បន្ទាយមានជ័យ ៖ កម្លាំងកងរាជអាវុធហត្ថបានចុះបង្ក្រាបបទល្មើសធនធានធម្មជាតិ (កាយបំផ្លាញភ្នំ២កន្លែង) បន្តទៀត ដែលឃាត់ខ្លួន១២នាក់ នៅថ្ងៃទី០៨ ខែវិច្ឆិកា ឆ្នាំ២០១៨ នៅស្រុកព្រះនេត្រព្រះ…
បន្ទាយមានជ័យ ៖ កម្លាំងកងរាជអាវុធហត្ថបានចុះបង្ក្រាបបទល្មើសធនធានធម្មជាតិ (កាយបំផ្លាញភ្នំ២កន្លែង) បន្តទៀត ដែលឃាត់ខ្លួន១២នាក់ នៅថ្ងៃទី០៨ ខែវិច្ឆិកា ឆ្នាំ២០១៨ នៅស្រុកព្រះនេត្រព្រះ និងស្រុកស្វាយចេក ខេត្តបន្ទាយមានជ័យ ដែលសង្ស័យណាស់ រដ្ឋអំណាចស្រុកនៅពីក្រោយខ្នង ។
លោកវរៈសេនីយ៍ទោ ណាំ ប៊ុនអៀង មេបញ្ជាជាការរងទទួលផែនការងារព័ត៌មានសន្តិសុខ និងបង្ក្រាបធនធានធម្មជាតិបានប្រាប់ថា ដោយមានការណែនាំពីលោកនាយឧត្តមសេនីយ៍ សៅ សុខា អគ្គបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថផ្ទៃប្រទេស និងមានការណែនាំពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានឲ្យលោកដឹកនាំកម្លាំងកងរាជអាវុធហត្ថខេត្តស្រុកមានចំនួន៣០នាក់ ចុះប្រតិបត្តិការបង្ក្រាបបទល្មើសធនធានធម្មជាតិ (កាយបំផ្លាញភ្នំ) ២កន្លែង មាននៅស្រុកព្រះនេត្រព្រះ និងស្រុកស្វាយចេក ។
លោកបានបញ្ជាក់ថា ក្រោយការណែនាំកម្លាំងកងរាជអាវុធហត្ថខេត្ត រួមជាកម្លាំងស្រុកព្រះនេត្រព្រះចំនួន១៥នាក់ នៅវេលាម៉ោង៩ដល់១២ថ្ងៃទី០៨ ខែវិច្ឆិកា ឆ្នាំ២០១៨ នៅចំណុចភ្នំស្រេះ ស្ថិតភូមិស្រេះកើតឃុំ-ស្រុកព្រះនេត្រព្រះ បានចុះបង្ក្រាបឃាត់ខ្លួនអ្នកបើកររថយន្តនិងគ្រឿងចក្រចំនួន២នាក់ និងរថយន្ត១គ្រឿង ហើយអ៊ែស្កា១គ្រឿង និងបិតការដ្ឋានក្រុមហ៊ុនលោក យឹម ប៊ុនរ៉ុម ឲ្យបញ្ឈប់សកម្មភាពកាយភ្នំស្រេះដោយគ្មានច្បាប់ជាកំហិត ។
កម្លាំងកងរាជអាវុធហត្ថខេត្ត រួមជាមួយកម្លាំងស្រុកស្វាយចេក នៅវេលាម៉ោង១ដល់៣រសៀល ថ្ងៃទី០៨ ខែវិច្ឆិកា ឆ្នាំ២០១៨ នៅចំណុចភ្នំតាដុង ស្ថិតភូមិបន្ទាត់បុស ឃុំតាផូ ស្រុកស្វាយចេក បានបង្ក្រាបឃាត់ខ្លួន អ្នកបើកបររថយន្ត និងគ្រឿងចក្រចំនួន១០នាក់ ក្នុងនោះមានមេការម្នាក់ឈ្មោះ ហន ប៊ុនហៀង ភេទប្រុស អាយុ៤៦ឆ្នាំ និងម៉ាស៊ីនកិនថ្ម១គ្រឿង និងរថយន្តដឹកដី១គ្រឿង អ៊ែស្កា១គ្រឿង អាបុលរុញដី១គ្រឿង និងបិតក្រុមហ៊ុន លោក សាំង គង់ ឲ្យបញ្ឈប់សកម្មភាពកាយភ្នំដោយល្មើសច្បាប់នេះផងដែរ ។
លោកបានបញ្ជាក់ថា ក្រុមហ៊ុនសាំង គង់ ដែលកាយបំផ្លាញភ្នំតាដុងនេះ គឺរយៈពេលកន្លងមកប្រជាពលរដ្ឋក្នុងឃុំតាផូរ ស្រុកស្វាយចេកបានធ្វើការតវ៉ា និងសុំឲ្យអន្តរាគមន៍ជួយបិតសកម្មភាពកាយភ្នំតាដុងដោយល្មើសច្បាប់ ។ ព្រោះភ្នំតាដុង គឺភ្នំដែលមានវត្ថុបូរាណច្រើនដែលសេសសល់ពីសម័យបូរាណ ដើម្បីការពារទុកឲ្យកូនចៅជំនាន់ក្រោយ បានស្គាល់ និង ទើបឃើញស្នាដៃដែករបស់កម្លាំងកងរាជអាវុធហត្ថបានចុះបង្ក្រាបបិតសកម្មភាពកាយភ្នំដោយល្មើសច្បាប់នេះ ។ ព័ត៌មានពិស្តារនឹងមានផ្សាយជូននៅកាសែតកោះសន្តិភាព ។
ចែករំលែកព័តមាននេះ