញាណជាតិខ្មែរដ៏ផូរផង់ ។ ប្រភពខាងលើបានបន្តឲ្យដឹងទៀតថា មានស្លាកយីហោសរសេរថា (ទីក្រុងកម្សាន្តក្វាងទុងប្រទេសចិន កំពូលឆ្នេរ ហាងលក់ នាយកដ្ឋាន ។ បានលើកឡើងនៅកណ្តាលទីប្រជុំជនក្រុងព្រះសីហនុដែលអាជ្ញាធរមូលដ្ឋានអាជ្ញាធរក្រុង និងមន្ទីរជុំនាញពាក់ព័ន្ធហាក់មិនអើពើ និងសកម្មភាពខាងលើ ឬក៏បានសើមមាត់សើមកពីជនជាតិចិន ទើបបណ្តែតបណ្តោយឲ្យមានសកម្មភាពខាងលើកើតឡើងបាន ? ដល់តែមានបទបញ្ជាពីលោកអភិបាលខេត្តទើបបាននាំគ្នារត់ទាំងត្រហេបត្រហប ។
លោក ដេត ណូ ប្រធានមន្ទីរវប្បធម៌ និងវិចិត្រសិល្បៈខេត្តព្រះសីហនុបានឲ្យដឹងតាមទូរស័ព្ទកាលពីព្រឹកថ្ងៃទី២៦ ខែវិច្ឆិកា ឆ្នាំ២០១៨ថា ចំពោះការលើកស្លាកយីហោហាង ឬក្រុមហ៊ុនរបស់ជនជាតិចិននៅក្នុងខេត្តមាន០៣ចំណុច០១- ស្លាកយីហោនាំចូលមកពីបរទេសមើលតាមប្រព័ន្ធយូធូ ។ ០២- បោះពុម្ភនៅរាជធានីភ្នំពេញនាំយកមកខេត្តព្រះសីហនុ ។ ០៣- បោះពុម្ភនៅក្នុងខេត្តព្រះសីហនុមិនសូវជាខុសទេ ដោយហេតុថា មន្ទីរជំនាញបានចុះអប់រំណែនាំដល់ម្ចាស់សិប្បកម្មបោះពុម្ភត្រូវតែច្បាស់លាស់ពីអក្ខរាវិរុទ្ធ និងអត្ថន័យ បើមិនស្តាប់តាមការណែនាំទេ ម្ចាស់សិប្បកម្មរោងពុម្ពប្រឈម និងការបិទអាជីវកម្មរបស់ខ្លួន ។
លោកប្រធានមន្ទីរខាងលើបានបង្ហើបឲ្យដឹងផងដែរថា សព្វថ្ងៃការស្នើរសុំច្បាប់លើកស្លាកយីហោហាងទាំងជាតិ អន្តរជាតិមន្ទីរបានធ្វើប្រតិភូកម្មតាមក្រសួងដែលបានកំណត់ត្រឹមស្លាកយីហោដែលមានទំហ៊ំ៤ម៉ែត្រការ៉េចុះត្រូវសុំច្បាប់នៅការិយាល័យច្រកចេញចូលតែមួយនៃសាលាក្រុងព្រះសីហនុ ។ ដោយស្លាកយីហោដែលមានទំហ៊ំលើសពី៤ម៉ែត្រការ៉ឡើងទៅត្រូវសុំច្បាប់នៅច្រកចេញចូលតែមួយសាលាខេត្តតាមរយៈក្រុមហ៊ុនផលសារ៉េត ដែលជាក្រុមហ៊ុនទទួលសិទ្ធបានក្នុងការគ្រប់គ្រងស្លាកយីហោហាងដែលមានរយៈពេលចំនួន០២អាណត្តិបានកន្លងផុតទៅឡើងចង់ដុសស្លែរមកហើយ។ ជុំវិញការរិះគន់របស់ប្រជាពលរដ្ឋ និងភ្ញៀវទេសចរណ៍ជាតិខាងលើអ្នកយកព័ត៌មានយើងមិនអាចស្វែងរកការបកស្រាយពីរដ្ឋបាលសាលាក្រុងព្រះសីហនុបានទេ៕
ចែករំលែកព័តមាននេះ