ខេត្តបន្ទាយមានជ័យ ៖ ភ្ញៀវទេសចរជាតិ-អន្តរជាតិ និងអ្នភូមិ បានរិះគន់ចំណាត់ការរបស់សមត្ថកិច្ចក្រុងប៉ោយប៉ែត ជុំវិញការរៀបចំសណ្តាប់ធ្នាប់នាពេលកន្លងមក ដែលអះអាងថា ធ្វើឡើងដើម្បីកែលម្អសោភ័ណភាពក្រុង សូម្បីតែអ្នកលក់ដូរតាមចិញ្ចើមផ្លូវ ឬយីហោផ្សេងៗក៏ឱ្យរំកិលថយក្រោយដែរ ។
ផ្ទុយទៅវិញ វិធានដែលសមត្ថកិច្ចនិយាយថា នឹងធ្វើឡើងជាប្រចាំនោះត្រូវអ្នកដំណើរ និងប្រជាពលរដ្ឋរិះគន់ថា ក្លាយជាវិធានការវែកចកទៅហើយ ព្រោះតែពេលនេះអ្នកលក់តាមចិញ្ចើមផ្លូវបានលយចូលមកវិញយ៉ាងព្រោងព្រាត ។ មិនតែប៉ុណ្ណោះ រថយន្តក៏ចតត្រៀបត្រាតាមដងផ្លូវ ដែលពីមុនមានតែម្តុំមុខផ្លូវចូលផ្សារអគ្គះតែប៉ុណ្ណោះ តែពេលនេះម្តុំមុខផ្សាររ៉ាក៏មានរថយន្តចតយ៉ាងអនាធិបតេយ្យដែរ រហូតជិតដល់រង្វង់មូលច្រកទ្វារអន្តរជាតិប៉ោយប៉ែត ។
កន្លែងខ្លះមានរទេះដឹកខោអាវជជុះចតត្រៀបត្រា មុននាំចេញទៅប្រទេសថៃ បង្កឱ្យដងផ្លូវប្រែទៅជាតូចចង្អៀត ហើយម្ខាងផ្លូវនៅទល់នឹងមុខស្តង់លក់ខោអាវជជុះ ជាពិសេសមានគេលើកដាក់ត្រីចុះពីរថយន្តរាល់ព្រឹក ធ្វើឱ្យហៀរទឹកជះក្លិនឆ្អេះឆ្អាបប៉ះពាល់ដល់អ្នកដំណើរយ៉ាងខ្លាំង ។
បញ្ហាទាំងអស់ខាងលើ ប្រជាពលរដ្ឋ និងភ្ញៀវទេសចរទទូចសុំឱ្យអាជ្ញាធរមេត្តាមានវិធានការដើម្បីរក្សាសណ្តាប់ធ្នាប់ និងសោភ័ណភាពច្រកទ្វារអន្តរជាតិ ដែលមានអ្នកដំណើរចម្រុះជាតិសាសន៍ឆ្លងកាត់រាល់ថ្ងៃ ៕
ចែករំលែកព័តមាននេះ