រាជធានីភ្នំពេញ ៖ ស្ត្រីកូនខ្ចីម្នាក់បានយំសោកបោកខ្លួនរហូតដល់ទន់ខ្លួនសន្លប់នៅមុខផ្ទះសំណាក់យីហោ«នាងអូន» ស្ថិតនៅតាមបណ្ដោយផ្លូវលេខ៩៥ សង្កាត់ផ្សារដើមថ្កូវ ខណ្ឌចំការមន កាលពីវេលាម៉ោង១២ និង២០នាទី រំលងអធ្រាត្រឈានចូលថ្ងៃទី៩ មិថុនា ។
រាជធានីភ្នំពេញ ៖ ស្ត្រីកូនខ្ចីម្នាក់បានយំសោកបោកខ្លួនរហូតដល់ទន់ខ្លួនសន្លប់នៅមុខផ្ទះសំណាក់យីហោ«នាងអូន» ស្ថិតនៅតាមបណ្ដោយផ្លូវលេខ៩៥ សង្កាត់ផ្សារដើមថ្កូវ ខណ្ឌចំការមន កាលពីវេលាម៉ោង១២ និង២០នាទី រំលងអធ្រាត្រឈានចូលថ្ងៃទី៩ មិថុនា ។ ស្ត្រីរូបនេះមិនត្រូវបានគេស្គាល់ឈ្មោះឡើយដោយសារក្រោយពីកើតហេតុភ្លាម នាងត្រូវបាននគរបាលប៉ុស្ដិ៍ផ្សារដើមថ្កូវសហការជាមួយក្រុមគ្រួសារដឹកតាមរ៉ឺម៉កម៉ូតូយកទៅសង្គ្រោះនៅមន្ទីរពេទ្យ ។
ដោយឡែកបុរសជាប្ដីក៏បានព្យាយាមជិះម៉ូតូម៉ាកស្ទេប ពណ៌ស ពាក់ស្លាកលេខភ្នំពេញ១AF-៦០៨៧ ដឹកស្រីស្នេហ៍គេចពីផ្ទះសំណាក់ ដោយមិនខ្ចីយកភ្នែកមើលប្រពន្ធកូនខ្ចីដែលសន្លប់នោះឡើយ ។ តាមប្រភពព័ត៌មានទាក់ទិននឹងរឿងរ៉ាវខាងលើនេះត្រូវបានឱ្យដឹងថា ស្ត្រីម្នាក់អាយុប្រមាណជាង៣០ឆ្នាំបានជិះម៉ូតូឌុបស្វែងរកប្ដីដែលសង្ស័យថា មានស្រីថ្មីក្រៅផ្ទះ ។ ការតាមរកប្ដីក្នុងដីក្រុងគឺរុករកគ្រប់ច្រកល្ហក ហើយក៏ប្រទះឃើញប្ដីនាំស្រីឡើងផ្ទះសំណាក់«នាងអូន»ទើបរូបនាងចូលទៅសួរនាំ តែខណៈនោះប្ដីរបស់នាងដឹងខ្លួនទាន់ក៏នាំស្រីស្នេហ៍ជិះម៉ូតូគេចបាត់ភ្លាមៗដែរ ។
ដោយសារទង្វើរបស់ប្ដីបែបនេះរួមផ្សំជាមួយនឹងស្ត្រីជាប្រពន្ធទើបនឹងឆ្លងទន្លេបានប្រមាណជាង១ឆ្នាំផងធ្វើឱ្យនាងគាំងបេះដូងសន្លប់ស្ដូកស្ដឹងនៅមុខផ្ទះសំណាក់នោះ ។ ប្រភពព័ត៌មានមួយទៀតបានឱ្យដឹងថា រវាងស្ត្រីជាប្រពន្ធ និងបុរសជាប្ដីមានការប្រទូស្ដរ៉ាយគ្នាកើតឡើងនៅពេលទៅតាមរករឿងប្ដីដល់ផ្ទះសំណាក់នោះ ហើយក៏បណ្ដាលឱ្យដួលរហូតសន្លប់ ។ ចំពោះបញ្ហានេះ ម្ចាស់ផ្ទះសំណាក់ខាងលើមិនបានសហការផ្ដល់ព័ត៌មានដល់អ្នកកាសែត ឬសមត្ថកិច្ចមូលដ្ឋានឱ្យដឹងឡើយ ៕
ចែករំលែកព័តមាននេះ