រដ្ឋសភាកម្ពុជានៅថ្ងៃទី១១ មិថុនា ២០១៣ បានចេញសេចក្តីថ្លែងការណ៏សម្តែងការសោកស្តាយនិងខកចិត្តយ៉ាងខ្លាំងចំពោះសេចក្តីថ្លែងការណ៏របស់ក្រសួងការបរទេសសហរដ្ឋអាមេរិកចុះថ្ងៃទី០៨ មិថុនា ២០១៣ ។នៅក្នុងសេចក្តីថ្លែងរបស់រដ្ឋសភា ដែលត្រូវបានចែកចាយដល់អ្នកកាសែតនៅរសៀលថ្ងៃអង្គារនេះ បានសង្កាត់ធ្ងន់ថា រដ្ឋសភានៃព្រះរាជាណាចក្រកម្ពុជាមានការព្រួយបារម្ភយ៉ាងខ្លំាងចំពោះទង្វើជ្រៀតជ្រែកចូលក្នុងកិច្ចការផ្ទៃក្នុងនៃរដ្ឋសភាកម្ពុជាពីសំណាក់ក្រសួងការបរទេសសហរដ្ឋអាមេរិក ។ ទង្វើនេះ គឺមិនអាចទទួលយកបានឡើយ ។
គួរបញ្ជាក់ថា កាលពីថ្ងៃទី០៨ មិថុនា លោកស្រី ជីន ផ្សាគី អ្នកនំាពាក្យក្រសួងការបរទេសអាមេរិកបានចេញសេចក្តីថ្លែងការណ៏ដោយសម្តែងក្តីបារម្ភចំពោះគណៈកម្មាធិការអចិន្ត្រៃយ៏រដ្ឋសភាកម្ពុជាដែលបានសំរេចបង្កកបា្រក់ខែ និង បណ្តេញតំណាងរាស្រ្តគណបក្សប្រឆាំង២៨រូប( គណបក្សសមរង្ស៊ី និង គណបក្សសិទ្ឋិមនុស្ស) និងគណបក្សនរោត្តមរណប្ញទ្ឋិ០១រូប និងបានចាត់ទុកសកម្មភាពនេះ ធ្វើឲ្យប៉ះពាល់ដល់ដំណើរការនៃលទ្ឋិប្រជាធិបតេយ្យនៅកម្ពុជា ។
យ៉ាងណាក៏ដោយនៅក្នុងសេចក្តីថ្លែងការណ៏របស់រដ្ឋសភានៅថ្ងៃទី១១មិថុនាបានពន្យល់ថា គណៈកម្មាធិការអចិន្ត្រៃយ៏រដ្ឋសភាកម្ពុជាយល់ឃើញថា ដំណើរការលទ្ឋិប្រជាធិបតេយ្យដ៏រឹងមំាមួយ ត្រូវចំាបាច់អនុវត្តន៏នីតិរដ្ឋ ។ រាល់ចំណាត់ការរបស់រដ្ឋសភាកម្ពុជា គឺសុទ្ឋតែផ្អែកលើច្បាប់ជាធរមានដោយឲ្យឥតលំអៀង និងដោយពុំមានការគិតគូរដ៏ទៃណាផ្សេងឡើយ ។
សេចក្តីថ្លែងការណ៏របស់សភាកម្ពុជាក៏បានពន្យល់បន្ថែមថា ចំពោះអតីតតំណាងរាស្រ្តគណបក្សសមរង្ស៊ី សិទ្ឋិមនុស្ស និងនរោត្តមរណប្ញទិ្ឋ ដែលមានអាសនៈក្នុងរដ្ឋសភាអាណត្តិទី៤ ដោយផ្អែកតាមខ្លឹមសារច្បាប់ជាធរមានទំាងឡាយរបស់កម្ពុជាជាអាទិ៍ ៖ មាត្រា១៥ និងមាត្រា១៦នៃច្បាប់ស្តីពីគណបក្សនយោបាយ មាត្រា១២០ថ្មីនៃច្បាប់ស្តីពីវិសោធនកម្ម ច្បាប់ស្តីពីការបោះឆ្នោតជ្រើសតំាងតំណាងរាស្រ្ត មាត្រា៦នៃលក្ខន្តិកៈតំណាងរាស្រ្ត ប្រការ៨៣ថ្មីនៃបទបញ្ជាផ្ទៃក្នុងនៃរដ្ឋសភា និងសេចក្តីសម្រេចរបស់ក្រុមប្រឹក្សាធម្មនុញ្ញលេខ០៥៤/០០៥/២០០៣ កបធ.ច ចុះថ្ងៃទី២២ ខែ កក្កដា ឆ្នាំ២០០៣ ដែលបកស្រាយខ្លឹមសារនៃមាត្រាទី៦ នៃរដ្ឋធម្មនុញ្ញកម្ពុជា អតីតអ្នកតំណាងរាស្រ្តគណបក្សសមរង្ស៊ី សិទ្ឋិមនុស្ស និង នរោត្តមរណប្ញទ្ឋិ ទំាងនោះ ត្រូវបានចាត់ទុកថា បានបោះបង់អាសនៈតំណាងរាស្រ្តរបស់ខ្លួនពីរដ្ឋសភាស្វ័យប្រវត្តិ ដោយបា្រសចាកសមាជិកភាពពីគណបក្សនយោបាយដែលជាប់ឆ្នោត ហើយត្រូវបាត់បង់នូវបុព្វសិទ្ឋិទំាងអស់នៃអ្នកតំណាងរាស្រ្ត ។
សេចក្តីថ្លែងការណ៏របស់
រដ្ឋសភាកម្ពុជា ក៏បានស្នើសុំឲ្យស្ថានទូតសហរដ្ឋអាមេរិកប្រចំាកម្ពុជា ជម្រាបទៅក្រសួងការបរទេសសហរដ្ឋអាមេរិកជាបន្ទាន់ អំពីសេចក្តីថ្លែងការណ៏របស់រដ្ឋសភាកម្ពុជានេះ ៕
ចែករំលែកព័តមាននេះ