រាជធានីភ្នំពេញ ៖ ស្ត្រីម្នាក់ត្រូវកម្លាំងនគរបាលប៉ុស្ដិ៍កាកាប២ ហៅទៅសាកសួរបន្ទាប់ពីលិចឮដំណឹងថា នាងរួមជាមួយស្ត្រីម្នាក់ទៀតជាម្ដាយធម៌បីកូនតូចម្នាក់ដើរលក់ ប៉ុន្តែពេលនាំទៅដល់ប៉ុស្ដិ៍ ទើបដឹងពីការពិត និងគួរឲ្យអាណិតនាងយ៉ាងខ្លាំងទៅវិញ បន្ទាប់ពីនាងរៀបរាប់ពីដំណើរជីវិតដ៏កំសត់របស់នាងគឺប្ដីត្រូវពស់ចឹកស្លាប់។ ហេតុការណ៍នោះកើតឡើងកាលពីម៉ោង១២ថ្ងៃត្រង់ ថ្ងៃទី១ ខែវិច្ឆិកា ឆ្នាំ២០១៨ ស្ថិតក្នុងភូមិក្បាលដំរី សង្កាត់កាកាប២ ខណ្ឌពោធិ៍សែនជ័យ ។
ស្ត្រីខាងលើឈ្មោះ វង់ ស្រីម៉ាច អាយុ២៦ឆ្នាំ មានស្រុកកំណើតក្នុងភូមិជើងគោ សង្កាត់ជើងគោ ខណ្ឌព្រៃនប់ ខេត្តព្រះសីហនុ ។បច្ចុប្បន្នស្នាក់នៅក្នុងភូមិ៤ សង្កាត់ស្ទឹងវែង ក្រុងខេមរភូមិន្ទ ខេត្តកោះកុង។ ចំណែកស្ត្រីចំណាស់ម្នាក់ដែលជាអ្នករួមដំណើរជាមួយឈ្មោះសាន រីម អាយុ៦០ឆ្នាំ ត្រូវជាម្ដាយធម៌របស់នាង។
ស្ត្រីរូបនេះប្រាប់ឲ្យដឹងថា នាងជាជនទុរគតដែលត្រូវឪពុកម្ដាយស្លាប់ចោលអស់ជាច្រើនឆ្នាំកន្លងមកហើយ ដោយគ្មានសាច់ញាតិផ្សេងទៀតឡើយ។ កាលពីប៉ុន្មានឆ្នាំមុននាង ចាកចេញពីស្រុកទៅធ្វើកម្មករដកដំឡូង និងការងារផ្សេងៗទៀតក្នុងខេត្តបាត់ដំបង។ រហូតដល់ឆ្នាំ២០១៧ នាងជួបបុរសម្នាក់ជាកម្មករដកដំឡូងជាមួយគ្នាដែរ ក្រោយពីស្គាល់គ្នាមួយរយៈក៏មានចិត្តស្រឡាញ់គ្នារួចចាប់ដៃគ្នាជាប្ដីប្រពន្ធ ហើយប្ដីនាងក៏ជាជនទុរគតដូចនាងដែរ។ ដោយឪពុកម្ដាយរបស់គាត់ស្លាប់ចោលអស់តាំងពីរបបប្រល័យពូជសាសន៍ប៉ុលពត។
ស្ត្រីរូបនេះបន្តថា ក្រោយក្លាយជាប្ដីប្រពន្ធរួចមក ប្ដីនាងបាននាំនាងចេញពីខេត្តបាត់ដំបងទៅរស់នៅក្នុងភូមិ៤ សង្កាត់ស្ទឹងវែង ក្រុងខេមរភូមិន្ទ ខេត្តកោះកុងវិញ។ ពេលនោះប្ដីមានបំណងធ្វើជាកម្មករសំណង់ ប៉ុន្តែពេលទៅដល់ទីនោះបែរជាចាប់យករបរព្រានព្រៃជាមួយនឹងអ្នកភូមិមួយចំនួនទៀត។ ដោយបាននាំឆ្កែចូលព្រៃដេញចាប់សត្វ និងបរបាញ់សត្វ ចំណែកនាងរាវងាវលក់ តែទោះបីជារកស៊ីធ្វើការទាំង២នាក់ក្ដីក៏មិនធ្វើឲ្យជីវភាពប្រសើរឡើងឡើយ ហើយរហូតដល់ឆ្នាំ២០១៨ នាងចាប់ផ្ដើមមានផ្ទៃពោះទៀត។
នាងរៀបរាប់បន្ថែមទៀតថា លុះដល់នាងមានផ្ទៃពោះ៥ខែ មានរឿងអកុសនឹកស្មានមិនដល់កើតឡើង គឺនៅថ្ងៃមួយពេលប្ដីនាងចូលព្រៃនាំឆ្កែដេញសត្វ និងបរបាញ់ ត្រូពស់ចឹកបណ្ដាលឲ្យរងរបួសធ្ងន់ធ្ងរ។ ពេលនោះអ្នកភូមិនៅជាមួយមិនអាចជួយសង្គ្រោះបានឡើយ ហើយប្ដីនាងក៏ស្លាប់ចោលនាង និងកូនក្នុងផ្ទៃ ជាហេតុធ្វើឲ្យរូបនាងក្លាយខ្លួនជាស្រីមេម៉ាយ។ ក្រោយមកនាង រស់នៅម្នាក់ឯង បានស្ត្រីឈ្មោះ សាន រីម ជាម្ដាយជួយយកអសាររហូតគ្រប់ខែសម្រាលកូនប្រុសម្នាក់។
នាងរៀបរាប់ឱ្យដឹងបន្តថា គិតរហូតដល់ពេលនេះកូននាងអាយុជាង២ខែហើយ ចំណែកនាង ជួបការលំបាកខ្វះខាតយ៉ាងខ្លាំងហួសពីការថ្លែង និងគ្មានលទ្ធភាពចិញ្ចឹមកូនទេ ក៏សម្រេចចិត្តយកកូនទៅដាក់មណ្ឌលកុមារកំព្រាមួយនៅខាងក្រោយមន្ទីរពេទ្យរុស្ស៊ីក្នុងរាជធានីភ្នំពេញ ប៉ុន្តែពេលទៅដល់ខាងមណ្ឌលមិនព្រមទទួលឡើយ ទើបនាងនិងម្ដាយធម៌សម្រេចចិត្តបីកូនត្រឡប់ក្រោយវិញ។
នាងបានបន្តថា លុះជិះរថយន្តទៅឈប់នៅក្នុងភូមិក្បាលដំរី សង្កាត់កាកាប២ ខណ្ឌពោធិ៍សែនជ័យ នាងនិងម្ដាយបានសួរទៅអ្នកនៅជិតៗនោះរកទីតាំងមណ្ឌលកុមារកំព្រាផ្សេងទៀត ដើម្បីយកកូនទៅដាក់ទីនោះ ព្រោះនាងមិនចង់ឲ្យកូនទៅអ្នកផ្សេងក្រៅពីមណ្ឌលកុមារកំព្រាឡើយ ហើយកន្លងមកមានអ្នកចង់យកទៅចិញ្ចឹមច្រើននាក់ដែរ អ្នកខ្លះធានាចេញសងបំណុលដែលនាងជំពាក់គេ៧០០ដុល្លារជំនួស ហើយយកកូនទៅចិញ្ចឹមទៀតផង ប៉ុន្តែនាងមិនឲ្យឡើយ។ ដោយនាងគិតថា បើយកកូនទៅដាក់មណ្ឌលកុមារកំព្រានាងអាចទៅលេងកូនម្ដងម្កាល តែបើឲ្យទៅអ្នកផ្សេងមិនអាចឡើយ តែពេលនេះនាងដាច់ចិត្តហើយ បើមាននរណាចង់យកទៅចិញ្ចឹមនាងនឹងប្រគល់ជូនភ្លាម ព្រោះនាងគ្មានលទ្ធភាពចិញ្ចឹមកូនទេ៕
ចែករំលែកព័តមាននេះ