ខេត្តរតនគិរី ៖ បុរស២នាក់ឪពុក-កូន ខណៈដើរដាក់អន្ទាក់ក្នុងព្រៃ ត្រូវខ្លាឃុំវាយប្រហារបណ្តាលឱ្យកូនប្រុសរងរបួសធ្ងន់ កាលពីថ្ងៃទី៦ វិច្ឆិកា វេលាម៉ោង០២ និង៣០រសៀល នៅក្នុងតំបន់ព្រៃជ្រៅ ស្ថិតក្នុងភូមិទំពួនរឺងតូច ឃុំតាវែងក្រោម ស្រុកតាវែង ។
ទាក់ទិននឹងឧបទ្ទវហេតុខាងលើនេះ ត្រូវបានសមត្ថកិច្ចស្រុកតាវែងឱ្យដឹងថា ក្មេងប្រុសរងគ្រោះឈ្មោះ ណយ សឺអុី អាយុ១៦ឆ្នាំ ជាជនជាតិដើមភាគតិចព្រៅ រស់នៅក្នុងភូមិ ឃុំខាងលើ ។ នៅពេលកើតហេតុនោះ សមត្ថកិច្ចអត់បានដឹងទេ គឺទើបនឹងដឹងរឿងនេះ ពេលឪពុកដឹកកូនរងគ្រោះមកដល់មណ្ឌលសុខភាពស្រុកតាវែង ដើម្បីព្យាបាល ។
បើតាមឪពុកនិងកូនប្រុសដែលរងគ្រោះបានឱ្យសមត្ថកិច្ចដឹងថា នៅថ្ងៃកើតហេតុនោះ វេលាម៉ោង៨ព្រឹក ពួកគាត់ទាំង២នាក់ឪពុក-កូន បានជិះម៉ូតូចូលក្នុងព្រៃ ដែលមានចម្ងាយជាង១០គីឡូម៉ែត្រពីផ្ទះ ដើម្បីដាក់អន្ទាក់សត្វព្រៃ ។
ពេលទៅដល់ក្នុងព្រៃជ្រៅ គាត់ជាឪពុកបានដើររាយអន្ទាក់ ឯកូនប្រុសដើរតាមពីក្រោយ ។ គាត់រៀបរាប់ថា នៅពេលនោះ ស្រាប់តែមានខ្លាឃុំមេមួយក្បាលធំ ពណ៌ខ្មៅ បោលចេញពីក្នុងព្រៃ ហក់មកខាំកូនប្រុសគាត់ចំជើងខាងឆ្វេងដាច់សាច់អស់២ដុំ ។
ពេលឃើញដូច្នេះ គាត់ជាឪពុកបានយកដំបងឈើប៉ុនកដៃវាយសំពងទៅលើខ្លាឃ្មុំ ដើម្បីជួយកូនប្រុសស្រាប់តែខ្លាឃ្មុំ បែរមកខាំគាត់វិញម្ដង ហើយកូនប្រុសគាត់ក៏បានយកដំបង ស្ទុះទៅវាយខ្លាឃ្មុំនោះ ទើបវាបោលចូលព្រៃបាត់ទៅ ។
បើតាមជនរងគ្រោះសន្និដ្ឋានថា ខ្លាឃ្មុំមេមួយក្បាលនេះ ទំនងវាមានកូនទើបកាចបែបនេះ ។ ក្រោយពីកើតហេតុ បុរសជាឪពុកបានដឹកកូនប្រុសដែលរបួសតាមម៉ូតូត្រឡប់មកផ្ទះវិញ ដើម្បីយកទៅព្យាបាលនៅមណ្ឌលសុខភាពស្រុកតាវែង ៕
ចែករំលែកព័តមាននេះ