រាជធានីភ្នំពេញ ៖ ជនសង្ស័យជាអ្នកចែកចាយថ្នាំញៀនម្នាក់ត្រូវបានកម្លាំងសមត្ថកិច្ចប៉ូលិសប៉ុស្ដិ៍រដ្ឋបាលកន្ទោកដើរល្បាតប្រទះឃើញ និងបានធ្វើការឃាត់ខ្លួនដោយដកហូតបានថ្នាំញៀនដែលលាក់ជាប់ក្នុងខ្លួនចំនួន១៣កញ្ចប់សម្រាប់យកទៅចែកចាយទៅឲ្យអ្នកប្រើប្រាស់ដែលរង់ចាំទិញ ។ ហេតុការណ៍នោះបានកើតឡើង កាលពីវេលាម៉ោង២និង១៥នាទីរំលងអធ្រាត្រឈានចូលថ្ងៃទី១០មិថុនា នៅមុខផ្ទះសំណាក់អូរដឹម ស្ថិតក្នុងបុរីលឹមឈាងហាក់ ក្នុងភូមិកន្ទោកខាងជើង សង្កាត់កន្ទោក ខណ្ឌពោធិ៍សែនជ័យ ។
ប្រភពព័ត៌មានពីសមត្ថកិច្ចបានឱ្យដឹងថា បុរសសង្ស័យខាងលើឈ្មោះលាតស៊ីណែត អាយុ២៦ឆ្នាំ ជាអ្នកបើកបររថយន្ត មានទីលំនៅភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ។ នៅមុនពេលកើតហេតុ កម្លាំងសមត្ថកិច្ចប៉ូលិសប៉ុស្ដិ៍កន្ទោក ដឹកនាំដោយលោកអនុសេនីយ៍ទោ អង តេង នាយប៉ុស្ដិ៍និងមានបញ្ជាដោយផ្ទាល់ពីសំណាក់លោកអធិការ ប៊ន សំអាត បានចេញល្បាតទប់ស្កាត់បទល្មើសនានានៅក្នុងភូមិសាស្រ្តរបស់ខ្លួន ។ ពេលនោះស្រាប់តែបានឃើញជនសង្ស័យម្នាក់នោះជិះម៉ូតូមួយគ្រឿងម៉ាកគុបជ្រុងសេ៩០ ពណ៌ទឹកប៊ិក ពាក់ស្លាកលេខភ្នំពេញ១T-៩៥៨០នៅត្រង់ចំណុចផ្ទះកោសជប់ម៉ាស្សាមួយកន្លែង ។
ដោយសារតែមានការសង្ស័យ កម្លាំងប៉ូលិសក៏បានឃាត់ឲ្យឈប់ដើម្បីត្រួតពិនិត្យ ប៉ុន្តែជននោះមិនបានឈប់ឡើយ ។
ប្រភពដដែលបានបន្តថា ភ្លាមៗនោះ កម្លាំងប៉ូលិសក៏បានដេញតាមរហូតដល់មុខផ្ទះសំណាក់អូរដឹម ទើបជននោះបានផ្ដួលម៉ូតូចោល ហើយព្យាយាមរត់គេចខ្លួន តែរត់មិនរួចត្រូវកម្លាំងប៉ូលិសចាប់ខ្លួនបានតែម្ដង ។ ក្រោយពេលឃាត់ខ្លួនបានធ្វើការឆែកឆេរបានប្រទះឃើញថ្នាំញៀនចំនួន១៣កញ្ចប់ ដែលជននេះលាក់ជាប់នឹងខ្លួន ហើយកម្លាំងក៏បានដកហូតយក និងបាននាំខ្លួនជននោះទៅកាន់ប៉ុស្ដិ៍ដើម្បីសាកសួរ និងកសាងសំណុំរឿង ។
បន្ទាប់មកក៏បានបញ្ជូនបន្តទៅកាន់ផ្នែកព្រហ្មទណ្ឌប៉ូលិសខណ្ឌពោធិ៍សែនជ័យ ដើម្បីសាកសួរបន្ត និងកសាងសំណុំរឿងបញ្ជូនទៅកាន់តុលាការ ដើម្បីចាត់ការតាមផ្លូវច្បាប់ ហើយឮថាជននេះក៏មានដីកាតុលាការតាមចាប់ខ្លួនផងដែរ ៕
ចែករំលែកព័តមាននេះ