រាជធានីភ្នំពេញ ៖ បុរសវ័យចំណាស់ជាប្រជាការពារភូមិម្នាក់ ត្រូវបានជនដៃដល់ម្នាក់ចាក់ចំនួន៣កាំបិត បណ្ដាលឲ្យរងរបួសធ្ងន់ធ្ងរ ហើយបានបាត់បង់ជីវិតក្រោយពេលក្រុមគ្រួសារបញ្ជូនទៅសង្គ្រោះដល់មន្ទីរពេទ្យរុស្សី។ ហេតុការណ៍នោះបានកើតឡើងកាលពីវេលាម៉ោង១១យប់ ថ្ងៃទី១៣ ខែវិច្ឆិកា ឆ្នាំ២០១៨…
រាជធានីភ្នំពេញ ៖ បុរសវ័យចំណាស់ជាប្រជាការពារភូមិម្នាក់ ត្រូវបានជនដៃដល់ម្នាក់ចាក់ចំនួន៣កាំបិត បណ្ដាលឲ្យរងរបួសធ្ងន់ធ្ងរ ហើយបានបាត់បង់ជីវិតក្រោយពេលក្រុមគ្រួសារបញ្ជូនទៅសង្គ្រោះដល់មន្ទីរពេទ្យរុស្សី។ ហេតុការណ៍នោះបានកើតឡើងកាលពីវេលាម៉ោង១១យប់ ថ្ងៃទី១៣ ខែវិច្ឆិកា ឆ្នាំ២០១៨ នៅក្នុងភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ។ បុរសរងគ្រោះខាងលើឈ្មោះ កេត ស៊ីថា អាយុ៥២ឆ្នាំ មុខរបរប្រជាការពារភូមិតាឡី ស្នាក់នៅភូមិតាឡី សង្កាត់ដង្កោ ខណ្ឌដង្កោ។ ចំណែកជនដៃដល់មិនទាន់ ត្រូវបានស្គាល់អត្តសញ្ញាណនៅឡើយទេ និងបានរត់គេចខ្លួនបាត់ដោយសុវត្ថិភាព ហើយនគរបាលកំពុងធ្វើការ ស្រាវជ្រាវ ដើម្បីចាប់ខ្លួន។
តាមប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុជនដៃដល់ បានមានទំនាស់ជាមួយមិត្តភក្ដិរបស់ជនរងគ្រោះ ហើយត្រូវមិត្តភក្ដិជនរងគ្រោះវាយបែកក្បាល។ ខណៈនោះជនរងគ្រោះបានទៅជួយ ធ្វើការសម្របសម្រួលដោយឲ្យមិត្តភក្តិសងលុយទៅជនដៃដល់ (ឃាតក) ចំនួន៧០០ដុល្លារ ដើម្បីបញ្ចប់រឿង។ ទើបពេលនោះមានការស្ងប់ស្ងាត់ទៅវិញ បន្ទាប់មក ជនរងគ្រោះរួមជាមួយជន ដៃដល់រួមនឹងមិត្តភក្ដិរបស់ជននោះ៣នាក់ផ្សេងទៀតបាននាំគ្នាទៅផឹកស៊ីនៅភោជនីយដ្ឋានអាម៉ាហ្ស៊ូន។
ប្រភពដដែលបានបន្តថា លុះផឹកនៅទីនោះអស់ចិត្ត ជនរងគ្រោះក៏បបួលអ្នកទាំងនោះទៅផឹកបន្តនៅផ្ទះប្រពន្ធចុង របស់គាត់ថែមទៀត ប៉ុន្តែពេលជិះម៉ូតូដល់ពាក់កណ្តាលផ្លូវនៅ ក្នុងភូមិសាស្ត្រសង្កាត់ជើងឯក ជនដៃដល់បានឈប់ម៉ូតូ។ បន្ទាប់មកបានចុះពីលើម៉ូតូរួចកាន់កាំបិតស្ទុះទៅចាក់ជនរងគ្រោះចំនួន៣កាំបិត បណ្ដាលឲ្យដេកដួលនៅក្នុងថ្លុកឈាមរួចជិះម៉ូតូរត់គេចខ្លួនបាត់ដោយសុវត្ថិភាព។
ចំណែកជនរងគ្រោះត្រូវបាន ក្រុមគ្រួសារដឹកបញ្ជូនទៅកាន់មន្ទីរពេទ្យរុស្សី តែដោយរបួសធ្ងន់ធ្ងរពេកទើបស្លាប់ ហើយក្រុមគ្រួសារបានដឹក យកផ្ទះវិញដើម្បីធ្វើបុណ្យតាមប្រពៃណី។ ដោយឡែកកម្លាំងនគរបាលខណ្ឌដង្កោបាន និងកំពុងស្វែងរកចាប់ខ្លួនជនដៃដល់នោះហើយ៕
https://youtu.be/ZSjugyKQhfE
ចែករំលែកព័តមាននេះ