ខេត្តកំពង់ឆ្នាំង ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានឱ្យអង្គភាពព័ត៌មាន និងប្រតិកម្មរហ័សទីស្តីការគណៈរដ្ឋមន្ត្រី បញ្ជូនខ្សែអាត់ជាភាសាខ្មែរ ជាភាសាអង់គ្លេស និងជាភាសាបារាំងទៅឱ្យស្ថានទូតនានាប្រចាំនៅកម្ពុជាទាំងអស់ដើម្បីឱ្យគេយល់ដឹងថា ហេតុអ្វីបានជាលោកហ៊ុន សែន និយាយពីសង្គ្រាម បើសិនជាបក្សប្រឆាំងឈ្នះពិតប្រាកដ ។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍ឱ្យអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រីបញ្ជូនខ្សែអាត់ទៅតាមបណ្តាស្ថានទូតនានាដូច្នេះនាព្រឹកថ្ងៃទី១០ មិថុនា នៅក្នុងឱកាសដែលសម្តេចអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធសាលាធម្មសភាក្នុងវត្តសុវណ្ណេសនារាម ស្ថិតក្នុងឃុំអភិវឌ្ឍន៍ និងសមិទ្ធផលនានាមួយចំនួនទៀត ក្នុងស្រុកទឹកផុស ខេត្តកំពង់ឆ្នាំង ។ សម្តេចតេជោនាយករដ្ឋមន្ត្រីមានប្រសាសន៍ថា សម្តេចបានទៅបកស្រាយនៅរដ្ឋសភារយៈពេលជាង៥ម៉ោង ព្រមទាំងបានធ្វើការផ្សាយបន្តផ្ទាល់ ដែលមានប្រជាពលរដ្ឋបានទស្សនារាប់លាននាក់ ។
សម្តេចតេជោបានឱ្យធ្វើការផ្សព្វផ្សាយរហូតដល់ថ្ងៃបោះឆ្នោតគឺគ្មានថ្ងៃឈប់ទេ បើលោកឯងនៅតែបំពាន ខ្ញុំនៅតែផ្សាយរហូត ។ បក្សប្រឆាំងមានគោលបំណងទាមទារយកមកវិញទឹកដីកម្ពុជាក្រោម កោះត្រល់ គេថាគេមិនធ្វើសង្គ្រាមទេ គេប្តឹងតុលាការអន្តរជាតិទីក្រុងឡាអេ ។ សម្តេចតេជោមានប្រសាសន៍ថា កាលដែលព្រះករុណាព្រះបរមរតនកោដ្ឋទ្រង់គង់នៅក៏ព្រះអង្គចង់បានមកវិញដែរ ក៏ប៉ុន្តែបើព្រះអង្គយកមកវិញបានព្រះអង្គយកតាំងពីព្រះអង្គនៅគ្រងរាជ្យ ឬកាលដែលនៅធ្វើព្រះប្រមុខរដ្ឋម្ល៉េះ មុនដែលគេធ្វើរដ្ឋប្រហារទម្លាក់ព្រះអង្គ ។ ពាក់ព័ន្ធនឹងការប្តឹងទៅតុលាការអន្តរជាតិ សម្តេចតេជោ មានប្រសាសន៍ថា បើអស់លោកប្តឹងទៅ តុលាការអន្តរជាតិយកមកបាន ប្រហែលជាសម្តេចព្រះនរោត្តម សីហនុ ព្រះអង្គបានប្រើមធ្យោបាយយកមកវិញ តាំងពីលោកឯងមិនទាន់មានកំណើតម្ល៉េះ ។
ព្រះអង្គតស៊ូដើម្បីព្រះរាជបូជនីយកិច្ច ជីវពល នារីក្លាហាន កាំភ្លើងឈើ ដើម្បីទាមទារឯករាជ្យពីបារាំង ។ បន្ទាប់ទៅ ព្រះអង្គបានផ្តួចផ្តើមគំនិតផ្ទាល់យកផែនទីទៅដាក់តម្កល់នៅអង្គការសហប្រជាជាតិ ។ ហេតុអ្វីបានជាព្រះអង្គធ្វើយ៉ាងដូច្នេះ ម៉េចក៏ព្រះអង្គមិនប្តឹងទៅតុលាការអន្តរជាតិក្រុងឡាអេ តាំងពីជំនាន់នោះ បានទុកឱ្យលោកនៅឆ្នាំ២០១៣ ទើបលោកប្តឹង ។ បើដូច្នេះលោកឯងខ្លាំងជាងសម្តេចឪឬអ្វី ? នៅក្នុងគណបក្សរបស់លោកឯង លោកឯងអត់ទាន់គ្រប់គ្រងបានទាំងមូលទេ តើលោកឯងចង់យកខ្សែអាត់ដែលថតបានឬ?
ផ្ទុយទៅវិញ ខ្ញុំទៅវិញទេ គ្រប់គ្រងគណ បក្សលោកឯងបាននោះ ។ សម្តេចតេជោ នាយករដ្ឋមន្ត្រីបញ្ជាក់ថា បើប្តឹងទៅតុលាការអន្តរជាតិទីក្រុងឡាអេយកមកវិញបាននោះ ព្រះមហាក្សត្រ សម្តេចព្រះនរោត្តមសីហនុ ព្រះអង្គពិតជាមិនទុកឱកាសឱ្យពួកលោកឯងទេ ព្រះអង្គពិតជាធ្វើការងារនេះ បំពេញនូវព្រះរាជកិច្ចនេះ ហើយនាំមកនូវទឹកដីដែលបានបាត់បង់តាំងពីយូរយារឱ្យកូនចៅវិញបាត់រួចទៅហើយ មិនចាំបាច់មានមុខលោកឯងទេ ។
ដោយសារលទ្ធភាពមានកម្រិត នៅខាងព្រំដែនថៃព្រះអង្គបានប្តឹងតែរឿងបញ្ហាទាក់ទិនទៅនឹងតំបន់ប្រាសាទព្រះវិហារទេ អត់បានទាមទារខេត្តពីថៃទេ ។
សម្តេចបានរិះគន់បក្សប្រឆាំងថា លោកឯងដាក់គោលដៅទៅយក តែដីកម្ពុជាក្រោម ហូជីមិញ (ព្រៃនគរ)ចុះហេតុអ្វីក៏លោកឯងមិនដាក់គោលដៅទៅយកអាយុធ្យា សុរិន្ទ…ផងទៅ? លោកឯងទៅលេងតែជាមួយវៀតណាម ដើម្បីមានពេលវាយប្រហារគណបក្សប្រជាជនកម្ពុជា វាយប្រហារនាយករដ្ឋមន្ត្រីហ៊ុន សែន ។ ឥឡូវសម្តីទាំងអស់ ការប្រមាថ កាតទានរបស់ពួកប្រឆាំងមកលើគណបក្សប្រជាជនដែលយើងថតសំឡេងបាន ត្រូវអង្គភាពព័ត៌មាននិងប្រតិកម្មរហ័សបញ្ជូន ដោយទុកភាសាដើមរបស់គេ ហើយយកជាខ្មែរ លោកណានិយាយនៅឯណា ហើយបកប្រែជាភាសាអង់គ្លេសបកប្រែជាភាសាបារាំង ជូនគេទៅ ដើម្បីឱ្យគេមើលឃើញនូវចំណុចសង្គ្រាមថានឹងកើតមាន…. ។
សម្តេចតេជោមានប្រសាសន៍ថា គោលដៅរបស់បក្សប្រឆាំង គេចង់យកព្រៃនគរឯណោះ ។ យើងអាចផ្ញើខ្សែអាត់ទៅឱ្យគណបក្សគេវិញ ។ បើសិនជាហា៊នថ្លែងថា អត់បាននិយាយ ព្រោះនិយាយហើយថា អត់បាននិយាយទៅវិញ គឺសំឡេងរបស់លោកឯងគេស្តាប់បានទេតើ ដែលកាលនិយាយចេញពីខេត្តតាកែវ ម្នាក់ដដែលហ្នឹងដែលនិយាយប្រមាថដល់ព្រះបរមសពទៀត ។ ទាក់ទិននឹងនយោបាយក្នុងប្រទេស មិនទាន់បានកាន់អំណាចផង ត្រៀមចាប់នាយករដ្ឋមន្ត្រី រដ្ឋមន្ត្រីរបស់រាជរដ្ឋាភិបាលបច្ចុប្បន្នយកទៅកាត់ទោសទៅហើយ តើសង្គ្រាមវាផ្ទុះទេ ?
លោកឯងមិនទាន់បានកាន់អំណាចផង ហ៊ានប្រមាថកាតទានគេទៅហើយ ។
អ្នកនិយាយនៅក្រៅប្រទេសនិងនិយាយនៅកំពង់ធំ មានសំឡេងខ្លះចាក់តាមវិទ្យុ សំឡេងខ្លះអត់ចាក់ទេ ប៉ុន្តែយើងថតបាន ។ ការប្រមាថមិនឈប់ឈរមិនយកខ្មែរធ្វើសត្រូវទេ ប៉ុន្តែយកខ្មែរដែលបោះឆ្នោតឱ្យគណបក្សប្រជាជនសុទ្ធតែយួនទាំងអស់ ។ ចំពោះចំណុចនេះ តើសង្គ្រាមវាកើត ឬមិនកើត ? សម្តេចតេជោមានប្រសាសន៍ថា ខ្ញុំមានអំណះអំណាងថា នឹងច្របូកច្របល់កើតឡើង បើពួកគេឈ្នះឆ្នោត ។ ប៉ុន្តែរឿងឈ្នះវានៅដាច់ឆ្ងាយណាស់ ព្រោះខេត្តកំពង់ឆ្នាំងវាទាល់តែវាយទម្លាក់ឱ្យគណបក្សប្រជាជនឱ្យនៅសល់សូន្យកៅអី ឬមួយកៅអី ប៉ុន្តែលោកឯងពិបាកយកណាស់ ខ្ញុំស្គាល់ក្រយៅលោកឯងពេក ។
សម្តេចតេជោនាយករដ្ឋមន្ត្រីបញ្ជាក់ថា គ្រប់ម៉ាត់ដែលគេជេរគណបក្សប្រជាជនជាអាយ៉ងជាក្បាលយួនខ្លួនខ្មែរ …ត្រូវបញ្ជូនខ្សែអាត់ទៅពួកសិទ្ធិមនុស្សនៅរាជធានីភ្នំពេញ ទាំងពួកសិទ្ធិមនុស្សខ្មែរ សិទ្ធិមនុស្សបរទេស អាដហុក លីកាដូ បញ្ជូនឱ្យគេព្រោះក្រែងគេខ្វះព័ត៌មានឱ្យទាំងសំឡេង បកជាអង់គ្លេស បារាំង ឱ្យដឹងថាអ្នកតំណាងរាស្ត្រ ឬបេក្ខជនតំណាងរាស្ត្រនិយាយពីអ្វី នៅកន្លែងណា សម្តីហ្នឹងប្រកាន់ពូជសាសន៍ឬអត់ ហើយជាសម្តីបង្កើតការបែកបាក់ជាតិ ឬអត់ ។
ខ្ញុំកាន់អំណាច អ្នកណាក៏នៅជាមួយបានដែរ រាប់ទាំងអ្នកជេរខ្ញុំក៏នៅជាមួយបាន សាសនាណាក៏នៅជាមួយបានដែរ ។ ប៉ុន្តែសម្រាប់ពួកគេវិញមិនទាន់បានអំណាចផង គេត្រៀមចាប់ខ្លួនអ្នកដែលកំពុងកាន់អំណាចបច្ចុប្បន្នកាត់ទោសទៅហើយ ។ លោកទូច ម៉ារីម អភិបាលខេត្តកំពង់ឆ្នាំងបានថ្លែងថា ក្រោមការដឹកនាំរបស់សម្តេចតេជោនាយករដ្ឋមន្ត្រី ដោយប្រកាន់យកគោលជំហរ បើកទូលាយ នូវសេរីភាពខាងជំនឿសាសនា ប្រជាពលរដ្ឋក្នុងខេត្តកំពង់ឆ្នាំង កំពុងរស់នៅជាមួយគ្នាយ៉ាងសុខដុមរមនា រួមគ្នាអភិវឌ្ឍន៍ប្រទេសជាតិ ដោយមិនមានការរើសអើង ឬបែងចែកជំនឿសាសនាអ្វី
ឡើយ ។
បច្ចុប្បន្ននៅទូទាំងខេត្តមានវត្តអារាមសរុប២០៣កន្លែង អាស្រម២៥កន្លែង មានព្រះសង្ឃសរុប២.៤៩៨អង្គ យាយជីតាជី ៥៥៦នាក់ អាចារ្យ៦០៤
នាក់ ។ អ៊ិស្លាមសាសនា មានវិហារ៥៨កន្លែង ស៊ូរ៉ាវ ២៩ គ្រឹស្តសាសនាមានវិហារ៧១កន្លែង និងពុទ្ធសាសនាមហាយានមានវិហារ៥កន្លែង ។ ខេត្តមានពុទ្ធិកបឋមសិក្សា និងពុទ្ធិកមធ្យមសិក្សាគ្រប់កម្រិតថ្នាក់ ព្រមទាំងពុទ្ធិកសាកលវិទ្យាល័យមានសមណនិស្សិត-និស្សិតសរុប ២.៥៩៨អង្គ-នាក់ ។
ដោយឡែក សាលាធម្មសភា និងសមិទ្ធផលនានាដែលស្ថិតនៅចំពោះមុខនេះក៏បានកសាងឡើងជាបន្តបន្ទាប់ ដោយមានការឧបត្ថម្ភគាំទ្រកសាងពីសម្តេចតេជោ និងសម្តេចកិត្តិព្រឹទ្ធបណ្ឌិត និងពីសប្បុរសជននានាមាន លោកត្រាំ អីុវតឹក រដ្ឋមន្ត្រីក្រសួងសាធារណការនិងដឹកជញ្ជូន និងលោក លោកស្រី ជាច្រើនរូបទៀតចាប់តាំងពីឆ្នាំ២០០៨ រហូតដល់ឆ្នាំ២០១៣ ទើបបានរួចរាល់ជាស្ថាពរ ដោយចំណាយអស់ថវិកាសរុប៣០៤.១៧៨ដុល្លារអាមេរិក ។
នេះជាសក្ខីភាពបញ្ជាក់ឱ្យកាន់តែច្បាស់ថែមទៀត ពីការរីកចម្រើនឥតឈប់ឈរលើគ្រប់វិស័យ ទាំងផ្នែកអាណាចក្រនិងពុទ្ធចក្រ ដោយផ្តើមចេញពីការអនុវត្តគោលនយោបាយដ៏ត្រឹមត្រូវរបស់រាជរដ្ឋាភិបាលនៃព្រះរាជាណាចក្រកម្ពុជាដែលមានសម្តេចតេជោជាប្រមុខដឹកនាំ ៕
ចែករំលែកព័តមាននេះ