រាជធានីភ្នំពេញ ៖ បច្ចុប្បន្នខេត្តកំពតមានតំបន់រមណីយដ្ឋានចំនួន១៧កន្លែង ដែលកំពុងទាក់ទាញភ្ញៀវទេសចរជាតិ និងអន្តរជាតិក្នុងនោះ តំបន់រមណីយដ្ឋានបូកគោ ឬឋានសួគ៌បូកគោ គឺជាតំបន់មេដែកដ៏ទាក់ទាញបំផុតសម្រាប់វិស័យទេសចរណ៍ ។ នេះបើតាមការអះអាងពីប្រធានមន្ទីរទេសចរណ៍ខេត្តកំពត…
រាជធានីភ្នំពេញ ៖ បច្ចុប្បន្នខេត្តកំពតមានតំបន់រមណីយដ្ឋានចំនួន១៧កន្លែង ដែលកំពុងទាក់ទាញភ្ញៀវទេសចរជាតិ និងអន្តរជាតិក្នុងនោះ តំបន់រមណីយដ្ឋានបូកគោ ឬឋានសួគ៌បូកគោ គឺជាតំបន់មេដែកដ៏ទាក់ទាញបំផុតសម្រាប់វិស័យទេសចរណ៍ ។ នេះបើតាមការអះអាងពីប្រធានមន្ទីរទេសចរណ៍ខេត្តកំពត ។
ថ្លែងប្រាប់កោះសន្ដិភាព កាលពីពេលថ្មីៗនេះ លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឲ្យដឹងថា ប៉ុន្មានឆ្នាំចុងក្រោយនេះ ចំនួនភ្ញៀវទេសចរជាតិ និងអន្តរជាតិ បានមកទស្សនាកម្សាន្ដនៅទឹកដីខេត្តកំពតកើនឡើងយ៉ាងគំហុក ពិសេសបន្ទាប់ពីបើកឲ្យដំណើរការរមណីយដ្ឋានលំដាប់អន្តរជាតិមួយនេះ ។ លោកបញ្ជាក់ថា ៖« កាលពី៦ឆ្នាំមុនភ្ញៀវទេសចរជាតិ និងអន្តរជាតិមានប្រមាណពី៥ម៉ឺនទៅ៦ម៉ឺននាក់ប៉ុណ្ណោះដែលបានមកកាន់ទឹកដីខេត្តកំពត ប៉ុន្តែចាប់ពីបើកឲ្យដំណើរការរមណីយដ្ឋានឋានសួគ៌បូកគោក្នុងអំឡុងឆ្នាំ២០១២ និង២០១៣មក ភ្ញៀវទេសចរជាតិនិងអន្តរជាតិ បានកើនឡើងជាលំដាប់ ឬអាចនិយាយថា ឡើងយ៉ាងគំហុកតែម្តង »។
លោកប្រធានមន្ទីរទេសចរណ៍បានបញ្ជាក់បន្ថែមថា ៖« រមណីយដ្ឋានឋានសួគ៌បូកគោ ដែលយើងហ៊ានថាជាតំបន់មេដែកនោះ ដោយសារមានចំណុចពិសេសចំនួន៥ ដែលបានទាក់ទាញភ្ញៀវទេសចរ ក្នុងនោះរួមមាន ទី១/ សម្រស់ធម្មជាតិដ៏ស្រស់បំព្រង និងប្រកបដោយខ្យល់អាកាសបរិសុទ្ធ ។ ទី២/ សំណង់បេតិកភ័ណ្ឌជាច្រើនដែលបានបន្សល់ទុកនៅទីនោះ ទាំងសម្រាប់ការទស្សនាផង និងស្រាវជ្រាវផង ។ ទី៣/ ដំណើរកម្សាន្តក្នុងព្រៃដ៏ពេញនិយម ។ ទី៤/ការរៀបចំសេវាកម្សាន្តថ្មីៗ ដូចជា ស្បា, ម៉ាស្សា, ខារ៉ាអូខេជាដើម និងទី៥/ផលិតផលទេសចរណ៍បែបសាសនា ខណៈដែលទីនោះបាននាំមកនូវជំនឿខ្ពស់សម្រាប់សាសនិកជន »។
យោងតាមប្រធានមន្ទីរទេសចរណ៍ខេត្ត ក្នុងឆ្នាំ២០១៧ ខេត្តកំពតទទួលបានភ្ញៀវទេសចរជាតិ និងអន្តរជាតិប្រមាណ១,៥លាននាក់ ក្នុងនោះភ្ញៀវទេសចរអន្តរជាតិប្រមាណ១០% ។ ដោយឡែកក្នុងរយៈពេល១០ខែឆ្នាំ២០១៨នេះ ភ្ញៀវទេសចរបានកើនក្នុងរង្វង់ប្រមាណ២% បើធៀបនឹងរយៈពេលដូចគ្នានៃឆ្នាំមុន ។
ទន្ទឹមនឹងកំណើនភ្ញៀវទេសចរជាតិ និងអន្តរជាតិទៅកម្សាន្ដ កើនឡើងជាបន្ដបន្ទាប់នេះ តាមគម្រោង ខេត្តកំពតនឹងរៀបចំឲ្យមានតំបន់ឆ្នេរខ្សាច់បន្ថែមទៀត ខណៈបច្ចុប្បន្ន បើទោះជាខេត្តមានឆ្នេរសមុទ្រក៏ពិតមែន ប៉ុន្តែបច្ចុប្បន្ននេះពុំមានឆ្នេរខ្សាច់សម្រាប់កម្សាន្តនោះទេ ។
បើតាមលោក សយ ស៊ីណុល បានបញ្ជាក់ថា ៖« ការបង្កើតឲ្យមានតំបន់ឆ្នេរខ្សាច់ដែលជាផលិតផលទេសចរណ៍ថ្មីសម្រាប់ខេត្ត គួបផ្សំនឹងការបង្កើតកំពង់ផែខ្នាតអន្តរជាតិដែលគ្រោងបញ្ចប់ការសាងសង់នៅអំឡុងឆ្នាំ២០២០នោះ គឺអាចនិយាយថា ផលិតផលទេសចរណ៍ថ្មីទាំងពីរនេះ នឹងទាក់ទាញភ្ញៀវទេសចរមកកាន់ខេត្តកំពតកាន់តែច្រើនជាងនេះថែមទៀតនៅប៉ុន្មានឆ្នាំខាងមុខ »៕
ចែករំលែកព័តមាននេះ