ខេត្តតាកែវ ៖ ដីភ្នំមួយចំនួននៅក្នុងទឹកដីខេត្តតាកែវ កំពុងតែទទួលរងការជីកគាស់កាយបំផ្លាញ ដោយឈ្មួញដឹកយកទៅលក់យ៉ាងអនាធិបតេយ្យបំផុត គ្មានការរារាំងទប់ស្កាត់ឡើយ គឺជាអំពើខុសច្បាប់ គឺមានតែច្បាប់ «លោកតាប្រាក់» ចេញឱ្យប៉ុណ្ណោះ…
ខេត្តតាកែវ ៖ ដីភ្នំមួយចំនួននៅក្នុងទឹកដីខេត្តតាកែវ កំពុងតែទទួលរងការជីកគាស់កាយបំផ្លាញ ដោយឈ្មួញដឹកយកទៅលក់យ៉ាងអនាធិបតេយ្យបំផុត គ្មានការរារាំងទប់ស្កាត់ឡើយ គឺជាអំពើខុសច្បាប់ គឺមានតែច្បាប់ «លោកតាប្រាក់» ចេញឱ្យប៉ុណ្ណោះ ។
ជាក់ស្តែងភ្នំទទាដែលស្ថិតក្នុងភូមិស្តុកព្រៃ ឃុំកុមាររាជា ស្រុកបាទី ខេត្តតាកែវ កំពុងតែរងគ្រោះដោយសារក្រុមឈ្មួញឯកជនកាយដី កាយថ្ម ដឹកយកទៅលក់ជារៀងរាល់ថ្ងៃ ហើយអ្នកភូមិរិះគន់ថា សកម្មភាពមេឈ្មួញជីកកកាយដីភ្នំលក់ស្ទើរតែរលាយភ្នំនេះគឺដោយមានការឃុបឃិតគ្នាជាមួយប្រធានមន្ទីររ៉ែ និងថាមពលខេត្តនិងអាជ្ញាធរស្រុក ។
អ្នកភូមិដែលរស់នៅ ក្បែរជើងភ្នំទទាបាននាំគ្នានិយាយរិះគន់ថា ពួកគាត់ឃើញគេកាយដីភ្នំទទាដឹកចេញទៅលក់ម្តងៗមានរថយន្តធំៗដឹកដីបន្តកន្ទុយគ្នា កាត់ផ្លូវក្នុងភូមិរបស់ពួកគាត់ ពិបាកធ្វើដំណើរយ៉ាងខ្លាំង
ធ្វើឱ្យហុយខូចផ្លូវ ស្ពាន និងអាចបង្កឱ្យមានគ្រោះថ្នាក់ជាយថាហេតុទៀតផង ។ ពួកគាត់ថាមិនដឹងធ្វើយ៉ាងម៉េចទេ ព្រោះសូម្បីតែភ្នំដែលជាសម្បត្តិរដ្ឋ គេហ៊ានកាយលក់ចែកលុយគ្នាចាយ ធ្វើមានធ្វើបានគ្មានសមត្ថកិច្ចជំនាញណាហ៊ានចេញមុខបង្ក្រាបឡើយ ទម្រាំពួកគាត់ជាប្រជាជនទៀតម៉េចហ៊ានថាទៅ ។
កោះសន្តិភាពយើងមិនអាចទាក់ទងសុំការបំភ្លីពីលោក ផេង វុធ ប្រធានមន្ទីររ៉ែ និងថាមពលខេត្តបានទេនៅថ្ងៃទី១៥ វិច្ឆិកានេះ ។ ប៉ុន្តែមន្ត្រីថ្នាក់ទាបនៃមន្ទីររ៉ែថាមពលខេត្តបាននិយាយថា មន្ទីររបស់គាត់មានសិទ្ធិត្រឹមតែចុះមកវាស់វែង រួចគិតចំនួនទំហំ មានជម្រៅប៉ុន្មាន រួចឱ្យម្ចាស់អាជីវកម្ម ទៅបង់លុយខ្លួនគេទៅ នៅឯច្រកចេញចូលតែមួយខេត្ត ។
ចំណែកមន្ត្រីច្រកចេញចូលតែមួយរបស់ខេត្ត បានប្រាប់ «កោះសន្តិភាព»ថាក្រុមហ៊ុនឯកជនដែលកំពុងតែជីកកាយដី ថ្មភ្នំទទា យកទៅលក់យ៉ាងអនាធិបតេយ្យរាល់ថ្ងៃនេះគ្មានច្បាប់ទេ មានតែត្រឹមមន្ទីរជំនាញខេត្ត ដែលគេត្រូវរ៉ូវគ្នាឱ្យជីកកកាយដីថ្មភ្នំ ចែកលុយគ្នាចាយតែប៉ុណ្ណោះ គ្មានច្បាប់អ្នកណាចេញឱ្យទេ ៕
ចែករំលែកព័តមាននេះ