រាជធានីភ្នំពេញ ៖ សាលាដំបូងរាជធានីភ្នំពេញបានពន្យារពេលប្រកាសសាលក្រមទៅថ្ងៃទី១២ កក្កដា ខាងមុខលើសំណុំរឿងនិស្សិតស្រីវ័យក្មេងម្នាក់ដែលបើករថយន្តបុករះបណ្ដាលឱ្យស្លាប់ក្មេង៣នាក់ និងមនុស្សចាស់៦នាក់ផ្សេងទៀតរងរបួសធ្ងន់នៅមុខក្រសួងមហាផ្ទៃក្នុងខណ្ឌចំការមន កាលពីដើមខែមីនា ឆ្នាំ២០១៣ ក្នុងសវនាការជំនុំជម្រះជាសាធារណៈនៅថ្ងៃទី៦ ខែមិថុនា វេលាម៉ោង៣ និង៣០នាទីរសៀល ដោយមានលោកកោ វណ្ឌី ជាចៅក្រមជំនុំជម្រះ និងលោកស្រីស៊ឺ វណ្ណី ព្រះរាជអាជ្ញារងអមសាលាដំបូងជាតំណាងអយ្យការ ព្រមទាំងចំពោះមុខមេធាវីការពារក្ដីឱ្យជនត្រូវចោទ២
រូប ។
ក្នុងសវនាការក៏មានវត្តមានជនត្រូវចោទគឺនាងគាម ពិសិដ្ឋណារីតា អាយុ២៣ឆ្នាំ និស្សិតឆ្នាំទី៦ នៃសាកលវិទ្យាល័យវេជ្ជសាស្ត្រ និងសុខាភិបាល មានអាស័យដ្ឋាននៅក្រុងតាខ្មៅ ខេត្តកណ្ដាល បានឈរនៅមុខររង្វង់ក្រចកសេះ ។ អង្គសវនាការបានធ្វើឡើងអស់រយៈពេលជាង២ម៉ោងក្នុងការសាកសួរដេញដោលលើជនត្រូវចោទ ប៉ុន្តែអ្វីគួរឱ្យកត់សម្គាល់នោះត្រង់ជនត្រូវចោទបានសារភាពនូវទោសកំហុសដែលខ្លួនបានប្រព្រឹត្តដោយអចេតនា ។ រូបនាងទាំងមេធាវីការពារក្តីសុទ្ធតែបានបញ្ជាក់ពីជំហររៀងខ្លួនថា ជនត្រូវចោទមានជំងឺ២យ៉ាង ១-ស្កន់ ២-ភ្លឹក ដោយមានលិខិតបញ្ជាក់ពីគ្រូពេទ្យនៅប្រទេសថៃ ។
អង្គសវនាការបានបញ្ជាក់ផងដែរថា សំណុំរឿងនេះក្រុមគ្រួសារជនត្រូវចោទបានដោះស្រាយសំណងរដ្ឋប្បវេណីរួចរាល់អស់ហើយ ពោលគឺសងជំងឺចិត្តដល់ជនរងគ្រោះ ដែលសបញ្ជាក់ឱ្យឃើញថា ជនត្រូវចោទបានទទួលខុសត្រូវរាល់ទង្វើដែលខ្លួនបានធ្វើ ។ សរុបមកវិញ ជនត្រូវចោទនឹងមេធាវីសុំឱ្យតុលាការធ្វើការដោះលែងនាង គាម ពិសិដ្ឋណារីតា បាននៅក្រៅឃុំដើម្បីបានបន្តការសិក្សាវិញ ។ ក្រោយពីចប់ការសាកសួរដេញដោលរួចមក ចៅក្រមជំនុំជម្រះបានប្រកាសលើកពេលប្រកាសសាលក្រមនៅថ្ងៃទី១២ កក្កដា ២០១៣ខាងមុខនេះ ទើបជនត្រូវចោទត្រូវបានអនុរក្ស ដឹកទៅកាន់ពន្ធនាគារប៉េហ្សីវិញដោយមានការបិទបាំងចំពោះម៉ាស៊ីនថតរបស់អ្នកកាសែតផង ។
ជនត្រូវចោទឈ្មោះ គាម ពិសិដ្ឋណារីតា ត្រូវបានតំណាងអយ្យការសាលាដំបូងរាជធានីភ្នំពេញ ចោទប្រកាន់ពីបទបើកបរបង្កឱ្យគ្រោះថ្នាក់ស្លាប់ និងរបួសដល់អ្នកដទៃដោយអចេតនានៅលើដងមហាវិថីព្រះនរោត្តមមុខក្រសួងមហាផ្ទៃ ស្ថិតក្នុងសង្កាត់ទន្លេបាសាក់ ខណ្ឌចំការមន វេលាល្ងាចថ្ងៃទី១ មីនា ឆ្នាំ២០១៣ ។ គួររំលឹកថា ជនត្រូវចោទឈ្មោះ គាម ពិសិដ្ឋណារីតា អាយុ២៣ឆ្នាំ ជាកូនស្រីរបស់លោក គាម ពិសិដ្ឋ អនុប្រធានមន្ទីរសុខាភិបាលខេត្តកណ្តាល ។
ថ្ងៃកើតហេតុខាងលើ នាងបានបើកបររថយន្តម៉ាកកាមរីបាឡែន ពណ៌ស្ករមួយគ្រឿងដឹកប្អូនប្រុស២នាក់ ចេញពីសាលាក្នុងគោលបំណងទៅផ្ទះនៅក្រុងតាខ្មៅ ។ លុះដល់ភ្លើងស្តុបក្បែរក្រសួងមហាផ្ទៃ បានបើករេចង្កូតទៅប៉ះមូ៉តូអ្នកដំណើរចំនួន២គ្រឿង បណ្តាលឱ្យដួល និងម្ចាស់ក៏ត្រូវរងរបួសស្នាម ។ ពេលនាងបើករថយន្តប៉ះម៉ូតូអ្នកដំណើរចំនួន២គ្រឿងនោះ នាងមិនបានឈប់មើលគេទេ និងកាន់តែបន្ថែមល្បឿនទៅមុខទៀត រហូតដល់មុខក្លោងទ្វារក្រសួងមហាផ្ទៃ បានទៅបុកក្មេង៣នាក់ស្លាប់ភ្លាមនៅកន្លែងកើតហេតុ ដែលគួរឱ្យអាណោចអាធ័មបំផុត និង៦នាក់ទៀតរងរបួសជាទម្ងន់ ហើយរថយន្តបានជ្រុលចង្កូតទៅបុករបងក្រសួងមហាផ្ទៃជាប់ទើបទៅមុខលែងរួច ។
ពេលនោះនាង៣នាក់បងប្អូនមិនបានចុះពីក្នុងរថយន្តឡើយ ខណៈអ្នកដំណើរបានទៅចោមរោមជុំជិត ។ ដោយខ្លាចកើតមានអំពើហិង្សា បន្តិចក្រោយមកបានសមត្ថកិច្ចនាំនាងចូលទៅក្នុងក្រសួង ដើម្បីការពារសន្តិសុខដល់នាង ។ នាង ពិសិដ្ឋ ណារីតា មានសភាពស្លេកស្លាំង នឹងបន្ទាប់មកត្រូវបានសមត្ថកិច្ចនាំខ្លួនទាំងមនុស្សទាំងរថយន្តទៅកាន់ការិយាល័យចរាចរណ៍ជើងគោករាជធានីភ្នំពេញ និងបានកសាងសំណុំរឿងបញ្ជូនទៅកាន់សាលាដំបូង ដើម្បីចាត់ការតាមផ្លូវច្បាប់ ។ នាង គាម ពិសិដ្ឋណារីតា ត្រូវបានតុលាការសម្រេចឃុំខ្លួនដាក់ពន្ធនាគារប៉េហ្សី ជាបណ្តោះអាសន្នចាប់តាំងពីពេលនោះមក ៕
ចែករំលែកព័តមាននេះ