រាជធានីភ្នំពេញ ៖ តាមសេចក្តីរាយការណ៍បឋមបានឲ្យដឹងថា នៅវេលាម៉ោង១០និង៣០នាទីថ្ងៃទី១៣ ខែវិច្ឆិកា ឆ្នាំ២០១៨ មានកម្មករសន្លប់ទៀតហើយ នៅរោងចក្រកាត់ដេរសម្លៀកបំពាក់យីហោ «ហ្គ្រីនមីដូវ ឌីវេឡុបមេន…
រាជធានីភ្នំពេញ ៖ តាមសេចក្តីរាយការណ៍បឋមបានឲ្យដឹងថា នៅវេលាម៉ោង១០និង៣០នាទីថ្ងៃទី១៣ ខែវិច្ឆិកា ឆ្នាំ២០១៨ មានកម្មករសន្លប់ទៀតហើយ នៅរោងចក្រកាត់ដេរសម្លៀកបំពាក់យីហោ «ហ្គ្រីនមីដូវ ឌីវេឡុបមេន ខេមបូឌា ខូអិលធីឌី» ដែលមានទីតាំងស្ថិតនៅក្នុងភូមិត្រាំដោក សង្កាត់ពងទឹក ខណ្ឌដង្កោ រាជធានីភ្នំពេញ ។
សេចក្តីរាយការណ៍បានបន្តថា មូលហេតុដែលកម្មករបានសន្លប់នៅថ្ងៃនេះគឺ ខណៈពួកគាត់កំពុងតែធ្វើការស្រាប់តែមានអាការក្រហាយភ្នែក ហើយក្រោយមកក៏ងងឹតមុខ បន្ទាប់មកក៏ក្អួតចង្អោរ តែមិនទាន់ដឹងពីមូលហេតុពិតនៅឡើយទេ ។ក្រោយមកក៏បានរថយន្តសង្គ្រោះ៧១១ ដឹងយកទៅសង្គ្រោះនៅមន្ទីរពេទ្យជាច្រើនគ្រឿងផងដែរ ។
កម្មករបាននិយាយថា ការដួលសន្លប់នៅក្នុងថ្ងៃនេះខុសពីការដួលសន្លប់ កាលពីថ្ងៃទី១២ ខែវិច្ឆិកា ដែលពេលនោះដួលសន្លប់ ព្រោះតែការរន្ធត់ និងសម្លេងខ្លាំងរបស់អ្នកបកប្រែភាសាចិនដែលសម្លុតកម្មករ ហើយអ្នកដួលសន្លប់មានត្រឹមតែជាង៤០នាក់ប៉ុណ្ណោះ ។
ប៉ុន្តែការដួលជាថ្មីនេះមានរហូតដល់ជាង៧០នាក់ ហើយមូលហេតុ គឺនៅមិនទាន់ដឹងច្បាស់នៅឡើយ តែទោះជាបែបណាមិនមានអ្នកស្លាប់នៅក្នុងហេតុការណ៍មួយនេះទេ ។
កម្មការិនីដែលសន្លប់ ហើយដឹងខ្លួនឡើងវិញបាននិយាយថា នៅមុនពេលកើតហេតុខណៈពេលកំពុងធ្វើការងារ និងជិតដល់ម៉ោងឈប់សម្រាកចេញហូបបាយថ្ងៃត្រង់ទៅហើយនោះ ។ ស្រាប់មានអាការៈក្រហាយភ្នែកយ៉ាងខ្លាំង បន្ទាប់មកងងឹតមុខ តឹងណែនទ្រូង ក្អួតចង្អោររួចក៏ដួលសន្លប់តែម្ដង ។ ពួកនាងមិនបានដឹងថាអាការៈបែបនេះបណ្ដាលមកពីអ្វីនោះឡើយ តែទោះជាខំទប់អារម្មណ៍យ៉ាងណាក៏ទប់មិនឈ្នះដែរ នៅតែដួលសន្លប់ទាល់តែបាន ។
ចំណែករោងចក្រត្រូវបានបិទទ្វារជាបណ្ដោះអាសន្នព្រោះកម្មករកម្មការិនីបាននាំគ្នារត់ចេញក្រៅអស់ គ្មានអ្នកធ្វើការឡើយ ។ រីឯអ្នកដែលមិនដួលសន្លប់បាននាំគ្នារត់សម្រុកចេញក្រៅទាំងសភាពស្លន់ស្លោ ហើយរោងចក្រក៏ត្រូវបានបិទទ្វារជាបណ្ដោះអាសន្នផងដែរ ។
ដោយឡែកអាជ្ញាធរ និងសមត្ថកិច្ចមូលដ្ឋានបានចេញអន្តរាគមន៍ និងពិនិត្យពីស្ថានភាពជាក់ស្ដែងនៅក្នុងរោងចក្រនោះ ប៉ុន្តែមិនទាន់បញ្ជាក់ពីមូលហេតុពិតប្រាកដនៃការដួលសន្លប់នេះក្រៅពីការអះអាងរបស់ក្រុមកម្មករកម្មការិនីខាងលើនោះនៅឡើយទេ ៕
បញ្ជាក់៖ ថ្ងៃនេះកម្មករមានការសន្លប់ដល់ទៅ៧០នាក់ ដែលការសន្លប់នេះកើនឡើងជាងម្សិលមិញច្រើន ៕
ចែករំលែកព័តមាននេះ