ខេត្តក្រចេះ ៖ ឈើគ្រញូងចំនួន២០កំណាត់ និងមានទម្ងន់ជិត៣០០គីឡូក្រាម ត្រូវកម្លាំងសមត្ថកិច្ចចម្រុះបង្ក្រាបបានកាលពីព្រឹកថ្ងៃទី១១ មិថុនា នៅលើផ្លូវជាតិលេខ៧ ខណៈដែលឈើគ្រញូងនេះដឹកតាមរថយន្តកាមរីបាឡែនមួយគ្រឿង តម្រង់ឆ្ពោះទៅព្រំដែនវៀតណាម ។
ខេត្តក្រចេះ ៖ ឈើគ្រញូងចំនួន២០កំណាត់ និងមានទម្ងន់ជិត៣០០គីឡូក្រាម ត្រូវកម្លាំងសមត្ថកិច្ចចម្រុះបង្ក្រាបបានកាលពីព្រឹកថ្ងៃទី១១ មិថុនា នៅលើផ្លូវជាតិលេខ៧ ខណៈដែលឈើគ្រញូងនេះដឹកតាមរថយន្តកាមរីបាឡែនមួយគ្រឿង តម្រង់ឆ្ពោះទៅព្រំដែនវៀតណាម ។
ការឃាត់រថយន្តបាឡែនដឹកឈើគ្រញូង ដែលធ្វើឡើងដោយក្រុមសមត្ថកិច្ចចម្រុះនាព្រឹកនោះ កម្លាំងជំនាញក៏បានឃាត់ខ្លួនបុរសជាអ្នកបើកបរឈ្មោះ សែន ធឿន និងដកហូតបានរថយន្តកាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ 2P-4570 ។ នេះអាចចាត់ទុកថា ជាការចាប់ខ្លួនដ៏កម្រមួយ ចំពោះអ្នកបើករថយន្តដឹកឈើគ្រញូង ច្រើនតែមន្ត្រីសមត្ថកិច្ចប្រាប់ថា បានរត់គេចខ្លួនចោលរថយន្ត ។ មន្ត្រីជំនាញផ្នែករដ្ឋបាលព្រៃឈើក្រចេះឱ្យដឹងថា រថយន្តមួយគ្រឿងនេះត្រូវកម្លាំងសមត្ថកិច្ចស្ទាក់ចាប់បាននៅលើផ្លូវជាតិលេខ៧ ត្រង់ចំណុចអូរតាកុដ ក្នុងឃុំសំបុក ស្រុកចិត្របុរី។ រថយន្តនេះត្រូវសមត្ថកិច្ចយកទៅរក្សាទុកនៅស្ថានីយបណ្តុះកូនឈើខ្សារ និងវាស់វែងភ្លាមៗ ឈើទាំងនេះ មានចំនួន២០ដុំវែងៗ មានទម្ងន់២៥២គីឡូ ក្រាម ។
ប្រភពព័ត៌មានបន្តថា ឈើគ្រញូងទាំងនេះ គេសន្និដ្ឋានថា ឈ្មួញបានលួចដឹកចេញពីខេត្តស្ទឹងត្រែង ឆ្លងកាត់ខេត្តក្រចេះ ឆ្ពោះទៅស្រុកមេមត់ ខេត្តកំពង់ចាម ដើម្បីនាំចេញទៅប្រទេសវៀតណាម ។ មន្ត្រីជំនាញរដ្ឋបាលព្រៃឈើឱ្យដឹងថា ជនសង្ស័យជាម្ចាស់រថយន្តនិងជាអ្នកបើកបរ ត្រូវសមត្ថកិច្ចឃាត់ខ្លួននាំទៅសាកសួរនៅបញ្ជាការដ្ឋានកងរាជអាវុធហត្ថខេត្ត ៕
ចែករំលែកព័តមាននេះ