ខេត្តឧត្ដរមានជ័យ ៖ យុវជនម្នាក់បានស្លាប់បាត់បង់ជីវិត នៅពេលបញ្ជូនទៅធ្វើការសង្គ្រោះនៅមន្ទីរពេទ្យបង្អែកស្រុកអន្លង់វែង ក្រោយពីត្រូវជនដៃដល់ចាក់នឹងដាវសាមូរ៉ៃដោះស្រាយរឿងគំនុំចាស់ កាលពីវេលាម៉ោង៩យប់ថ្ងៃទី៦ខែវិច្ឆិកា ។ អំពើហិង្សានេះ កើតឡើងនៅតាមយផ្លូវលេខ១៧១ មុខអនុវិទ្យាល័យអន្លង់វែង ក្នុងភូមិថ្នល់កែង ឃុំអន្លង់វែង ស្រុកអន្លង់វែង ។
ជនដៃដល់ឈ្មោះ សេង បូរី ភេទប្រុស អាយុ១៧ឆ្នាំ ជាកម្មករនៅសិប្បកម្មទឹកកកអន្លង់វែងបច្ចុប្បន្នស្នាក់នៅក្នុងសិប្បកម្មខាងលើ ស្ថិតក្នុងភូមិថ្នល់កែង ឃុំអន្លង់វែង ។ ឯជនរងគ្រោះឈ្មោះ សំ សាម៉ន ភេទប្រុស អាយុ១៩ឆ្នាំ ជាជាងនៅសិប្បកម្មឈើ រស់នៅក្នុងភូមិទួល ឃុំថ្លាត ស្រុកអន្លង់វែង ។
នគរបាលស្រុកអន្លង់វែងឱ្យដឹងថា ក្រោយកើតហេតុសមត្ថកិច្ចក៏ចុះទៅដល់ និងបានឃាត់ខ្លួនជនដៃដល់នាំមកអធិការដ្ឋានស្រុក។ ចំណែកជនរងគ្រោះ សមត្ថកិច្ចនាំយកទៅសង្គ្រោះនៅមន្ទីរពេទ្យបង្អែកស្រុកអន្លង់វែងបានប្រមាណជា១០នាទី ក៏ស្លាប់ទៅ ។
នៅចំពោះមុខសមត្ថកិច្ច ជនដៃដល់ឆ្លើយថា មុនពេលកើតហេតុខ្លួនកំពុងធ្វើការនៅក្នុងសិប្បកម្មទឹកកក ។ បន្តិចក្រោយមក ស្រាប់តែឃើញឈ្មោះ សំ សាម៉ន ជិះម៉ូតូមកឈប់នៅមុខអនុវិទ្យាល័យ ហើយដោយសារខ្លួននិងជនរងគ្រោះធ្លាប់មានជម្លោះហិង្សាជាមួយគ្នាកន្លងមកនោះ ខ្លួនក៏ទាញដាវសាមូរ៉ៃយកទៅចាក់ចំបោះដៃផុតមួយកាំបិតបណ្តាលឱ្យឈ្មោះសំ សាម៉ន ដេកដួលក្នុងថ្លុកឈាម ។
ជនដៃដល់ ត្រូវបានសមត្ថកិច្ចកសាងសំណុំរឿងទៅសាលាដំបូងខេត្ត ចំណែកសពជនរងគ្រោះប្រគល់ឱ្យក្រុមគ្រួសារនិងសាច់ញាតិយកទៅធ្វើបុណ្យតាមប្រពៃណី ៕
ចែករំលែកព័តមាននេះ