ខេត្តកណ្តាល ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍លើកយកសម្តីបក្សប្រឆាំងដែលនិយាយថា ដូរទៅៗ…។ សម្តេចតេជោនាយករដ្ឋមន្ត្រី ហ៊ុន សែន មានប្រសាសន៍ថា«ខ្ញុំពិតជាដូរ ខ្ញុំដូរពីនាយករដ្ឋមន្ត្រីអាណត្តិទី៤ ទៅជានាយករដ្ឋមន្ត្រីអាណត្តិទី៥»។
ខេត្តកណ្តាល ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍លើកយកសម្តីបក្សប្រឆាំងដែលនិយាយថា ដូរទៅៗ…។ សម្តេចតេជោនាយករដ្ឋមន្ត្រី ហ៊ុន សែន មានប្រសាសន៍ថា«ខ្ញុំពិតជាដូរ ខ្ញុំដូរពីនាយករដ្ឋមន្ត្រីអាណត្តិទី៤ ទៅជានាយករដ្ឋមន្ត្រីអាណត្តិទី៥»។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍បែបនេះ នាព្រឹកថ្ងៃទី៨ មិថុនា ក្នុងឱកាសអញ្ជើញជាអធិបតីដ៏ខ្ពង់ខ្ពស់នៅក្នុងពិធីសម្ពោធដាក់ឱ្យប្រើប្រាស់ជាផ្លូវការវិទ្យាល័យសម្តេចតេជោ ហ៊ុន សែន ព្រែកអំបិល និងផ្លូវលំចំនួន៩ខ្សែប្រវែង៩.០០០ម៉ែត្រ នៅឃុំត្រើយស្លា ស្រុកស្អាង ។
សម្តេចតេជោនាយករដ្ឋមន្ត្រីបានមានប្រសាសន៍ថ្លែងអំណរគុណចំពោះប្រជាពលរដ្ឋកម្ពុជាទូទៅដែលតែងតែបោះឆ្នោតជូនគណបក្សប្រជាជន
កម្ពុជា ។
សម្តេចមានប្រសាសន៍បន្តថា ការបោះឆ្នោតនៅពេលខាងមុខ គឺជាការសម្រេចជោគវាសនាខ្លួនឯង សូមប្រជាពលរដ្ឋធ្វើការពិចារណាឱ្យបានហ្មត់ចត់ ព្រោះការផ្លាស់ប្តូរបក្សនយោបាយ ឬការផ្លាស់ប្តូរនាយករដ្ឋមន្ត្រីមិនមែនជាការលេងសើចទេ ដូច្នេះកុំខឹងគោទៅវាយរទេះ ។ កុំខឹងមេភូមិ មេឃុំ ជំទប់ ប៉ូលិស បែរជាមកបោះឆ្នោតទម្លាក់ ជា ស៊ីម ទម្លាក់ ហេង សំរិន ទម្លាក់ ហ៊ុន សែន ទម្លាក់គណបក្សប្រជាជន ដែលនេះជារឿងមួយមានស្ថានភាពក្រឡាប់ចាក់ ។
សម្តេចមានប្រសាសន៍ពន្យល់ថា ការបោះឆ្នោតមានលក្ខណៈខុសគ្នា ព្រោះការបោះឆ្នោតក្រុមប្រឹក្សាឃុំ-សង្កាត់វាប៉ះពាល់ដល់សេវាសាធារណៈត្រឹមតែកម្រិតឃុំសង្កាត់តែប៉ុណ្ណោះ ពុំមានអ្វីធ្ងន់ធ្ងរទេ ហើយគណបក្សដែលមានសមាជិករបស់ខ្លួនជាមេឃុំ-ចៅសង្កាត់ បើឃើញថាមេឃុំ-ចៅសង្កាត់នេះធ្វើខុស គេអាចនឹងធ្វើការផ្លាស់ប្តូរមេឃុំនោះភ្លាម ហើយដាក់អ្នកនៅក្នុងបញ្ជីជំនួសវិញ ដើម្បីឱ្យសភាពការណ៍នោះមានភាពប្រសើរឡើងវិញ ។
ចំណែកឯការបោះឆ្នោតថ្នាក់ជាតិវិញ គឺជាការបោះឆ្នោតតំណាងរាស្ត្រដែលជាលទ្ធផលចេញមកទៅជាការជ្រើសរើសនាយករដ្ឋមន្ត្រី និងរាជរដ្ឋាភិបាល ដែលជាអ្នកកាច់ចង្កូតប្រទេសតែម្តង ។ សម្តេចតេជោនាយករដ្ឋមន្ត្រីសង្ឃឹមថា បងប្អូនប្រជាពលរដ្ឋកម្ពុជាទាំងអស់ដែលធ្លាប់បោះឆ្នោតជូនគណបក្សប្រជាជននិងក្មួយៗដែលគ្រប់អាយុបោះឆ្នោត នឹងបន្តបោះឆ្នោតជូនគណបក្សប្រជាជនកម្ពុជា ដើម្បីផ្តល់លទ្ធភាពដឹកនាំប្រទេសតទៅទៀត ។ សម្តេចសង្ឃឹមថា នៅថ្ងៃទី២៨ កក្កដា ខាងមុខនេះ បងប្អូនប្រជាពលរដ្ឋនឹងគូសលេខ៤ដែលមានសញ្ញាទេវតាបាចផ្កាជូនគណបក្សប្រជាជន និងបានដល់រូបសម្តេច ធ្វើជានាយករដ្ឋមន្ត្រីបន្តទៀត ។
រាជរដ្ឋាភិបាលបានខិតខំក្នុងការទាក់ទាញវិនិយោគ និងគាំពារវិនិយោគដើម្បីបង្កើតការងារជូនប្រជាពលរដ្ឋ ។ សម្តេចបានសង្កត់ធ្ងន់ថា គ្មាននរណាក្រៅពីរាជរដ្ឋាភិបាលដែលបានខិតខំទាក់ទាញអ្នកវិនិយោគនិងគាំពារវិនិយោគដើម្បីបង្កើតការងារជូនប្រជាពលរដ្ឋធ្វើនោះទេ គឺផ្ទុយពីអ្នកមួយចំនួនដែលចេះតែសន្យា ឬបំផុសឱ្យមានការធ្វើកូដកម្ម បាតុកម្មវាយបំផ្លាញរោងចក្រ ដែលធ្វើឱ្យកម្មករ កម្មការិនី បាត់បង់ការងារ ។ សម្តេចតេជោមានប្រសាសន៍ថា សម្តេចមិនមានជំនឿថា ប្រជាពលរដ្ឋដែលបានរួមចំណែកជាមួយគ្នា កម្សត់កម្រនោះបោះបង់ចោលសម្តេច ជា ស៊ីម សម្តេច ហេង សំរិន ព្រមទាំងរូបសម្តេច និងគណបក្សប្រជាជនដែលបានចូលរួមចំណែក រួមសុខ រួមទុក្ខ ជាមួយគ្នាទាំងពីបាតដៃទទេ ដើម្បីរស់រានមានជីវិត រួចចាកផុតពីរបបប្រល័យពូជសាសន៍ប៉ុល ពត នោះទេ ។
ពាក់ព័ន្ធនឹងការផ្តល់កម្មសិទ្ធិដីធ្លីជូនប្រជាពលរដ្ឋនៅតំបន់ព្រៃលិចទឹកដូចជា នៅម្តុំស្រុកស្អាង ស្រុកកោះធំ សម្តេចតេជោនាយករដ្ឋមន្ត្រីបានជំរុញឱ្យអាជ្ញាធរដែលមានក្រុមសុរិយោដី ធ្វើការវាស់វែងដីធ្លីជូនប្រជាពលរដ្ឋជាប្រព័ន្ធ ដោយមិនចាំបាច់កម្លាំងយុវជនស្ម័គ្រចិត្តចុះទៅជួយនោះទេ ។ សូមកុំឱ្យប្រជាពលរដ្ឋមានការព្រួយបារម្ភ ព្រោះដីដែលប្រជាពលរដ្ឋកាន់កាប់នោះ ពុំមានជាប់ពាក់ព័ន្ធនឹងឡូត៍នេសាទទៀតទេ រាជរដ្ឋាភិបាលបានលុបចោលឡូត៍នេសាទ គឺដើម្បីសម្រាប់ប្រជាពលរដ្ឋ ។
តាមរបាយការណ៍របស់លោកផៃ ប៊ុនឈឿន អភិបាលខេត្តកណ្តាលបានឱ្យដឹងថា វិទ្យាល័យសម្តេចតេជោ ហ៊ុន សែន ព្រែកអំបិល ត្រូវបានសាងសង់ឡើងវិញនៅឆ្នាំ១៩៨១ ដែលបានដំណើរការសិក្សាជាផ្លូវការមានឈ្មោះថា សាលាកម្រិតសិក្សាទី២ ព្រែកអំបិល ក្រោយមកជាអនុវិទ្យាល័យព្រែកអំបិលដែលមានសិស្សថ្នាក់ទី៥ចំនួន៥ថ្នាក់ និងបុគ្គលិកសិក្សាចំនួន៧នាក់ ។ លោកអភិបាលខេត្តបន្តថា ដោយមើលឃើញនូវការលំបាកចំពោះមុខក្នុងការដោះស្រាយអគារសិក្សាជូនដល់កូនចៅប្រជាពលរដ្ឋដែលសិស្សានុសិស្សចូលរៀនកាន់តែមានចំនួនច្រើន ទើបនៅឆ្នាំ១៩៩៦ -១៩៩៧ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងសម្តេចកិត្តិព្រឹទ្ធបណ្ឌិត បានឧបត្ថម្ភអគារសិក្សាចំនួន២ខ្នង ស្មើនឹង១០បន្ទប់ និងជួសជុលអគារចាស់១ខ្នង ស្មើនឹង៥បន្ទប់បន្ថែមទៀត ព្រមទាំងបានប្តូរឈ្មោះទៅជាអនុវិទ្យាល័យហ៊ុន សែន ព្រែកអំបិល ។
ដោយទទួលបានការឧបត្ថម្ភពីសម្តេចតេជោ និងសម្តេចកិត្តិព្រឹទ្ធបណ្ឌិតតាមរយៈលោកនាយឧត្តមសេនីយ៍ ឌុល គឿន អនុប្រធានទី១ គណៈអចិន្ត្រៃយ៍គណៈពង្រឹងមូលដ្ឋានខេត្តកណ្តាល គ្រឹះស្ថានសិក្សានេះបានប្តូរឈ្មោះជាវិទ្យាល័យសម្តេចតេជោ ហ៊ុន សែន ព្រែកអំបិលនាបវេសនកាលឆ្នាំសិក្សា២០០៩-២០១០ ។ បន្ថែមទៀតនោះ សម្តេចតេជោ បានផ្តល់អគារសិក្សាថ្មី១ខ្នង ២ជាន់ ស្មើនឹង១២បន្ទប់ សម្រាប់សម្រួលដល់ដំណើរការសិក្សា ហើយដែលត្រូវសម្ពោធដាក់ឱ្យប្រើប្រាស់នាឱកាសនេះ ។
នៅក្នុងឱកាសនោះ ប្រជាពលរដ្ឋនៅឃុំត្រើយស្លា ក៏បានទទួលផ្លូវលំក្រាលថ្មភ្នំចំនួន៩ខ្សែមានទទឹង ៤ម៉ែត្រ និងប្រវែង៩.០០០ម៉ែត្រ ជាអំណោយដ៏ថ្លៃថ្លារបស់សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ដែលត្រូវសម្ពោធដាក់ឱ្យប្រើប្រាស់ជាផ្លូវការនាឱកាសនេះដែរ ៕
ចែករំលែកព័តមាននេះ