ខេត្តកំពង់ឆ្នាំង ៖ រហូតមកដល់ពេលនេះក្រុមជនដៃដល់ក្នុងការកាប់ទន្ទ្រានយកដីក្នុងដែនជម្រកសត្វព្រៃ ភ្នំឱរ៉ាល់ ស្ថិតក្នុងឃុំជៀប ស្រុកទឹកផុស ខេត្តកំពង់ឆ្នាំង រយៈកាលកន្លងទៅនៅមិនទាន់ឃើញមានចំណាត់ការតាមផ្លូវច្បាប់ណាមួយនៅឡើយនោះទេ បើទោះបីមានសារព័ត៌មានជាច្រើនបានចុះផ្សាយ និងមានការព្រមានពីអភិបាលខេត្តយ៉ាងណាក្តី…
ខេត្តកំពង់ឆ្នាំង ៖ រហូតមកដល់ពេលនេះក្រុមជនដៃដល់ក្នុងការកាប់ទន្ទ្រានយកដីក្នុងដែនជម្រកសត្វព្រៃ ភ្នំឱរ៉ាល់ ស្ថិតក្នុងឃុំជៀប ស្រុកទឹកផុស ខេត្តកំពង់ឆ្នាំង រយៈកាលកន្លងទៅនៅមិនទាន់ឃើញមានចំណាត់ការតាមផ្លូវច្បាប់ណាមួយនៅឡើយនោះទេ បើទោះបីមានសារព័ត៌មានជាច្រើនបានចុះផ្សាយ និងមានការព្រមានពីអភិបាលខេត្តយ៉ាងណាក្តី ។
គួររំឮកថា ដីនៅចំណុចជើងភ្នំ និងដីជិតកន្លែងកម្សាន្តកន្លែងទឹកធ្លាក់ ជាច្រើន ហិកតាត្រូវបានក្រុមជនខិលខូចកាប់ទន្ទ្រានយកដោយខ្លះទើបកាប់ថ្មី ខ្លះទៀតទើបដុត និងកន្លែងខ្លះទៀតកាប់អស់ឈូសឆាយ ក្លាយជាដីស្អាតចេស គ្មានដើមឈើមួយដើមនោះឡើយ ។ ដីព្រៃក្នុងដែនជម្រកសត្វព្រៃភ្នំឱរ៉ាល់ខាងលើនេះមួយចំនួនត្រូវបានក្រុមឈ្មួញបានទិញពីក្រុមប្រជាពលរដ្ឋលួចកាប់ព្រៃទន្ទ្រានយកដី រួចលក់ឲ្យឈ្មួញ ដីខ្លះទៀតត្រូវបានឈ្មួញលួចទម្លាក់ប្រាក់ ជួលឲ្យប្រជាពលរដ្ឋលួចកាប់ព្រៃមួយថ្ងៃបន្តិចៗ និងបន្ទាប់មកពេលព្រៃឈើងាប់អស់មកលួចដុតកម្ទេចលុះយូៗទៅក្លាយជាដីវាល ហើយដាំដំណាំបន្តិចបន្តួចធ្វើឲ្យដីដែនជម្រកសត្វព្រៃក្លាយជាដីភូមិទៅវិញ បញ្ហានេះធ្វើឲ្យមានការចោទប្រកាន់ដល់មន្ត្រីបរិដ្ឋាន ពិសេសមន្ត្រីដែលគេឲ្យទៅការពារដែនជម្រកសត្វព្រៃថា បានឃុបឃិតឲ្យមានបទល្មើសនេះកើតឡើងដូចដែលឯកឧត្តមអភិបាលខេត្តធ្លាប់លើកឡើងកន្លងមក។
យ៉ាងនេះក្តីលោក ងិន ហ៊ុន ប្រធានមន្ទីរកសិកម្មរុក្ខប្រម៉ាញ និងនេសាទខេត្តកំពង់ឆ្នាំងបានប្រាប់តាមទូរស័ព្ទ នៅរសៀលថ្ងៃទី៨ ខែវិច្ឆិកានេះថា រឿងនេះឯកឧត្តមអភិបាលខេត្តបានបង្កើតគណៈកម្មការមួយក្រុមឲ្យចុះស្រាវជ្រាវហើយ ពេលនេះក្រុមគណៈកម្មការដែលដឹកនាំដោយមន្ត្រីអធិការកិច្ចសាលាខេត្តកំពុងស៊ើបអង្កេត ពិនិត្យលើផ្ទៃដីដែលរងការខូចខាត និងរកអត្តសញ្ញាណជនដៃដល់ឲ្យបានច្បាស់ពេលស្រាវជាជ្រាវបានហើយនឹងធ្វើកំណត់ហេតុ ដាក់ជូនសាលាខេត្ត ដើម្បចាត់ការប្តឹងទៅតុលាការ ។
គេនៅចាំថា កាលពីពេលកន្លងទៅឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំងបានប្រតិកម្មខ្លាំងៗទៅនឹងមន្ត្រីបរិដ្ឋាន ពិសេសអ្នកទៅការពារដែនជម្រកសត្វព្រៃភ្នំឱរាល់ថា បានបណ្តោយឲ្យគេចូលកាប់ព្រៃយកអុសធ្វើឡធ្យូង និងកាប់ទន្ទ្រានយកដីធ្វើកម្មសិទ្ធហើយចាំទទួលយកលុយប្រចាំខែ ។ ធ្វើយ៉ាងនេះវាខុសកុំចង់បានលុយបំផ្លាញខ្លួនឯង ។ គេឲ្យទៅការពារដែលជម្រកសត្វព្រៃបែរជាឲ្យគេចូលកាប់ព្រៃដល់ពេលព្រៃរលាយអស់ តើសត្វវាទៅរស់នៅឯណា ? ត្រង់ចំណុចនេះត្រូវគិតគូឡើងវិញបើធ្វើមិនកើតទុកគេធ្វើដាក់នាក់ថ្មីជំនួសវិញ ៕
ចែករំលែកព័តមាននេះ