រាជធានីភ្នំពេញ ៖ សមាគមជួបជុំបងប្អូនកាលពីព្រឹកថ្ងៃទី៨ មិថុនា បាននាំយកអង្ករជាង២តោន (៤៥បាវ) និងសម្ភារជាគ្រឿងឧបភោគបរិភោគមួយចំនួនផ្តល់ឱ្យកុមារកំព្រា និងផ្ទុកមេរោគអេដស៍ចំនួន២៤៥នាក់នៅអង្គការ-សមាគមចំនួនបីផ្សេងៗគ្នារួមមាន សមាគមអភិវឌ្ឍន៍គ្រួសារពលី និងកុមារកំព្រា សមាគមរស្មីកុមារកម្ពុជា (ស.រ.ក.ក) និងអង្គការសេវាហេភីទ្រី ។
រាជធានីភ្នំពេញ ៖ សមាគមជួបជុំបងប្អូនកាលពីព្រឹកថ្ងៃទី៨ មិថុនា បាននាំយកអង្ករជាង២តោន (៤៥បាវ) និងសម្ភារជាគ្រឿងឧបភោគបរិភោគមួយចំនួនផ្តល់ឱ្យកុមារកំព្រា និងផ្ទុកមេរោគអេដស៍ចំនួន២៤៥នាក់នៅអង្គការ-សមាគមចំនួនបីផ្សេងៗគ្នារួមមាន សមាគមអភិវឌ្ឍន៍គ្រួសារពលី និងកុមារកំព្រា សមាគមរស្មីកុមារកម្ពុជា (ស.រ.ក.ក) និងអង្គការសេវាហេភីទ្រី ។
លោក អូខេហ្សេ ព្រីនស្វៀល អេហ្សេឃីល ប្រធានសមាគមជួបជុំបងប្អូន មានប្រសាសន៍ថា សមាគមជួបជុំបងប្អូនបានបង្កើតឡើងជាង៣ឆ្នាំមកហើយ ក្នុងគោលបំណងជួយកុមារកំព្រាដែលឪពុកម្តាយស្លាប់ចោល និងកុមារដែលមានផ្ទុកមេរោគអេដស៍នៅក្នុងប្រទេសកម្ពុជា ។ ចំណែកអង្ករនិងសម្ភារជាឧបភោគបរិភោគដែលនាំយកមកក្នុងថ្ងៃនេះបានមកពីទឹកចិត្តរបស់សមាជិកអង្គការនៅក្នុងប្រទេសកម្ពុជា និងសមាជិកដែលរស់នៅអាហ្វ្រិក អាហ្គានីស្ថាន និងបណ្តាប្រទេសផ្សេងៗមួយចំនួនទៀត ។
ក្នុងជំនួបជាមួយកុមារកំព្រា លោកប្រធានសមាគមបានផ្តាំផ្ញើដល់ប្អូនៗឱ្យធ្វើអំពើល្អ ស្តាប់បង្គាប់ ចេះសេពគប់មិត្តល្អ និងគោរពតាមដំបូន្មានខិតខំរៀនសូត្រ ។ លោកប្រធានបន្តថា សមាគមបានផ្តល់ជូនអង្ករដល់សមាគមអភិវឌ្ឍន៍គ្រួសារ និងកុមារកំព្រាចំនួន១៥បាវ សមាគមរស្មីកុមារកម្ពុជា (ស.រ.ក.ក) ១៥បាវ អង្គការសេវាហេភីទ្រី១៥បាវ និងសម្ភារជាគ្រឿងឧបភោគបរិភោគមួយចំនួនទៀត ។
លោកស្រី អ៊ុក មុនីណា ប្រធានផ្នែកមើលថែកុមារបានឱ្យដឹងថា សមាគមអភិវឌ្ឍន៍គ្រួសារពលី និងកុមារកំព្រា (SFODA) ជាអង្គការក្រៅរដ្ឋាភិបាលក្នុងស្រុកធ្វើការជាមួយកុមារកំព្រា និងកុមារងាយរងគ្រោះ គ្រួសារ និងសហគមន៍របស់ពួកគេ ដើម្បីលើកកម្ពស់ជីវភាពរស់នៅរបស់ពួកគេ ឆ្លើយតបតាមតម្រូវការរបស់ពួកគេស្របតាមអនុសញ្ញាស្តីពីសិទ្ធិកុមារ ។ សមាគមបានបង្កើតឡើងចាប់តាំងពីខែធ្នូ ឆ្នាំ១៩៩៧ ហើយសមាគមបានអប់រំកុមាររាប់រយនាក់មកហើយ និងបានជំនួយពីបងប្អូន អង្គការនៅក្នុងស្រុក និងបរទេស ។ បច្ចុប្បន្នសមាគមមានកុមាររស់នៅចំនួន៥១នាក់ ក្នុងនោះស្រី១៦នាក់ និងបុគ្គលិកបម្រើការងារ២៣នាក់ (ស្រីចំនួន១៧នាក់) បុគ្គលិកស្ម័គ្រចិត្តតាមសហគមន៍ និងមណ្ឌលចំនួន២៥នាក់ ក្នុងនោះមានជនបរទេសចំនួន៣នាក់ ។
លោកស្រីបន្ថែមថា សមាគមមានកម្មវិធី៤សម្រាប់កុមារគឺ ៖
ទី១-កម្មវិធីចិញ្ចឹមមណ្ឌល (ទទួលចិញ្ចឹមកុមារទូទាំងប្រទេស)
ទី២-កម្មវិធីថែទាំគាំទ្រកុមារ និងគ្រួសារដែលមានផ្ទុកមេរោគអេដស៍តាមសហគមន៍
ទី៣-កម្មវិធីអប់រំបង្ការមេរោគអេដស៍ ជំងឺអេដស៍ ដែលមានទំនាក់ទំនងនឹងគ្រឿងញៀន ។
ទី៤-គម្រោងកម្មវិធីបង្ការ និងលើកកម្ពស់កុមារ សេវាសុខភាពពីមេរោគអេដស៍ ជំងឺអេដស៍ កាមរោគ និងគ្រឿងញៀនចំពោះស្ត្រីបម្រើសេវាកម្សាន្តជនជាតិវៀតណាម ។
លោក ប៉ាត ណូន ប្រធានក្រុមប្រឹក្សាអភិបាលសមាគមរស្មីកុមារកម្ពុជា (ស.រ.ក.ក) បានឱ្យដឹងថា បច្ចុប្បន្នសមាគមមានកុមារកំព្រាចំនួន៥៥នាក់ ក្នុងនោះកុមារដែលស្នាក់នៅអចិន្ត្រៃយ៍ចំនួន៣០នាក់ (ស្រី១៣នាក់) និងកុមារដែលមកសិក្សាចំនួន២៥នាក់ (ស្រី១៤នាក់) និងនិស្សិតក្រីក្រចំនួន៣២នាក់ (ស្រី៤នាក់) កុមារកំព្រាភាគច្រើនត្រូវឪពុកម្តាយស្លាប់ចោលដោយសារជំងឺអេដស៍ និងអ្នកខ្លះត្រូវឪពុកម្តាយបោះបង់ចោល។ចំណែកអង្គការសេវាហេភីទ្រីមានកុមារកំព្រា និងផ្ទុកមេរោគអេដស៍ជាង១០០នាក់ ៕
ចែករំលែកព័តមាននេះ