ខេត្តរតនៈគីរី ៖ បុរសជាងផ្សាដែកម្នាក់ត្រូវខ្សែភ្លើងឆក់ស្លាប់យ៉ាងអាណោចអាធម៌ ហេតុការណ៍នេះបានកើតឡើងនៅថ្ងៃទី១៤ ខែវិច្ឆកា នៅវេលាម៉ោង០៩ និង៣០នាទីព្រឹក ស្ថិតនៅចំណុចផ្ទះលីហួរវេលុយ ក្បែរង្វង់មូលក្នុង ភូមិជ័យជំនះ សង្កាត់ឡាបានសៀក ក្រុងបានលុង ។
ជនរងគ្រោះមានឈ្មោះ ធា ភេទប្រុស អាយុ៣៤ឆ្នាំ ជនជាតិខ្មែរ មានប្រពន្ធនឹងកូន២នាក់ មានមុខរបរកូនជាងផ្សាដែក រស់នៅភូមិឃុំកើតហេតុខាងលើ ។ ក្រោយពីកើតហេតុសមត្ថកិច្ចប៉ូលិសក្រុងបានលុងនឹងបងប្អូនសាច់ញាតិដឹកជនរងគ្រោះទៅមន្ទីរពេទ្យបង្អែកខេត្ត ដើម្បីជួយសង្គោះ តែដឹកដល់មន្ទីរពេទ្យលោកគ្រូពេទ្យប្រាប់ថា ជនរងគ្រោះបានដាច់ខ្យល់ស្លាប់បាត់ទៅហើយ ទើបបងប្អូនសាច់ញាតិដឹកសាកសពត្រឡប់ទៅផ្ទះវិញ ។
បើតាមសមត្ថកិច្ចប៉ូលិសបានឲ្យដឹងថា យោងតាមការត្រួតពិនិត្យនៅកន្លែងកើតហេតុនោះ ម្ចាស់ផ្ទះលីហួរវេលុយខាងលើបានជួលឲ្យក្រុមជាងផ្សាដែកមានគ្នា ២-៣នាក់ឡើងលើដំបូលផ្ទះ មានកម្ពស់ជាង១០ម៉ែត្រ ដើម្បីផ្សាដែកនឹងប្រក់ដំបូលផ្ទះ ។
ខណៈកំពុងលើកស័ង្កសីក៏បះនឹងខ្សែភ្លើងមេស្រាត ទើបបណ្ដាលឲ្យឆក់ជនរងគ្រោះធ្លាក់ដល់ដីស្លាប់ភ្លាមៗនៅនឹងកន្លែងកើតហេតុតែម្ដង សមត្ថកិច្ចថា ជនរងគ្រោះពិតជាបានស្លាប់ដោយខ្សែភ្លើងឆក់ស្លាប់ពិតប្រាកដមែន គ្មានរឿងឃាតកម្មកើតឡើងទេ សាកសពត្រូវបានប្រពន្ធនឹងសាច់ញាតិយកធ្វើបុណ្យតាមប្រពៃណីនៅផ្ទះជនរងគ្រោះ ៕
ចែករំលែកព័តមាននេះ