ខេត្តឧត្តរមានជ័យ ៖ គ្រោះថ្នាក់ចរាចរណ៍មួយបានកើតឡើងបណ្តាលឱ្យទាហានម្នាក់ស្លាប់បាត់បង់ជីវិតកាលពីវេលាម៉ោងប្រមាណ៩ព្រឹក ថ្ងៃទី៨ ខែវិច្ឆិកា ឆ្នាំ២០១៨ ស្ថិតនៅតាមបណ្តោយផ្លូវយុទ្ធសាស្ត្រក្រវ៉ាត់ព្រំដែនកម្ពុជា-ថៃ ក្នុងភូមិសាម្គី ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ។
ជនរងគ្រោះឈ្មោះ ឡុង គង់ ភេទប្រុស អាយុ៤៦ឆ្នាំ មុខរបរជាទាហានអង្គភាពក្នុងកងវរសេនាធំលេខ៤ កងពលធំអន្តរាគមន៍លេខ២ មានស្រុកកំណើតឃុំស្ពានត្នោត ស្រុកជីក្រែង ខេត្តសៀមរាប បច្បុន្នមករស់នៅភូមិពងទឹក ឃុំអម្ពឹល ស្រុកបន្ទាយអម្ពឹល ខេត្តឧត្តរមានជ័យ ។
សាក្សីបានឱ្យដឹងថា មុនពេលកើតហេតុដោយមិនបានដឹងថា ជនរងគ្រោះរូបនេះជិះម៉ូតូដួលខ្លួនឯង ឬបង្កដោយរថយន្តបុកនោះទេ ស្រាប់តែបានឃើញដេកដួលនៅលើចិញ្ចើមផ្លូវជាទីកន្លែងស្ងាត់មិនមានប្រជាពលរដ្ឋរស់នៅ បន្តិចក្រោយមកទើបមានអ្នកធ្វើដំណើរនាំគ្នាឈប់មើលក៏បានដឹងមានអ្នកដែលស្គាល់ជាទាហានរស់នៅក្នុងអង្គភាពជាមួយគ្នា ទាហាននោះបានទូរស័ព្ទរាយការណ៍ដល់អង្គភាព និងប្រពន្ធកូនមកទទួលយកទៅធ្វើបុណ្យទៅតាមប្រពៃណី ៕
ចែករំលែកព័តមាននេះ