ខេត្តបាត់ដំបង ៖ ថៅកែរកស៊ីនាំចូលជ្រូកពីប្រទេសថៃម្នាក់ បានត្រូវខ្មាន់កាំភ្លើងស្ទាក់បាញ់ប្រហារ កាលពីវេលាម៉ោង១ និង៣០នាទី រំលងអធ្រាត្រឈានចូលថ្ងៃទី៩ មិថុនា នៅលើកំណាត់ផ្លូវជាតិលេខ៥៩ ត្រង់ចំណុចភូមិអូរអំពរ ឃុំអូរអំពរ ស្រុកម៉ាឡៃ ខេត្តបន្ទាយមានជ័យ ក្បែរព្រំប្រទល់ស្រុកសំពៅលូន ខេត្តបាត់ដំបង ដែលគេសង្ស័យថា ជារឿងរត់ពន្ធឈើគ្រញូង ។
ខេត្តបាត់ដំបង ៖ ថៅកែរកស៊ីនាំចូលជ្រូកពីប្រទេសថៃម្នាក់ បានត្រូវខ្មាន់កាំភ្លើងស្ទាក់បាញ់ប្រហារ កាលពីវេលាម៉ោង១ និង៣០នាទី រំលងអធ្រាត្រឈានចូលថ្ងៃទី៩ មិថុនា នៅលើកំណាត់ផ្លូវជាតិលេខ៥៩ ត្រង់ចំណុចភូមិអូរអំពរ ឃុំអូរអំពរ ស្រុកម៉ាឡៃ ខេត្តបន្ទាយមានជ័យ ក្បែរព្រំប្រទល់ស្រុកសំពៅលូន ខេត្តបាត់ដំបង ដែលគេសង្ស័យថា ជារឿងរត់ពន្ធឈើគ្រញូង ។
សមត្ថកិច្ចឲ្យដឹងថា ថៅកែជ្រូកនោះឈ្មោះលឹម ប៊ុនលេង ហៅវៃ អាយុ៣១ឆ្នាំដែរ មានភរិយាឈ្មោះឡុំ វណ្ណី អាយុ៣១ឆ្នាំដែរ រស់នៅភូមិ១៣មករា សង្កាត់ព្រែកព្រះស្ដេច ក្រុងបាត់ដំបង ។ បុរសនេះត្រូវខ្មាន់កាំភ្លើងស្ទាក់បាញ់ប្រហារជាច្រើនគ្រាប់ ខណៈពេលកំពុងធ្វើដំណើរក្នុងរថយន្ត ជាមួយអ្នកបើកបរឈ្មោះ ហោ ដារ៉ា ភេទប្រុស អាយុ២៨ឆ្នាំ រស់នៅភូមិកាប់គោថ្មី សង្កាត់អូរចារ ក្រុងបាត់ដំបង ។ ថៅកែជ្រូកត្រូវខ្មាន់កាំភ្លើងបាញ់ត្រូវ១គ្រាប់ចំក្រោមស្លាបប្រចៀវខាងឆ្វេង ហើយបានស្លាប់តាមផ្លូវពេលអ្នកបើកបរព្យាយាមបញ្ជូនមកកាន់មន្ទីរពេទ្យខេត្តបាត់ដំបង ។
ប៉ុន្តែអំពើបាញ់ប្រហារដ៏ឃោរឃៅនេះត្រូវគេសង្ស័យថា ជាអំពើបាញ់ប្រហារដែលកើតចេញពីជម្លោះផលប្រយោជន៍រឿងរត់ពន្ធឈើគ្រញូង ដែលភាគីដៃដល់ជាមន្រ្តីយោធា ។ អ្នកបើកបររថយន្តឈ្មោះហោ ដារ៉ា ត្រូវបានគេស្រង់សម្ដីថា មុនពេលកើតហេតុបន្តិចនៅវេលារំលងអធ្រាត្រនាយប់នោះ ខ្លួននិងថៅកែបានបើករថយន្តចេញពីព្រំដែននៅចំណុចភូមិអូរអំពរ ស្រុកម៉ាឡៃ ឆ្ពោះមកកាន់ស្រុកសំពៅលូន ហើយត្រឡប់មកផ្ទះវិញ ក្រោយពីទិញជ្រូករួច ។ អ្នកបើកបររូបនេះប្រាប់ថា ពេលមកដល់ចំណុចកើតហេតុខ្លួនប្រទះឃើញរថយន្តកាមរីបាឡែន១គ្រឿងពណ៌កណ្តុរល្មែះសេ៊រីឆ្នាំ២០០២ពាក់ស្លាកលេខភ្នំពេញ ២P-០៨០១ឈប់ក្បែរចិញ្ចើមផ្លូវ ។
លុះពេលខ្លួនបើកហួស រថយន្តនោះបានបើកតាមពីក្រោយ និងវ៉ៃភ្លើងហ្វាស៊ីញ៉ូឲ្យខ្លួនឈប់ ។ ខណៈឃើញដូច្នេះខ្លួនបានបន្ថែមល្បឿនស្រាប់តែភ្លាមនោះអ្នកបើករថយន្តនោះបានបាញ់២គ្រាប់ពីក្រោយធ្វើឲ្យខ្លួនភ័យកាន់តែបន្ថែមល្បឿនទៀត តែត្រូវរថយន្តបាឡែននោះតាមទាន់ប្រកិតពីក្រោយរួច ដកកាំភ្លើងដែលមិនស្គាល់ម៉ាកបាញ់លើរថយន្តខ្លួនជិត១០គ្រាប់ទៀតបណ្ដាលឲ្យត្រូវថៅកែរបស់ខ្លួនពីក្រោយមួយគ្រាប់របួសធ្ងន់ ។ បុរសនេះបញ្ជាក់ថា នៅពេលស្ថិតក្នុងស្ថានភាពគ្រោះថ្នាក់ខ្លួនរឹតតែបន្ថែមល្បឿនដើម្បីដឹកថៅកែទៅកាន់មន្ទីរពេទ្យស្រុកសំពៅលូនតែរថយន្តខ្មាន់កាំភ្លើងនោះមិនបានដេញតាមទៀតទេក្រោយពីបាញ់ប្រហាររួច ។
លោក ហោ ដារ៉ា ត្រូវសមត្ថកិច្ចស្រង់សម្ដីទៀតថា ក្រោយពីគ្រូពេទ្យដាក់សេរ៉ូមបណ្ដោះអាសន្ន ខ្លួនក៏ដឹកថៅកែមកកាន់មន្ទីរពេទ្យបង្អែកខេត្ត ប៉ុន្តែដោយសារគាត់រងរបួសធ្ងន់ពេកក៏បានស្លាប់នៅចំណុចផ្សារជ្រៃ ឃុំជ្រៃ ស្រុកថ្មគោលទៅ ។ ផ្ទុយពីការអះអាងរបស់អ្នកបើកបររថយន្តថៅកែជ្រូកខាងលើនេះ បើតាមប្រភពព័ត៌មានពីស្រុកសំពៅលូនបានឱ្យដឹងថា ថៅកែជ្រូកឈ្មោះលឹម ប៊ុនលេង ហៅវៃនេះ ក្រៅពីរកស៊ីនាំចូលជ្រូកពីស្រុកសៀម លោកថៅកែវ័យក្មេងនេះ និងបក្សពួកប៉ុន្មាននាក់ទៀតក៏ឆ្លៀតនាំឈើគ្រញូងចូលពីស្រុកសៀមផងដែរ ។
ប្រភពព័ត៌មានឲ្យដឹងទៀតថា អំពើបាញ់ប្រហារដ៏ឃោរឃៅនោះគឺកើតឡើងបែបពាលស៊ីពាល ដែលពាក់ព័ន្ធនឹងផលប្រយោជន៍ផ្ទាល់ខ្លួន ។ សាក្សីខ្លះអះអាងថា ខ្មាន់កាំភ្លើងដែលជិះរថយន្តបាឡែននោះគឺជាមន្រ្តីយោធាថ្នាក់វរសេនីយ៍ត្រីដែលគេស្គាល់អង្គភាព និងទីតាំងឈរជើងរួចហើយ ។ ប្រភពដដែលបញ្ជាក់ថា ថៅកែជ្រូកនោះជិះរថយន្តកាមរីបាឡែនស៊េរីឆ្នាំ២០០២ដែរ ពណ៌ទឹកប្រាក់ គ្មានស្លាកលេខទេជាមួយនឹងរថយន្តបក្សពួកគេប៉ុន្មានគ្រឿងទៀត បើកអមការពាររថយន្តដឹកឈើដ៏ធំមួយគ្រឿងចេញពីស្រុកម៉ាឡៃ ខេត្តបន្ទាយមានជ័យ ឆ្ពោះមកកាន់ខេត្តបាត់ដំបង ។ លុះមកដល់ចំណុចកើតហេតុ មន្រ្តីយោធាមួយក្រុមបានស្ទាក់ចាប់រថយន្តដឹកឈើនោះ ដើម្បីចរចាបង់ប្រាក់តែដោយមិនត្រូវថ្លៃ ក៏ផ្ទុះជម្លោះឈានដល់ការដកកាំភ្លើងមកដោះស្រាយដោយបាញ់ប្រហារគ្នាបណ្ដាលឲ្យថៅកែជ្រូកដែលដឹកឈើគ្រញូងរបួសធ្ងន់រហូតដល់ស្លាប់ ។
រីឯរថយន្តយក្សដឹកឈើគ្រញូងនោះក៏ត្រូវកម្លាំងយោធាការិយាល័យទី២ មណ្ឌល៥ដែលមានទីតាំងនៅម្ដុំឃ្លាំងស្ថានីយប្រេងសូគីម៉ិច ក្នុងសង្កាត់ព្រែកព្រះស្ដេច ក្រុងបាត់ដំបង ស្ទាក់ចាប់បាននៅវេលាម៉ោង៤ទៀបភ្លឺថ្ងៃទី៩ មិថុនា លើផ្លូវជាតិលេខ៥ក្នុងភូមិអណ្ដូងចេញ សង្កាត់អូរចារ ក្រុងបាត់ដំបង ។ បច្ចុប្បន្នទាំងរថយន្ត ទាំងឈើ ត្រូវបានយោធារក្សាទុកក្នុងអង្គភាពខាងលើនេះនៅឡើយដែលគេដឹងថា មានជាង៧ម៉ែត្រគូបឯណោះ ។
ជុំវិញការសង្ស័យថា ថៅកែជ្រូកជាប់ពាក់ព័ន្ធនឹងការរត់ពន្ធឈើគ្រញូងនោះ អ្នកស្រីឡុំ វណ្ណី ជាប្រពន្ធជនរងគ្រោះបានអះអាងប្រាប់សមត្ថកិច្ចថា ស្វាមីគាត់មិនបានរកស៊ីរត់ពន្ធឈើគ្រញូងក្រៅពីរកស៊ីទិញជ្រូកទេ ។
អ្នកស្រីបញ្ជាក់ថា នៅយប់កើតហេតុនោះគឺស្វាមីអ្នកស្រីត្រឡប់មកពីយកលុយទៅឲ្យថ្លៃជ្រូកគេមិនមែនរកស៊ីដឹកឈើគ្រញូងដូចការចោទប្រកាន់នោះឡើយ ។ អ្នកស្រីបានស្នើឲ្យសមត្ថកិច្ចគ្រប់ស្ថាប័នជូយរកយុត្តិធម៌ និងស្វែងរកជនដៃដល់ដែលបាញ់ប្រហារស្វាមីគាត់យកមកផ្ដន្ទាទោសផង ។
មិនអាចទាក់ទងសុំការបំភ្លឺពីមន្រ្តីយោធាការិយាល័យទី២ ចំណុះជើងគោកមណ្ឌលទី៥បានទេនៅព្រឹកថ្ងៃទី១០មិថុនា ជុំវិញករណីខាងលើនេះ ។ ប៉ុន្តែមន្រ្តីព្រៃឈើបានឲ្យដឹងថា ពួកគេបានចុះទៅពិនិត្យឈើមួយរថយន្តធំនោះហើយ ប៉ុន្តែមន្រ្តីយោធានៅមិនទាន់អនុញ្ញាតឲ្យនាំយកឈើទាំងនោះចេញទេ ។ រីឯសមត្ថកិច្ចជំនាញវិញ ក៏បានឲ្យដឹងដែរថា ព័ត៌មានដែលទាក់ទិននឹងរឿងបាញ់សម្លាប់មនុស្ស ពាក់ព័ន្ធនឹងរឿងរត់ពន្ធឈើគ្រញូងនេះ មិនត្រូវគេបើកទូលាយឲ្យធ្វើការស៊ើបអង្កេតទេ ទាំងភាគីបង្កទាំងភាគីរងគ្រោះហាក់ដូចជាមានការលាក់លៀមនៅឡើយ ក៏ប៉ុន្តែទោះបីជាយ៉ាងណា សមត្ថកិច្ចកំពុងធ្វើការស្រាវជ្រាវលើករណីនេះបន្តទៀត ៕
ចែករំលែកព័តមាននេះ