ខេត្តព្រះសីហនុ ៖ អំពើប្លន់ប្រដាប់អាវុធមួយបានកើតឡើងកាលពីម៉ោង៥និង៤៥នាទីល្ងាចថ្ងៃទី៥ មិថុនា បង្កឡើងដោយក្រុមចោរ២នាក់ជិះម៉ូតូម៉ាកហុងដាពណ៌ខ្មៅមួយគ្រឿង ប្រដាប់ដោយអាវុធខ្លីម៉ាកកា៥៤ មួយដើម បានកៀរជនរងគ្រោះដែលកំពុងជិះកង់ហាត់ប្រាណឱ្យឈប់ រួចដកអាវុធខ្លីភ្ជង់ឱ្យដោះខ្សែ.ក ផ្លាកដៃប្រគល់ទៅឱ្យពួកគេ។ បន្ទាប់ពីធ្វើសកម្មភាពបានសម្រេច ក្រុមចោរក៏បាននាំគ្នាជិះម៉ូតូគេចខ្លួនបាត់ដោយសុវត្ថិភាព ។
តាមជនរងគ្រោះឈ្មោះ ឆាំ ឆេន ភេទប្រុស អាយុ៦០ឆ្នាំ ជាអាជីវករលក់ដូរម្ហូបអាហារតូបលេខ៥៥៥ នៅឆ្នេរអូរឈើទាល ក្រុងព្រះសីហនុឱ្យដឹងថា នាវេលាព្រឹកព្រលឹមនោះ រូបគាត់បានជិះកង់ចេញពីតូបតាមបណ្តោយផ្លូវភ្លោះមុខរង្វង់មូលតោពីរ និងឆ្ពោះទៅបញ្ជាការដ្ឋានប៉េអឹម ។ លុះមកដល់ជិតផ្ទះសំណាក់ផ្កាចំប៉ី ស្ថិតក្នុងក្រុមទី១៥ ភូមិ៤ សង្កាត់លេខ៤ ក្រុងព្រះសីហនុ ស្រាប់តែមានជន២នាក់ជិះម៉ូតូមួយគ្រឿងមកកៀរគាត់ឱ្យឈប់ និងដកអាវុធម៉ាកកា៥៤ ភ្ជង់ឱ្យគាត់ដោះខ្សែ.ក ផ្លាកដៃប្រគល់ឱ្យពួកគេ ។
គាត់ក៏បានដោះគ្រឿងអលង្ការប្រគល់ទៅឱ្យជនសង្ស័យទាំងអារម្មណ៍ភ័យខ្លាច និងស្តាយស្រណោះ ។ ម្យ៉ាងវិញទៀត ក៏ខ្លាចជនសង្ស័យបាញ់សម្លាប់ផងដែរ ។ ក្រោយពីធ្វើសកម្មភាពប្លន់បានសម្រេច ចោរទាំង២នាក់ក៏នាំគ្នាឡើងជិះម៉ូតូគេចខ្លួនបាត់ទៅ ។ ជនរងគ្រោះឱ្យដឹងទៀតថា គ្រឿងអលង្ការដែលចោរប្លន់យកទៅនោះ គឺខ្សែ.កមាសមួយខ្សែទម្ងន់៣តម្លឹង និងផ្លាកដៃមាសមួយទម្ងន់២តម្លឹង សរុបគឺមានទម្ងន់៥តម្លឹង ។ នៅព្រឹកថ្ងៃទី៦ មិថុនា ជនរងគ្រោះបានទៅដាក់ពាក្យបណ្តឹងនៅស្នងការដ្ឋាននគរបាលខេត្ត ដើម្បីឱ្យជួយស្វែងរក និងឈានទៅចាប់ខ្លួនក្រុមចោរប្លន់ទាំងនោះមកផ្តន្ទា
ទោស ។
ប្រជាពលរដ្ឋនៅខេត្តព្រះសីហនុ ដែលបានដឹងពីហេតុការណ៍ប្លន់ប្រដាប់អាវុធនេះនិយាយថា ពួកគាត់មានក្តីបារម្ភយ៉ាងខ្លាំងចំពោះសុវត្ថិភាពផ្ទាល់ខ្លួន ក៏ដូចជាកូនចៅដែលជិះម៉ូតូ ឬបើករថយន្តទៅរៀន ដោយសារតែរយៈពេលប៉ុន្មានខែនេះ មានសកម្មភាពចោរលួច ចោរកាច់សោម៉ូតូ និងប្លន់ស្រស់ៗ ហើយចោរតែងគេចខ្លួនដោយសុវត្ថិភាពទៀត ពុំដែលឃើញសមត្ថកិច្ចបង្ក្រាបបានម្តងណាឡើយ ។
ប្រជាពលរដ្ឋបានមើលឃើញថា អំពើឆក់ប្លន់នេះ ដោយសារតែសព្វថ្ងៃ ល្បែង បៀ អាប៉ោង កន្ទុយលេខ ល្បែងភ្នាល់បាល់កំពុងរីកដូចផ្សិតនៅតាមហាងកាហ្វេ ដែលមានអ្នកលេងទាំងមន្ត្រីរាជការ កងកម្លាំងប្រដាប់អាវុធ អាជីវករនាំគ្នាលេងដោយគ្មានការលាក់លៀមបន្តិចណាឡើយ ពិសេសគឺល្បែងភ្នាល់បាល់កំពុងតែពេញនិយមជាងគេក្នុងចំណោមល្បែងផ្សេងៗទៀត ៕
ចែករំលែកព័តមាននេះ