រាជធានីភ្នំពេញ ៖ សេចក្តីរាយការណ៍បឋមឱ្យដឹងថា សាកសពបុរសម្នាក់ ត្រូវបានប្រទះឃើញអណ្តែតក្នុងស្រះទឹកមួយកន្លែង ដែលមានសភាពហើមស្អុយទៅហើយ បង្កការភ្ញាក់ផ្អើលនៅម៉ោង០៨ព្រឹកថ្ងៃទី២០ វិច្ឆិកា ស្ថិតក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ ខណៈដែលក្រុមគ្រួសារក៏កំពុងតាមរកគាត់ដែរ ព្រោះបានបាត់ពីផ្ទះតាំងពីថ្ងៃអាទិត្យមកម្ល៉េះ ។
សេចក្តីរាយការណ៍បន្តថា សាកសពខាងលើមានឈ្មោះយ៉ែម យ៉ាន អាយុ៥៦ឆ្នាំ មានទីលំនៅចំណុចកើតហេតុ ។ បើតាមក្រុមគ្រួសារបានឱ្យដឹងដែរថា គាត់ជាមនុស្សចូលចិត្តដើរលេងលំហែ ដោយនៅថ្ងៃខ្លះ ចេញពីផ្ទះដើរលេងបាត់២ទៅ៣ម៉ោង ឬ១ព្រឹកនិង១ថ្ងៃ ។ ប៉៉ុន្តែទោះយ៉ាងណា ក៏គាត់ត្រូវតែត្រឡប់មកផ្ទះវិញដែរ ។
ប្រភពបន្តថា តែចម្លែក កាលពីថ្ងៃអាទិត្យគាត់បានចេញដើរដូចសព្វដង តែអត់ឃើញត្រឡប់មកផ្ទះវិញទេ ក៏ធ្វើឱ្យគ្រួសារបារម្ភដោយនាំគ្នាដើរតាមរកគាត់ តែអត់ឃើញ ។ លុះនៅព្រឹកថ្ងៃនេះ ក៏មានការសង្ស័យនាំគ្នាដើររកក្បែរៗស្រះទឹក ស្រាប់តែប្រទះឃើញសាកសពគាត់អណ្តែតយ៉ាងភ្ញាក់ផ្អើលតែម្តង ។
បច្ចុប្បន្ន សមត្ថកិច្ចជំនាញកំពុងធ្វើកោសល្យវិច័យ តែសន្និដ្ឋាននិងសង្ស័យថា គាត់អាចចុះមុជទឹកក៏លង់ទឹកស្រះនេះតែម្តង ។
ចែករំលែកព័តមាននេះ