រាជធានីភ្នំពេញ ៖ អគ្គមេបញ្ជាការរងកងយោធពលខេមរភូមិន្ទលោក ហ៊ុន ម៉ាណែត មេបញ្ជាការកងទ័ពជើងគោកបានប្រាប់កងទ័ពឆត្រយោង៩១១ ឲ្យខិតខំហ្វិកហាត់បំប៉នជំនាញ ដើម្បីពង្រឹងសមត្ថភាពការពារបូរណភាពទឹកដី ។ លោក…
រាជធានីភ្នំពេញ ៖ អគ្គមេបញ្ជាការរងកងយោធពលខេមរភូមិន្ទលោក ហ៊ុន ម៉ាណែត មេបញ្ជាការកងទ័ពជើងគោកបានប្រាប់កងទ័ពឆត្រយោង៩១១ ឲ្យខិតខំហ្វិកហាត់បំប៉នជំនាញ ដើម្បីពង្រឹងសមត្ថភាពការពារបូរណភាពទឹកដី ។
លោក ហ៊ុន ម៉ាណែត បានថ្លែងដូច្នេះ ក្នុងឱកាសចូលរួមក្នុងពិធីបើកវគ្គហ្វឹកហ្វឺនបណ្តុះបណ្តាលជំនាញឆត្រយោងជំនាន់ទី២៥ បិទវគ្គហ្វឹកហ្វឺនបំប៉នជំនាញអាវុធ B40-B41 អាវុធការពារអាកាសជំនាន់ទី២ និងពិធីសម្ពោធដាក់ឲ្យប្រើប្រាស់ជាផ្លូវការសំណង់បច្ចេកទេសហ្វឹកហ្វឺន ជំនាញឆត្រយោងរាជធានី ។ លោក ហ៊ុន ម៉ាណែត បានថ្លែងថា ប្រទេសកម្ពុជា ស្ថិតក្នុងស្ថានភាពសុខសន្តិភាព និងការអភិវឌ្ឍរីកចម្រើនកងយោធពលខេមរភូមិន្ទ គឺជាសសរគ្រឹះដ៏រឹងមាំក្នុងកិច្ចការការពារអធិបតេយ្យឯករាជ្យ និងបូរណភាពទឹកដីការថែរក្សាសន្តិភាពស្ថិរភាពសន្តិសុខ សណ្តាប់ធ្នាប់ សាធារណៈ និងការអភិវឌ្ឍប្រទេសជាតិ ។
លោកថា ក្រៅពីតួនាទី និងភារកិច្ចដែលរាជរដ្ឋាភិបាលក្រសួងការពារជាតិអគ្គបញ្ជាការដ្ឋាន បានប្រគល់ឲ្យកងទ័ពត្រូវតែបង្កើនការយកចិត្តទុកដាក់បន្ថែមទៀត លើការងារហ្វឹកហ្វឺនយុទ្ធ វិធីបច្ចេកទេសការអប់រំចិត្តសាស្ត្រ ពង្រឹងវិន័យ អត្តចរិត សីលធម៌ និងគោរពច្បាប់រដ្ឋ ដើម្បីឲ្យមានសមត្ថភាពជំនាញគ្រប់គ្រាន់ ក្នុងការឆ្លើយតបឲ្យបានទាន់ពេលវេលាចំពោះបញ្ហា និងស្ថានភាពនានាដែលកើតមានឡើង ។
លោកសង្កត់ធ្ងន់ថា កងទ័ពត្រូវឈរលើមូលដ្ឋាននៃការហ្វឹកហ្វឺនឲ្យបានជាប់ជាប្រចាំ និងទៀង ទាត់ដោយផ្តោតការយកចិត្តទុកដាក់លើគុណភាព និងបរិមាណ ដើម្បីឆ្លើយតបទៅនឹងការខ្វះខាតធនធានមនុស្សដែលជាបញ្ហាប្រឈម ហើយត្រូវពុះពារជំនះដោះស្រាយសំដៅកសាងឲ្យបានធនធាន មនុស្សពិត និងគ្រប់គ្រាន់នៅក្នុងជួរកងយោធពលខេមរភូមិន្ទ ដើម្បីលើកកម្ពស់ ឆន្ទៈប្រយុទ្ធត្រៀមប្រយុទ្ធក្នុងភារកិច្ចថែរក្សាការពារបូរណភាពទឹកដីព្រមទាំងចូលរួមបំពេញ បេសកកម្មក្នុងតំបន់ និងពិភពលោក ។
លោក ហ៊ុន ម៉ាណែត ក៏បានថ្លែងបញ្ជាក់បន្ថែមថា ការហ្វឹកហ្វឺន និងការកសាងធនធានមនុស្ស ក្នុងជួរកងយោធពលខេមរភូមិន្ទ ពិតជាឆ្លើយតបយ៉ាងត្រឹមត្រូវ និងទាន់ពេលវេលាទៅនឹងគោលនយោបាយរបស់រាជរដ្ឋាភិបាលក្នុងការកែទម្រង់កងយោធពលខេមរភូមិន្ទសំដៅកសាង និងពង្រឹងភាពរឹងមាំលើវិស័យការពារជាតិ និងការធ្វើសមាហរណកម្មកងទ័ពចូលក្នុងសហគមន៍អន្តរជាតិ ។ នាឱកាសនោះលោកអគ្គមេបញ្ជាការរងក៏បានពាំនាំនូវការផ្តាំផ្ញើសាកសួរសុខទុក្ខ និងក្តីនឹករឭកប្រកបដោយមនោសញ្ចេតនាដ៏ជ្រាលជ្រៅពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាថ្នាក់ដឹកនាំក្រសួងការពារជាតិអគ្គបញ្ជាការ និងខ្លួនខ្ញុំផ្ទាល់ផ្ញើជូនចំពោះយោធាចារ្យ សិក្ខាកាម នាយទាហាននាយទាហានរង និងពលទាហានដែលមានវត្តមានទីនេះក៏ដូចជា នៅទូទាំងកងពលតូចទ័ព ពិសេសឆត្រយោង៩១១ និងសិក្ខាកាមជានិស្សិតវិទ្យាស្ថានទ័ពជើងគោកជំនាន់ទី៨ ក្នុងសេចក្តីគោរពស្រឡាញ់ដ៏ជ្រាលជ្រៅជាទីបំផុត ។ ទន្ទឹមនោះលោកក៏បានថ្លែងការកោតសរសើរ និងវាយតម្លៃខ្ពស់ចំពោះស្នាដៃដែលកងពលតូចទ័ព ពិសេសឆត្រយោង៩១១ ដែលបានបំពេញក្នុងរយៈកន្លងមក ។
សូមបញ្ជាក់ថា កងពលតូចឆត្រយោង៩១១ បានបើកវគ្គចំនួន២៤វគ្គ រួចមកហើយ ដោយមាន ១៧ អង្គភាពចូលរួម និងមានចំនួនសិក្ខាកាមសរុបរហូតដល់៣៦៨០នាក់ ក្នុងនោះកងពល តូច៩១១ ក៏បានចូលរួមបំពេញភារកិច្ចផ្សេងៗជាច្រើនផងដែររួមមាន ការការពារបូរណភាពទឹកដី ការពារសន្តិសុខ ការជួយសង្គ្រោះប្រជាពលរដ្ឋ ៕
ចែករំលែកព័តមាននេះ