រាជធានីភ្នំពេញ ៖ លោកសូ លីដូគឺជាតារាចម្រៀងល្បីឈ្មោះគួរសម ជាពិសេសបទដែលទទួលបានការគាំទ្រច្រើនជាងគេ ខណៈពេលលោកបោះជំហានចូលសិល្បៈដំបូងនោះគឺបទ «មនុស្សពិបាកចិត្ដជាងគេក្នុងលោកនេះ» ។ តើតារាចម្រៀងរូបនេះមានប្រវត្ដិជីវិតបែបណា មានប្រភពកំណើតនៅទីណា?
រាជធានីភ្នំពេញ ៖ លោកសូ លីដូគឺជាតារាចម្រៀងល្បីឈ្មោះគួរសម ជាពិសេសបទដែលទទួលបានការគាំទ្រច្រើនជាងគេ ខណៈពេលលោកបោះជំហានចូលសិល្បៈដំបូងនោះគឺបទ «មនុស្សពិបាកចិត្ដជាងគេក្នុងលោកនេះ» ។ តើតារាចម្រៀងរូបនេះមានប្រវត្ដិជីវិតបែបណា មានប្រភពកំណើតនៅទីណា?
លោកសូ លីដូ មានស្រុកកំណើតនៅភូមិតាកឹម ឃុំតាភេម ស្រុកត្រាំកក់ ខេត្ដតាកែវ កើតថ្ងៃទី៥ តុលា ឆ្នាំ១៩៧៩ ។ ឪពុករបស់លោកឈ្មោះ ហូ សំអុន ជាមន្ដ្រីយោធានៅក្រសួងការពារជាតិ ម្ដាយឈ្មោះ ចែវ រ៉ានី និងមានបងប្អូន៤នាក់ ប្រុសទាំងអស់ ចំណែករូបលោកគឺជាកូនច្បង ។
លោកសូ លីដូ រៀបរាប់កាលពីពេលថ្មីៗនេះថា ពេលលោកកើតមកមិនដែលបានឃើញមុខឪពុកទេ ឃើញតែម្ដាយដែលនៅមើលថែ ព្រោះឪពុកលោកជាទាហានបានទៅឆ្ងាយពីរូបលោកតាំងពីនៅក្នុងផ្ទៃម្ដាយម៉្លេះ ហើយមិនដឹងថាគាត់បាត់បង់ជីវិត ឬក៏នៅមានជីវិតទេ ព្រោះបាត់ដំណឹងសូន្យឈឹង ។ ម្ដាយរបស់លោក និងរូបលោកមិនសង្ឃឹមថានឹងបានជួបមុខឪពុករបស់លោកវិញទេ ព្រោះតែគាត់ជាទាហាន ហើយពេលបែកគ្នាគឺបែកដោយសារតែសង្គ្រាម ។ ជីវិតរស់នៅគ្មានឪពុកពិតជាពិបាកណាស់ ស្គាល់តែភាពក្រអត់ឃ្លាន រកព្រឹកខ្វះល្ងាច រកល្ងាចខ្វះព្រឹក ។ ទោះបីជាក្រលំបាកយ៉ាងណាក៏ដោយ ម្ដាយលោកនៅតែតស៊ូបញ្ជូនរូបលោកឱ្យទៅរៀននៅសាលាបឋមសិក្សាតាកឹម ។ ក្រោយមកប្រទេសជាតិមានសន្ដិភាព ឪពុកលោកបានវិលមកនៅជុំគ្រួសារវិញ ។ ថ្វីដ្បិតតែឪពុកលោកមកវិញ តែជីវភាពនៅតែមិនលើសពីមុនទេ ។ ក្រោយមកលោកបានចូលរៀននៅអនុវិទ្យាល័យអង្គរកា និងបន្ទាប់មកចូលវិទ្យាល័យ ១ ឧសភា ស្ថិតក្នុងស្រុកត្រាំកក់ ខេត្ដតាកែវ ។
បន្ទាប់ពីប្រឡងជាប់សញ្ញាបត្រមធ្យមសិក្សាទុតិយភូមិ លោកលីដូមិនបានបន្ដការសិក្សាថ្នាក់មហាវិទ្យាល័យទេ ព្រោះតែជីវភាពគ្រួសារជួបការលំបាកខ្លាំង ជាហេតុធ្វើឱ្យលោកចាកចេញពីឪពុកម្ដាយទៅរស់នៅភ្នំពេញជាមួយម្ដាយមីង ដើម្បីរកប្រាក់មកផ្គត់ផ្គង់គ្រួសារនៅឆ្នាំ១៩៩៩ ។
នៅពេលចាកចេញពីស្រុកកំណើតលោក សូលីដូ មានបំណងប្រឡូកក្នុងវិស័យសិល្បៈ ព្រោះវិស័យនេះលោកស្រឡាញ់តាំងពីនៅកុមារម៉្លេះ ។ ដូច្នេះហើយលោកបានចូលហាត់ច្រៀងនៅក្នុងក្លឹបប្រជានុភាព ។ ដោយសារតែលោកមាននិស្ស័យពីកំណើត ហាត់រៀនបានតែ៣ខែប៉ុណ្ណោះ ក៏មានលទ្ធផលល្អ ហើយបានដាក់ពាក្យចូលច្រៀងនៅតាមភោជនីយដ្ឋាន និងបៀរហ្គាឌិននានាធ្វើឱ្យជីវភាពគ្រួសារលោកធូរស្រាលមួយកម្រិត ។
ប្រឡូកក្នុងអាជីពជាអ្នកចម្រៀងនៅតាមភោជនីយដ្ឋាន និងបៀរហ្គាឌិនបាន៥ឆ្នាំ បណ្ដាស្ថានីយទូរទស្សន៍នានាចាប់អារម្មណ៍អញ្ជើញលោកសូ លីដូ ឡើងច្រៀងជារឿយៗ មិនតែប៉ុណ្ណោះផលិតកម្មសាន់ដេទាក់ទងលោកឱ្យចូលច្រៀងដោយចុះកិច្ចសន្យារយៈពេល៣ឆ្នាំកាលពីឆ្នាំ២០០៦ ។ នៅផលិតកម្មសាន់ដេ លោកច្រៀងបានជិត៥០បទ ។ បន្ទាប់ពីបញ្ចប់កិច្ចសន្យាជាមួយផលិតកម្មសាន់ដេមក លោកលីដូបានចូលច្រៀងឱ្យផលិតកម្មប៊ីកមែនវិញ ចាប់ពីឆ្នាំ២០០៩ ដល់ចុងឆ្នាំ២០១១ ។ នៅចុងឆ្នាំ២០១១ លោកបានឈប់ពីផលិតកម្មប៊ីកមែន ហើយចូលផលិតកម្ម Diamond Music វិញ ។ នៅក្នុងផលិតកម្មក្រោយនេះបទចម្រៀងដែលកំពុងពេញនិយមមានដូចជាបទ «ម្ដេចក៏ពិបាកម៉្លេះគ្រាន់តែត្រឹមពាក្យថាស្រឡាញ់» «ឈឺចាប់ថ្ងៃ១៤ កុម្ភៈ» និងបទ «មានជម្រើសផ្សេងឱ្យបងទេ» ជាដើម ។
ក្រៅពីច្រៀងនៅក្នុងផលិតកម្ម Diamond Music លោកសូ លីដូឆ្លៀតពេលទៅច្រៀងនៅភោជនីយដ្ឋាន «រាត្រីសប្បាយ សប្បាយ» ជារៀងរាល់ថ្ងៃដើម្បីរកចំណូលបន្ថែមទៀត ។ លើសពីនេះទៀត លោកកំពុងតែសន្សំប្រាក់ដើម្បីចូលភាគហ៊ុនជាមួយមិត្ដស្រីរបស់លោកបើកមុខរបរផ្ទាល់ខ្លួន ។ រវាងរូបលោក និងនារីរូបនោះបានស្គាល់គ្នាជាយូរឆ្នាំមកហើយ ប៉ុន្ដែមិនទាន់ដល់ថ្ងៃចូលរោងជ័យទេ គឺនៅស្វែងយល់ចិត្ដគ្នាសិន ។
លោកសូ លីដូប្រាប់ថា ជីវិតនៅក្នុងសង្គមសិល្បៈមិនមែនជារឿងងាយស្រួលទេ មានពេលខ្លះលោកសឹងតែបោះបង់ចោលម្ដងៗទៅហើយ តែចិត្ដស្រឡាញ់ ទើបខំតស៊ូគ្រប់បែបយ៉ាងជម្នះឧបសគ្គរាប់មិនអស់ រហូតមកដល់ថ្ងៃនេះ ។ ការខំប្រឹងប្រែងរបស់លោកសូ លីដូ គឺបានក្លាយជាតារាចម្រៀងមួយរូប ប៉ុន្ដែលោកមិនស្កប់ស្កល់ត្រឹមនេះទេ គឺនឹងខិតខំកសាងជីវិតឱ្យមានកេរ្ដិ៍ឈ្មោះល្បីជាងនេះទៀត ៕
ចែករំលែកព័តមាននេះ