រាជធានីភ្នំពេញ ៖ ក្នុងពេលដែលតារាចាស់ថ្មីមួយចំនួនសម្រេចចិត្តចូលរោងការជាបន្តបន្ទាប់ទៅហើយនោះ ប៉ុន្តែសម្រាប់តារាចម្រៀងចាស់ឆ្នាំលោក ឈឿន ឧត្តម នៅមិនទាន់មានដំណឹងណាមួយលេចចេញមកថា មានគម្រោងនឹងកាន់ផ្កាស្លាទទួលពរជ័យពីមេបាចាស់ទុំនៅពេលណាទេ បើទោះបីជាពេលនេះលោកមានអាយុជ្រេបន្តិចទៅហើយក្តី ។ នៅពេលជជីកសួរដល់បញ្ហាមួយ
រាជធានីភ្នំពេញ ៖ ក្នុងពេលដែលតារាចាស់ថ្មីមួយចំនួនសម្រេចចិត្តចូលរោងការជាបន្តបន្ទាប់ទៅហើយនោះ ប៉ុន្តែសម្រាប់តារាចម្រៀងចាស់ឆ្នាំលោក ឈឿន ឧត្តម នៅមិនទាន់មានដំណឹងណាមួយលេចចេញមកថា មានគម្រោងនឹងកាន់ផ្កាស្លាទទួលពរជ័យពីមេបាចាស់ទុំនៅពេលណាទេ បើទោះបីជាពេលនេះលោកមានអាយុជ្រេបន្តិចទៅហើយក្តី ។ នៅពេលជជីកសួរដល់បញ្ហាមួយនេះ តារាចម្រៀងសំនៀងស្រួយដែលមានប្រភពមកពីខេត្តព្រៃវែង រូបនេះបញ្ជាក់ថា លោកបានសម្រេចចិត្តផ្តឹបចោលមង្គលការខ្លួនឯង ដោយសារតែលោកមានតួនាទីយឹតយោងសំពាយគ្រួសារដោយមិនអាចខ្វះបាន ។
តារាចម្រៀង ឈឿន ឧត្តម ទទួលស្គាល់ថា នៅក្នុងពេលដែលលោកឈានដល់អាយុជាង៣០ឆ្នាំទៅហើយនោះ វាអាចនិយាយបានថា ជាពេលវេលាមួយដែលតម្រូវឱ្យលោកត្រូវមានគ្រួសារដោយខានមិនបាន ប៉ុន្តែរហូតមកដល់ពេលនេះ លោកនៅតែមិនអាចគិតគូររឿងគ្រួសារបាននៅឡើយទេ ខណៈពេលដែលជីវភាពក្រុមគ្រួសាររបស់លោកនៅមិនទាន់មានភាពរឹងមាំនៅឡើយនោះ។
ម្ចាស់បទរនោចខែប្រាំងរូបនេះបញ្ជាក់ថាប្រសិនបើលោកចង់រៀបការនោះ គឺលោកអាចរៀបការបានតាំងពីយូរបាត់ទៅហើយ ប៉ុន្តែដោយសារតែលោកមានតួនាទីដើម្បីរកប្រាក់មកផ្គត់ផ្គង់ឪពុកម្តាយចាស់ និងជួយទំនុកបម្រុងបងប្អូនឱ្យមានគូស្រកររួចរាល់ជាមុនសិន មុនពេលដែលលោកត្រូវឈានជើងផ្តាច់ចេញពីរង្វង់គ្រួសារ ។ កន្លងមកលោកបានរៀបចំឱ្យបងប្រុសមានគូស្រករម្នាក់រួចមកហើយ ប៉ុន្តែនៅប្អូនស្រីម្នាក់ទៀតដែលមិនទាន់មាន ខណៈពេលដែលលោកក៏មានភារកិច្ចរកប្រាក់ផ្គត់ផ្គង់ឱ្យឪពុកម្តាយចាស់ឱ្យបានសេសសល់មួយចំនួនសិន មុនពេលដែលលោកសម្រេចចិត្តដើរលើផ្លូវមួយតែឯងនោះ ។
លោក ឈឿន ឧត្តម ជឿថា ប្រសិនបើលោកសម្រេចចិត្តរៀបការនៅក្នុងពេលនេះ គឺវាហាក់បីដូចជាទុកឱ្យឪពុកម្តាយ និងបងប្អូនរងទុក្ខលំបាក ដោយសារតែថវិកាដែលលោករកបានមួយផ្នែកធំ គឺត្រូវឱ្យភរិយា ហើយនៅពេលដែលត្រូវបែងចែកឱ្យឪពុកម្តាយនោះ គឺទាមទារឱ្យមានការពិភាក្សាជាមួយភរិយាជាមុនសិន មិនមែនអារកាត់តែម្នាក់ឯងដូចពេលដែលលោកនៅតែម្នាក់ឯងទេ ។
បើទោះបីជាសំពាយគ្រួសារធ្ងន់ធ្លាក់មកលើរូបលោកក៏ដោយ ក៏មិនមែនមានន័យថា លោកឧត្តមបោះបង់ចោលការមានគូស្រករឡើយ ពោលគឺលោកនឹងចាប់ផ្តើមជីវិតគ្រួសារនៅក្នុងពេលណាមួយ ក្នុងពេលដែលលោកគិតថា ជាពេលវេលាសមរម្យសម្រាប់ខ្លួនឯងនោះ ។
ពាក់ព័ន្ធទៅនឹងអាជីពសិល្បៈវិញ លោក ឈឿន ឧត្តម ឱ្យដឹងថា នៅដំណាច់ឆ្នាំនេះ លោកមានគម្រោងចេញទៅសម្តែងនៅអាមេរិករយៈពេល៣ខែ តាមការស្នើសុំពីម្ចាស់ឧបត្ថម្ភនៅទីនោះ ។ ប៉ុន្តែគម្រោងមួយនេះនៅមិនទាន់ច្បាស់លាស់មួយរយភាគរយនៅឡើយទេ ព្រោះវាស្ថិតនៅក្នុងការត្រៀមទុកជាមុនសិន ។ យ៉ាងណាក៏ដោយគម្រោងចេញទៅសម្តែងនៅអាមេរិក អាចចេញជារូបរាង និងមិនអាចនោះមិនមែនជាបញ្ហាសម្រាប់រូបលោកឡើយ ដោយសារតែក្នុងអំឡុងពេលនោះ នៅក្នុងស្រុកក៏មានកម្មវិធីច្រើនដែលវាក៏ជាឱកាសសម្រាប់លោកក្នុងការរកប្រាក់ផងដែរ ។
លោក ឈឿន ឧត្តម មានស្រុកកំណើតនៅស្រុកពារាំង ខេត្តព្រៃវែង ។ លោកជាកូនទី២ នៅក្នុងចំណោមបងប្អូន៣នាក់ ក្នុងនោះស្រីម្នាក់។ ឪពុកលោកឈ្មោះ ឈូក ឈឿន អាយុជាង៦០ឆ្នាំ ជាកសិករ ឯម្តាយឈ្មោះ ឡូ ថន អាយុជាង៥០ឆ្នាំ ជាកសិករដែរ ។
លោកឧត្តម បានចាប់កំណើតក្នុងគ្រួសារដែលមានជីវភាពក្រីក្រ ។ ភាពក្រីក្រនេះបានបណ្តាលឱ្យលោកដាច់ខាតត្រូវបោះបង់សាលាចំណេះទូទៅត្រឹមថ្នាក់ទី១០ ។
លោកឧត្តម បានក្លាយជាតារាចម្រៀងនៅឆ្នាំ១៩៩៨ បន្ទាប់ពីចូលប្រឡងក្នុងកម្មវិធី «គន្លងតារា» នៅស្ថានីយទូរទស្សន៍ប៉ុស្តិ៍លេខ៥ ជាប់ចំណាត់ថ្នាក់លេខ២ ដែលកាលនោះលោកជ្រើសរើសយកបទ «អក្ខរាទឹកភ្នែក» យកមកបកស្រាយ ។ ក្នុងឆ្នាំ២០០១ លោកឧត្តម បានចូលច្រៀងក្នុងផលិតកម្មរស្មីស្ទឹងសង្កែ ដែលជាឱកាសលោកបានថតសំឡេងជាលើកដំបូង ។ បទចម្រៀងរបស់លោកទទួលបានប្រជាប្រិយភាពភ្លាមៗតាំងពីលោកចេញវ៉ុលដំបូងក្នុងផលិតកម្មរស្មីស្ទឹងសង្កែ មានបទ «ខ្លាចរកាដែក» «ឱបស្រមោល» «រនោចខែប្រាំង» «ទឹកភ្នែកជនពាល» និងបទ «ទូរស័ព្ទអ្នកណា» ៕
ចែករំលែកព័តមាននេះ