រាជធានីភ្នំពេញ ៖ ស្ត្រីម្នាក់បើករថយន្តរវល់មើលទូរស័ព្ទមិនបានប្រុងប្រយ័ត្ន ក៏រេចង្កូតបុករបាំងថ្មពុះចែកទ្រូងផ្លូវខូចអស់មួយផ្ទាំង បណ្តាលឲ្យអ្នកបើកបររថយន្តរងរបួសធ្ងន់ ។ ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៨និង២០នាទីយប់ថ្ងៃទី១៨ ខែវិច្ឆិកា ឆ្នាំ២០១៨ នៅតាមបណ្ដោយផ្លូវសហព័ន្ធរុស្ស៊ីទល់មុខព្រលានយន្តហោះអន្តរជាតិភ្នំពេញ ស្ថិតនៅភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ ។
រថយន្តខាងលើម៉ាកឡិចស៊ីស RX330 ពណ៌ស ពាក់ស្លាកលេខ ភ្នំពេញ ២AV-៩៣៩៩ បើកបរដោយស្ដ្រីម្នាក់បានរងរបួសធ្ងន់។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបានឱ្យដឹងថា នៅមុនពេលកើតហេតុ គេឃើញរថយន្តខាងលើបើកបរដោយស្ត្រីម្នាក់ក្នុងទិសដៅពីលិចទៅកើតក្នុងល្បឿនយ៉ាងលឿន លុះមកដល់ចំណុចកើតហេតុ ជនរងគ្រោះបាននិយាយទូរស័ព្ទបណ្តើរ បើករថយន្តបណ្តើរក៏រេចង្កូតបុករបាំងថ្មពុះចែកទ្រូងផ្លូវពេញទំហឹង បណ្តាលឲ្យរបាំងថ្មពុះចែកទ្រូងផ្លូវរងការខូចខាតអស់ចំនួនមួយផ្ទាំង ។
ចំណែករថយន្តរងការខូចខាតយ៉ាងធ្ងន់ធ្ងរបែកកង់ខាងឆ្វេង ធ្លាក់កាង បែកធុងប្រេង ផ្ទុះពោងសុវត្ថិភាព និងបណ្តាលឲ្យស្ត្រីជាអ្នកបើកបររងរបួសធ្ងន់ ត្រូវបានគេបញ្ជូនទៅសង្គ្រោះនៅមន្ទីរពេទ្យឯកជនមួយកន្លែងដែលនៅជិតកន្លែងកើតហេតុ ។
ក្រោយពេលកើតហេតុ កំលាំងនគរបាលប៉ុស្តិ៍កាកាបទី២បានមកដល់កន្លែងកើតហេតុ ហើយបានទាក់ទងទៅជំនាញផ្នែកសណ្តាប់ធ្នាប់ចរាចរណ៍ខណ្ឌពោធិ៍សែនជ័យដើម្បីវាស់វែងនឹងយករថយន្តខាងលើទៅរក្សាទុកដើម្បីរង់ចាំការដោះស្រាយ ៕
ចែករំលែកព័តមាននេះ