ខេត្តបន្ទាយមានជ័យ ៖ ស្ត្រីកម្មករធ្វើផ្លូវជាតិលេខ៥ម្នាក់ ពេលឃើញគ្រឿងចក្ររូឡូឈប់ ក៏បានទៅអង្គុយជ្រកម្លប់នៅពីខាងមុខ ជាអកុសលដោយសារអ្នកបើកបររូឡូមិនឃើញ ក៏បើកកិនសំប៉ែតដូចចេកចៀនស្លាប់មួយរំពេច។
គ្រោះថ្នាក់ដ៏រន្ធត់នេះ កើតឡើងកាលពីវេលាម៉ោង៣ និង៣០នាទីរសៀលថ្ងៃទី១៤ ខែវិច្ឆិកា នៅភូមិបត់ត្រង់ ឃុំបត់ត្រង់ ស្រុកមង្គលបុរី ។ ស្ត្រីរងគ្រោះដែលស្លាប់ឈ្មោះ វ៉ាន់ ឈៀក អាយុ៣៨ឆ្នាំ រស់នៅក្នុងឃុំឫស្សីក្រោក ស្រុកមង្គលបុរី ។
មន្ត្រីនគរបាលស្រុកមង្គលបុរីបានឲ្យដឹងថា មុនពេលកើតមានគ្រោះថ្នាក់នេះ គឺអ្នកបើកបររូឡូកិនផ្លូវបានចតរ៉ូឡូចោលហើយចុះទៅបត់ជើងតូច ឯស្ត្រីជាកម្មករធ្វើផ្លូវឃើញរូឡូចតស្ងៀមដោយម៉ាស៊ីននៅបញ្ឆេះ ក៏ទៅជ្រកម្លប់នៅខាងមុខ ។ ដោយសារស្នូរម៉ាស៊ីនរូឡូឆេះទើបមិនបានចាប់អារម្មណ៍ថាគេឡើងមកបើក ក៏ចេះតែបន្តជ្រកម្លប់ទៀត ។
ចំណែកអ្នកបើកបររូឡូមកពីបត់ជើងតូចវិញ ឡើងបើករូឡូដោយមិនបានឃើញស្ត្រីរងគ្រោះអង្គុយនៅខាងមុខ ក៏បណ្តាលឲ្យកិនសំប៉ែតដូចចេកចៀនស្លាប់ភ្លាមនៅនឹងកន្លែង ។ ក្រោយពេលកើតហេតុ នគរបាលជំនាញបានទៅពិនិត្យនិងសាកសួរទើបដឹងថា ស្ត្រីរងគ្រោះទៅជ្រកម្លប់នៅមុខរូឡូ ។
សពត្រូវបានសាច់ញាតិទទួលយកទៅធ្វើបុណ្យតាមប្រពៃណី ចំណែកអ្នកបើកបររូឡូ ត្រូវបាននគរបាលនាំយកទៅសាកសួរ ឯរូឡូយកទៅរក្សាទុកនៅប៉ុស្តិ៍នគរបាលរង់ចាំដោះស្រាយតាមច្បាប់ ៕
ចែករំលែកព័តមាននេះ