ខេត្តក្រចេះ ៖ ឈើលេខ១ប្រភេទកកោះ និងស្រឡៅចំនួនជិត២០ម៉ែត្រគូប និងរថយន្តកូរ៉េមួយគ្រឿងបានត្រូវកម្លាំងអភិរក្សជីវចម្រុះសីមាឃាត់ចាប់ កាលពីព្រឹកថ្ងៃទី១០ មិថុនា នៅក្នុងបរិវេណក្រុមហ៊ុនវិនិយោគព្រៃសម្បទានធីធីហ្វាយ មានទីតាំងនៅចំណុចគីឡូម៉ែត្រលេខ១៣១ ក្នុងភូមិសាស្ត្រព្រៃដែនជម្រកស្នួល ឃុំ២ធ្នូ ស្រុកស្នួល ។
ខេត្តក្រចេះ ៖ ឈើលេខ១ប្រភេទកកោះ និងស្រឡៅចំនួនជិត២០ម៉ែត្រគូប និងរថយន្តកូរ៉េមួយគ្រឿងបានត្រូវកម្លាំងអភិរក្សជីវចម្រុះសីមាឃាត់ចាប់ កាលពីព្រឹកថ្ងៃទី១០ មិថុនា នៅក្នុងបរិវេណក្រុមហ៊ុនវិនិយោគព្រៃសម្បទានធីធីហ្វាយ មានទីតាំងនៅចំណុចគីឡូម៉ែត្រលេខ១៣១ ក្នុងភូមិសាស្ត្រព្រៃដែនជម្រកស្នួល ឃុំ២ធ្នូ ស្រុកស្នួល ។
ប្រភពព័ត៌មានបានឱ្យដឹងថា ការចាប់ឈើខុសច្បាប់នៅក្នុងទីតាំងក្រុមហ៊ុនវិនិយោគព្រៃសម្បទាននេះបានធ្វើឡើងពេញមួយព្រឹកដោយមន្ត្រីអភិរក្សជីវចម្រុះសីមា តែមន្ត្រីសមត្ថកិច្ចពុំបានចាប់ឃាត់ជនណាម្នាក់ដែលជាប់ចោទក្នុងជំនួញឈើខុសច្បាប់ទាំងនេះទេ ។ ប្រភពពីមន្ត្រីដែលចុះបង្ក្រាបបានឱ្យដឹងថា ឈើទាំងនេះត្រូវបានគេរកឃើញនៅក្នុងព្រៃក្នុងបរិវេណដីរបស់ក្រុមហ៊ុនសម្បទានសេដ្ឋកិច្ចដែលមានទីតាំងក្នុងព្រៃដែនជម្រកសត្វស្នួល គឺសុទ្ធសឹងជាឈើលេខ១ប្រភេទកកោះ និងស្រឡៅមានចំនួនជិត២០ម៉ែត្រគូប ។
ជាមួយនឹងការបង្ក្រាបនេះ សមត្ថកិច្ចក៏បានចាប់ឃាត់រថយន្តកូរ៉េមួយគ្រឿងដែលមានផ្ទុកឈើកកោះជាច្រើនដុំនិងកំពុងជាប់ផុងនៅតាមផ្លូវក្នុងក្រុមហ៊ុននេះផងដែរ ។ ក្រោយពីចាប់ឃាត់រួច រថយន្តនិងឈើទាំងនេះត្រូវបានមន្ត្រីជំនាញនាំទៅរក្សាទុកនៅស្នាក់ការអភិរក្សជីវចម្រុះសីមា ដែលមានទីតាំងនៅស្រុកកែវសីមា ខេត្តមណ្ឌលគិរី ។ ប្រភពព័ត៌មានបានឱ្យដឹងទៀតថា ឈើទាំងនេះគឺសុទ្ធសឹងជាឈើខុសច្បាប់ដែលជ្រកក្រោមរូបភាពក្រុមហ៊ុនវិនិយោគដីសម្បទាន និងបានអារច្រៀកចេញពីក្រុមហ៊ុនប៊ិញភឿក២ រួចដឹកចេញពីគីឡូម៉ែត្រលេខ១១៥ឆ្ពោះទៅប្រទេសវៀតណាមតាមច្រករបៀង ។
ប្រជាពលរដ្ឋនិយាយថា ការដឹកជញ្ជូនខុសច្បាប់នូវឈើអារលេខ១ ប្រភេទកកោះ និងស្រឡៅនេះកំពុងកើតមានពេញបន្ទុកនៅក្នុងទឹកដីដែនជម្រកសត្វព្រៃស្នួល ដែលការដឹកជញ្ជូនបានធ្វើឡើងទាំងយប់ទាំងថ្ងៃ ពីសំណាក់ក្រុមឈ្មួញមានអំណាចមួយចំនួន ដោយដឹកតាមរថយន្តធុនធំ ប្រភេទរថយន្តច្នៃ នាំឆ្ពោះទៅប្រទេសវៀតណាម ។ ប្រភពព័ត៌មានបញ្ជាក់ថា ឈ្មួញឈើដែលកំពុងធ្វើសកម្មភាពដឹកជញ្ជូនឈើលេខ១ខុសច្បាប់នេះ គឺគេឃើញមានវត្តមានលោក ហ៊ត ប៊ុនគីម ដែលជាមន្ត្រីយោធានិងដែលគេស្គាល់ថា ជាមេឈ្មួញរកស៊ីឈើខុសច្បាប់ដ៏ធំប្រចាំតំបន់នេះផងដែរ ។
ប្រជាពលរដ្ឋនិយាយទៀតថា កន្លងមក សហគមន៍ ក៏ដូចជាប្រជាពលរដ្ឋ បានប្តឹងរាយការណ៍ទៅលោក គង់ ងីម ប្រធានដែនជម្រកសត្វព្រៃស្នួល ដើម្បីមានវិធានការបង្ក្រាប និងទប់ស្កាត់បទល្មើសដឹកជញ្ជូនឈើអនាធិបតេយ្យនេះដែរ តែលោកមិនដែលលើកទូរស័ព្ទឡើយ ។ ចំណែកកោះសន្តិភាពក៏បានសុំការបំភ្លឺទៅលោក គង់ ងីម ជុំវិញការដឹកជញ្ជូនឈើអនាធិបតេយ្យ ក្នុងព្រៃដែនជម្រកជ្រកក្រោមរូបភាពក្រុមហ៊ុនវិនិយោគនេះ តែលោកមិនលើកទូរស័ព្ទទេ កាលពីព្រឹកថ្ងៃទី១០ មិថុនា ៕
ចែករំលែកព័តមាននេះ